Read chopi Mtuletelo 3 Bible Online

Mtuletelo 3 - chopi bible

Mtuletelo 3

¹Ka ngelozi ya Dibanza da Sardhisi, bhala u txi: “A womba tiya awule a ku ni mtxhanu wa Mimoya ni yimbidi ya Txizimu ni tinyeleti ta mtxhanu ni timbidi: Na yi ziva mithumo yako: U na ni nduma ya ti to wa hanya, kasi u fite.

²Wuka u txi khutala. Tsanisa asi si nga sala, si lavako kufa, nguko mithumo yako kha na yi mana yi di hetisekile masoni ka Txizimu.

³ Ngu konaho alakanya ati u nga ti amukela ni ku tiengisa. Ti xayise u txi hunduluka. Ngako u si woneleli, ni nata nga dikhamba, na awe u si txi zivi txikhati txi ni no ku tela ngu txona.

⁴Kambe, didhoropani ka Sardhisi, u na ni vathu vavadotho va va nga mbi nyeta syambalo sawe, vona va na tsimbila ni nani, va di ambate tinguwo to basa, nguko va ni fanelo yeto.

⁵ Awu a xulako a na ambala siamlalo so basa, se ani kha ni na mbi thuka ni pfhuta ditina dakwe dibhukuni ka wutomi. Ni na nuwela ditina dakwe masoni ka Tate wangu ni ka tingelozi takwe.

⁶Awu a ku ni tinzeve a na engise ati Moya wu embelako Mabanza.”

⁷Ka ngelozi ya Dibanza da Filadhelfiya, bhala u txi khawe: “A womba tiya msawuleki, awu wa Ditshuri, awu a ku ni khiya ya Dhavhidha, awu a tulako, ku si maneki ni wammweyo wo seka, awu a sekako, ku si maneki ni wammweyo wo tula.

⁸Na yi ziva mithumo yako: Wona, ni vekile masoni kwako ditimba do tulwa, adi ni mmweyo a no mbi sikota ku di seka, nguko mtamo wako mbudotho, aniko u veketile dipswi dangu, kambe khwa lamba ditina dangu.

⁹Ni na kuningela vokari va disinagoga da Sathani, va ti wombako ku majudha, na i si nga ona, nguko va womba makuhu; ni na maha ti to ve ta ku khizamela minengeni kwako, kasiku ve tiziva ti to na kuranda.

¹⁰Ngako u nga xayisa dipswi dangu da kutimisela, nanani ni na kuxayisa ka txikhati txa kudukwa ku ku nota ka dotshe ditiko, kasi ku ta duka votshe va va nga aka ha mafuni.

¹¹Na ta kunukunuku, ñolisisa ngu kutsana asi u ku naso, kasiku ni mmweyo asi thuki e kuhonyola m'bhoti wako.

¹²Awu a xulako ni na mu maha phande dithepeleni ka Txizimu txangu, se konaho kha na mbiswa e huma. Ni na bhala txitimwi kwakwe ditina da Txizimu txangu ni ditina da didhoropa da Txizimu txangu, Jerusalema wamphya a txhikako ngu nzumani, a tako ngu ka Txizimu txangu ni ditina dangu da diphya.

¹³Awu a ku ni tinzeve a na engise ati Moya wu embelako Mabanza.”

¹⁴Ka ngelozi ya Dibanza da Laodhikheya, bhala u txi khawe: “A womba tiya awu i ku Amen. Fakazi yo thembeka ni ya ditshuri, makhato a sivangwa sa Txizimu.

¹⁵Na yi ziva mithumo yako: Khu titili, kambe khu hisi. Ti ndina tshura, idiku wa titila mwendo kuhisa.

¹⁶Ngu konaho, ngako u ko futumela, u si hisi mwendo kutitila, ni na ku kamba mkanani kwangu.

¹⁷Nguko u khawe: ‘Ni nyatithombe, ni humelete, kha ni pwati txilo.’ Aniko khu ti zivi ti to ngawe mxaniseki: Nyantshanzale, u txisiwana, u dibhofu, khwa ambala txilo!

¹⁸Na kulaya ti to u ta xava kwangu nzalama yo tshuriswa ngu mndilo, kasiku u txi maha nyatithombe, u xava syambalo so basa, kasiku u ti fenengeta ti to ku si woneki tingana ta wusakato wako, ni mafura o tota maso ako, kasiku u wona.

¹⁹Ani na kawuka ni kutsayisa votshe vava ni va randako. Wuseta kukhutala kwako u hunduluka.

²⁰ Wona, ni ho ha txikeni, na gogota ditimba: Ngako m'thu a txi engisa dipswi dangu e tula ditimba, ni na wulela nyumbani kwakwe ni lalela nayo, nene e lalela ni nani.

²¹Ka wu a xulako ni na mninga kateko yo khalahatsha kumweko ni nani ha txikhaloni kwangu ka wukoma, kufana ni nani ni nga xula, se ni nga khalahatsha kumweko ni Tate wangu ha txikhaloni kwakwe ka wukoma.

²²Awu a ku ni tinzeve a na engise ati Moya wu embelako Mabanza.”