Read chopi Mtuletelo 19 Bible Online

Mtuletelo 19 - chopi bible

Mtuletelo 19

¹Msana keto, ni to engisa txo nga diguwa da dibutho da hombe da vathu, di txi huwelela, di txi kha dona: “Haleluya! Kuhanyisa ni wudhumo ni mtamo si lumba Txizimu txathu.

²Nguko kulamula ka txona nga ditshuri ni kululama. Ngu txona Txizimu txi nga lamula digelegele da hombe di nga ti nyeta mafu ngu wugelegele wa dona; se ka dona Txizimu txi pharete mnoha wa sithumi sa txona.”

³Ve engeta va txi kha vona: “Haleluya!” Ngu ka dona digelegele diya wutshi wu na tuvika ngu hawa ku si gumiko.

⁴Se madhota a magumi mambidi ni mune, ni sivangwa sa mune so hanya, si to khizama masoni ka Txizimu, txi nga khalahatsha ha txikhaloni ka wukoma, si txi khozela si txi kha sona: “Amen! Haleluya!”

⁵ Konako, ku to huma dipswi di txi ta ngu ha txikhaloni ka wukoma, di txi: “Dhumisani Txizimu txathu, anu motshenu sithumi sa txona, ni nanu mi txi thavako vavadotho ni vahombe!”

⁶Msana keto, ni to engisa txo nga diguwa da dibutho da hombe, do fana ni diguwa da mati o tala, ni kudhinda ka singwalangwanda sa hombe, va txi kha vona: “Haleluya! Nguko Mkoma Txizimu txathu txa mtamo wotshe se ngu txona txi fumako.

⁷He nengeleni hi txi tsaka ngutu, hi txi pfalisa Txizimu, nguko yi hokile mbimo ya ntxhadho wa Txinvutana. Txiwutwa txa Txinvutana, txi ti lulamisete:

⁸Txi ningilwe kuambala nkhatxwa wo basa wa linya yo khetima, yi ya lisima.” Nguko nkhatxwa wuwa wa linya wu kombisa mithumo yo lulama ya vasawuleki.

⁹ Ngelozi yi to ni gela yi txi kha yona: Bhala u txi khawe: “Va katekile avale va nga dhanelwa m'buso wa mtxhadho wa Txinvutana.” Yi engeta yi txi kha yona: “Aawa ngu ona mapswi a ditshuri a Txizimu.”

¹⁰Konako ni to ti wisa minengeni ka ngelozi, kasiku ni yi khozela, aniko yona yi to ni tsimba, yi txi kha yona: “Lambi! U nga mahe eto. Ani ni txithumi kufana ni nawe ni vakakwanu va veketako wufakazi wa Jesu. Txizimu ngu txona u fanelako ku txi khozela!” Kunene wufakazi wa Jesu ngu wona i ku mtamo wa wuprofeti.

¹¹ Se ni to wona nzuma yi di tulekile: Ku to woneka dihantxhi do basa, se mgadhi wa dona a ti dhanwa ku: “Wo thembeka” ni “Wa ditshuri.” Wa lamula, a txi lwa ngu kululama.

¹²Maso akwe dituro da mndilo, ha msungo kwakwe ku na ni mibhoti yayingi, kubhatwe ditina di di si ziwiko ngu mmwani m'thu hahanze kwakwe,

¹³a ti ambate nguwo yi nga ti betilwe mnohani, se ditina di a dhanwako ngu dona va kha vona: “Dipswi da Txizimu.”

¹⁴Sikwata sa masotxhwa a nzumani sa mu londetela, si di gadhile mahantxhi o basa, va di ambate syambalo sa linya yo basa ya lisima.

¹⁵ Ngu mkanani kwakwe kuhuma ditxhari do lotwa kasi kuwila mifumo ngu dona. Ngene a no yi gola ngu ndonga ya simbi ya wukoma: Ngene a no rukuta nzeka ya vhinya ya kuhenya ko thisa ka Txizimu txa mtamo wotshe.

¹⁶Kubhatwe ditina ha nguwoni kwakwe ni ha nyongani kwakwe: “Mfumeli wa vafumeli, Mkoma wa vakoma!”

¹⁷Ngu msana ni to wona ngelozi, yi di emile ha ditamboni, yi txi kwangula ngu dipswi da hombe ka sotshe si si purumako ha mpfhukani ka nzuma, yi txi kha yona: “Ngonani, tshanganani mi txi ta ka m'buso wa hombe wa Txizimu.

¹⁸Mi ta dya nyama ya vafumeli, nyama ya tinduna, nyama ya va nyamitamo, nyama ya mahantxhi ni ya vagadhi va ona, nyama ya votshe vathu, vathuseki ni tikhumbi, vavadotho ni vahombe.”

¹⁹Se ni to wona txikalani txi di tshangani kumweko ni vafumeli va ha mafuni, ni sikwata sawe sa masotxhwa, kasi kutalwa ni m'gadhi wa dihantxhi ni mtxawa wakwe wa masotxhwa.

²⁰ Kambe txikalani txi to ñolwa kumweko ni mprofeti wa makuhu, awu, ngu kuthumela txikalani, a nga ti mahile sixamaliso so kanganyisa ngu sona vale va nga amukela txixambanyo txa txikalani, ve khozela txithombe txa txona: Txikalani ni mprofeti wa makuhu va to rinzwa, va txi hanya, digovani ka mndilo, wu turako ngu txivavula.

²¹Vamwani va to dawa ngu ditxhari di nga txi huma ngu mkanani ka m'gadhi wa dihantxhi. Se sotshe sinyana si khura ngu nyama yawe.