Read chopi Mtuletelo 22 Bible Online

Mtuletelo 22 - chopi bible

Mtuletelo 22

¹Msana keto, ngelozi yi to ni komba mnambo wa mati a wutomi, o khetima nga kristali; wu txi huma ngu ka txikhalo txa wukoma txa Txizimu ni txa Txinvutana.

² Hagari ka mtendela wa didhoropa ni mabambe ka mnambo, ngu khe ni khe, ku ni mndonga wa wutomi, awu wu ningako mihando digumi ni kambidi ngu dilembe, ngu kuveleka mtxima ni mtxima: Mazokoro a wona ma thuma kuhanyisa mifumo.

³Kuruketela kha ku na mbi vaho kambe. Ka dona didhoropa diya ku nava ni txikhalo txa wukoma txa Txizimu ni txa Txinvutana, se sithumi sa Txizimu si na txi khozela;

⁴Si na wona khohe ya txona, ni ditina da txona, di na bhalwa ha timbanza ka sona.

⁵Kha ku na mbiswa ku di ni wusiku; ni wammweyo kha na mbiswa e lava kuwoninga ka dilambu, hambi kuwoninga ka ditambo, nguko Mkoma Txizimu a na va woninga, se vona va na fuma ngu ha ku si gumiko.

⁶Se Ngelozi yi to ni gela, yi txi kha yona: “Mapswi yawa ngo thembeka ni a ditshuri, nguko Mkoma, Txizimu txi ningako moya wa txona ka vaprofeti, txi rumete ngelozi ya txona kasi kukomba sithumi sa txona ati ti no maheka ngu kukuluveta.”

⁷Jesu a khene: “Wonani, nata konkuwa! A katekile awu a veketako mapswi a kuprofeta ka dibhuku diya.”

⁸Ani, Johani, ngani, ni nga tiengisa ni ku ti wona timhaka tiya. Ngako ni di engisile ni ku ti wona ni to wa hahatshi kasi kukhozela ngelozi yi nga ti ni kombile timhaketo.

⁹Kambe yi to ni tsimba yi txi kha yona: “Lambi! U nga mahe eto! Nani ni txithumi kufana ni nawe, ni vakakwanu, vaprofeti, ni kufana ni vale va veketako mapswi a dibhuku diya. Txizimu ngu txona u fanelako ku txi khozela!”

¹⁰Se ngelozi yi engeta yi txi kha yona: “U nga sise ngu kulema mapswi a kuprofeta ka dibhuku diya, nguko mbimo yi hafuhi.

¹¹ Awu a nga mbi lulama a na simamise e maha ku ambi lulama kwakwe; awu i ku wa nzambwa a na simame nzambwani kwakwe; ani mlulami a na simamise e maha kululama, ani msawuleki a na simame e ti sawulekisa.”

¹²Wonani, ani nata konkuwa, kambe ni nata ni hakhelo: Ni na ta ninga mmwani ni mmwani madingano ni mithumo yakwe.

¹³Ani ngani Alfa ni Omega, Wo khata ni Wo gwita, Makhato ni Magwito.

¹⁴ Va katekile avale va kuwulako tinguwo tawe kasiku ve mana txyavelo ka mndonga wa wutomi, ni kusikota kuwulela didhoropani ngu ha sikeni ka dona.

¹⁵Ti na sala hahanze timbwa, vasalamusi, vamahi va wugelegele, vadayi va vathu, vakhozeli va si i ku si nga Txizimu ni votshe va va dhundako mwendo va hanyako ngu makuhu.

¹⁶Ani Jesu, ni rumete Ngelozi yangu, kasi ku mi fakazela timhaka tiya ti lumbako mabanza: “Ani ni diphasikela da liveleko la Dhavhidha, ni nyeleti yi phatimako hale mixo.”

¹⁷Moya ni txiwutwa va womba va txi kha vona: “Ngono!” Awule a engisako a na wombe nene a txi khene: “Ngono!” Awule a ku ni ditora, a na te. Awule a ti lavako a na amukele mahala mati a wutomi.

¹⁸ Na tsanisa ka wuhi ni wuhi a engisako mapswi a kuprofeta ka dibhuku diya ni khani: “Ngako m'thu a txi engetela mamwani mapswi, Txizimu txi na mu engetela mitungu yi yi nga bhalwa ka dona dibhuku diya.

¹⁹Se ngako m'thu a txi hungula mapswi a dibhuku diya da kuprofeta, Txizimu txi na mu tekela nene txyavelo txakwe ka mndonga wa wutomi ni ka Didhoropa do sawuleka, si nga bhalwa dibhukuni muwa.

²⁰Awule a fakazako timhaka tiya wa womba a txi khene: Ina, ani nata kunukunuku!” Amen. Ngono, Mkoma Jesu!

²¹Kateko ya Mkoma Jesu yi nave ni nanu motshenu! Amen.