Read chopi Mtuletelo 4 Bible Online

Mtuletelo 4 - chopi bible

Mtuletelo 4

¹Msana keto, ni to wona txiwoniso: Ditimba di nga ti tutwe nzumani, se dipswi do khata di ni nga ti di engisile, do tuma ku nga mpundu, di txi kha dona: “Kwela u txi ta hawa, kasiku ni ta kukomba ati ti no maheka msana ka tiya.”

²Kunukunuko ni to susumetwa ngu Moya: Konako ni to wona txikhalo txa wukoma nzumani, se ha txikhaloni ku ti ni mmweyo a nga ti khalahatshile ka txonetxo txikhalo txa wukoma.

³Awule a nga ti khalahatshile ka txona, a ti ni khohe yo nga dirigwi da jasperi ni da sardoniya, se wulaho wa nzumani wu ti ranganyetile txikhalo txa wukoma ngu kukhetima ko nga dirigwi da esmeraldha.

⁴Txikhalo txiya txa wukoma txi ti ranganyetilwe ngu simwani sikhalo sa wukoma sa magumi mambidi ni mune; txitimwi ka sona ku ti khalahatshile madhota a magumi mambidi ni mune, ma di ni syambalo so basa, ma di ni mibhoti ya nzalama ha msungo kwawe.

⁵Ngu ka txikhalo txile txa wukoma, ku ti ti huma kuphatima, mapswi ni singwalangwanda; se masoni ka txikhalo txa wukoma ku ti tura mtxhanu wa misanje ni yimbidi ya mndilo: I ku mimoya ya mtxhanu ni yimbidi ya Txizimu.

⁶Masoni ka txona txikhalo txa wukoma, ku ti ni txo nga Linene la ngilazi lo fana ni kristali. Txikhalo txa wukoma txi ti ranganyetilwe ngu mune wa sivangwa so hanya, na si di tate ngu maso, masoni ni msana.

⁷Txivangwa txo khata txo hanya txi ti fana ni ngonyamo; txivangwa txa wumbidi txi ti fana ni didhuna, txa wuraru txi ti ni khohe yo nga ya m'thu; txa wumune txi ti fana ni ngungwa.

⁸Sivangwa siya sa mune, tximwani ni tximwani txi ti ni mtxhanu wa mabhapi ni dimwedo, na si di tate ngu maso, otshe makhalo, mndani ni hahanze. Se wusiku ni mitshikari, sivangwa sile sa embelela si si malali, si txi kha sona: “Msawuleki, msawuleki, msawuleki! Mkoma Txizimu txa mtamo wotshe. Awule a nga ti ho, Awule a kuho ni wule a tako.”

⁹Se, txikhati ni txikhati sivangwa si ningako kupfalisa ni kubonga ka wule a nga khalahatsha ha txikhaloni ka wukoma, ene wu a hanyako kala kupinduka,

¹⁰madhota awa a magumi mambidi ni mune ma ti ti khizama masoni ka wule a nga khalahatsha ha txikhaloni ka wukoma, kasi ku me khozela ene awule a hanyako, kala kupinduka, me veka mibhoti ya ona hahatshi, masoni ka txikhalo txa wukoma, me kwangula, ma txi kha ona:

¹¹Ngawe u ku ni fanelo, Mkoma Txizimu txathu, Ya kuamukela kupfaliswa, wudhumo ni mtamo, Nguko ngawe u nga va nga sotshe simaha; Se ngu kuranda kwako, sona si tumbulukile, si mana kuhanya.