Read chopi Mtuletelo 17 Bible Online

Mtuletelo 17 - chopi bible

Mtuletelo 17

¹Se yimweyo ka tingelozi ta mtxhanu ni timbidi ti nga ti ñote mtxhanu wa magombe ni mambidi yi to ta yi ta ni gela tiya: “Ngono, ni ta kukomba kulamulwa ka digelegele da hombe, di nga khalahatsha ha mabambe ka mati o tala,

²vafumeli va mafu va mahile wugango nado, se vaaki va ha mafuni va levile ngu vhinya ya wugelegele wa dona.”

³ Ngelozi yi to ni teka ngu mu ka moya yi ni yisa txiwulani, ahawa ni nga ya wona wamsikati a di khalahatshile txitimwi ka txikalani txo bhilivila, txi di tate ngu matina o ruketela, txi di ni mtxhanu wa misungo ni mimbidi ni digumi da titxheho.

⁴Wamsikati a ti ni syambalo sa masilika o bhilivila, a di bombile ngu nzalama, ni marigwi a lisima la hombe ni maperola; manzani a ti ni digombe do mahwa ngu nzalama, di di tate ngu sa manyala: I nzambwa ya wugelegele wakwe.

⁵Ha mbanza kwakwe ku ti bhatwe ditina da msisalo, daku kha dona: “Bhabhilona wa Hombe, mame wa magelegele ni wa sa manyala sa ha mafuni.”

⁶Se ni to wona ti to wamsikati a ti levile ngu mnoha wa vasawuleki ni mnoha wa tifakazi ta Jesu. Ngako ni txi mu wona ni to tala ngu kuxamala ngutu.

⁷Aniko ngelozi yi ni gete yi txi kha yona: “U xamala txani kani?” Ani ni na ku txhamusela ta msisalo wa wamsikati wuwa ni wa txikalani txiya txa mtxhanu wa misungo ni yimbidi ni digumi da titxheho, atxiya txi nga mu rwala.

⁸ Txikalani txi u nga txi wona, txi ti ti ho, aniko kha txi swi txi diho; txi hafuhi ni kuhuma ngu diphalani ko hokoma, kambe txi ya kulovani: Vaaki va ha mafuni, avava matina awe ma nga mbi bhalwa dibhukuni ka wutomi, kukhukhela ditiko di tumbuluka, va na xamala mbimo yi va no wona txikalani, nguko txona txi ti ti ho, konaku kha txiswi txi diho, aniko txi na tshumela txi humelela.

⁹Ahawa kulaveka mapimo a wuzivi: Misungo yiya ya mtxhanu ni yimbidi i mtxhanu wa mimango ni yimbidi, ahawa wu wamsikati a nga khalahatsha kona. Kambe i mtxhanu wa vafumeli ni vambidi.

¹⁰Mtxhanu wa vona va wite, mmweyo a ngadi ho, mmwani kha nzi kuta; kambe mbimo yi a nota, a nata fungala mbimo ya yidotho.

¹¹Txikalani txi txi nga ti ho, atxiya se txi ku si nga ho, ngu txona i ku mfumeli wa wutxhanu ni vararu; txona njimwetxo txa sile sa mtxhanu ni simbidi, aniko txi ya kulovani.

¹²“Titxheho tile ta digumi u nga ti wona digumi da vafumeli va sinziko kuamukela mfumo. Kambe vona va na amukela wukoma kota vafumeli txipimo txa txikhati tximwetxo dwe, kumweko ni txikalani.

¹³Vafumeli vava va na ni kupima kumweko: Kuningela wufumeli wawe ni wukoma wawe ka Txikalani.

¹⁴Va na lwa ni Txinvutana, aniko Txinvutana txi na va xula, nguko txona i Mkoma wa vakoma ni Mfumeli wa vafumeli, se kumweko natxo kambe va na xula, avale va nga dhanwa, avale va nga sawulwa, ni makholwa.”

¹⁵Ngelozi yi to engeta yi txi kha yona: Mati yawa u nga ma wona, ahawa digelegele di nga khala kona, i matiko ni mabutho a vathu, mifumo ni tidimi.

¹⁶Titxheho ti ta digumi u nga ti wona kumweko ni txikalani, si na vengela wu wa digelegele, si na mtshambula tinguwo, si mu leka i di tximbwiri; si na dya nyama yakwe, si mu hisa ngu mndilo,

¹⁷Nguko Txizimu txi si ningile mbilu ya kumaha makungo a txona, ngu mapimo mamwani: Kuningela wukoma wa digelegele ka txikalani, kala kuza mapswi a Txizimu me hetiseka.

¹⁸“Ngu kugwitisa, wamsikati wu u nga mu wona, i Didhoropa da Hombe di fumako vafumeli va mafu.”