Read chopi Mtuletelo 8 Bible Online

Mtuletelo 8 - chopi bible

Mtuletelo 8

¹Ku ti ngako Txinvutana txi di namute txixambanyo txa wutxhanu ni simbidi, nzumani ku to malala ku txi dwee txipimo txa hafu ya txikhati.

²Konako ni to wona tingelozi ta mtxhanu ni timbidi ti nga ema masoni ka Txizimu, ti txi ningwa mtxhanu wa mipundu ni yimbidi.

³Yi to ta yi ta ema yimwani ngelozi hafuhi ni txiluvelo, yi di ni txiya txa txiwungelo txa nzalama. Se va to yi ninga dibaselo da dingi kasiku yi di pata ni mikombelo ya votshe vasawuleki, txitimwi ka txiluvelo txa nzalama, txi ku masoni ka txikhalo txa wukoma.

⁴Se wutshi wa dibaselo wu txi huma manzani ka ngelozi wu to tuvika wu ya txitimwi masoni ka Txizimu kumweko ni mikombelo ya vasawuleki.

⁵Se ngelozi yi to teka txiwungelo yi txi tata ngu mndilo wa ha txiluveloni, yi txi vinza ha mafuni: Msana keto, ku to dhinda singwalagwanda, kupfala tihuwa, kukeluka nzumani ni kutsekatseka ka mafu.

⁶Konako tingelozi ta mtxhanu ni timbidi, ti di ñote mipundu ya mtxhanu ni yimbidi ti to ti lulamisela kasiku ti yi veta.

⁷Ngelozi yo khata yi to veta mpundu wa yona: Konako ku to wa maralala ni mndilo, si di patanisilwe ni mnoha: Ku to hya didhawa da wuraru da mafu, kuhya didhawa da wuraru da mindonga, ku to hya mwasi wotshe wo hanya.

⁸Se ngelozi ya wumbidi ni yona yi to veta mpundu wa yona. Se txilotxo txo nga mmango wo tura, txi to vinzwa lineneni. Se didhawa da wuraru da linene di to hinduka di maha mnoha;

⁹Ku to fa didhawa da wuraru da sivangwa si si hanyako lineneni; ni didhawa da wuraru da sitimela sa mati si to loviswa.

¹⁰Se ngelozi ya wuraru yi to veta mpundu wa yona. Se ku txi wa ngu nzumani nyeleti ya hombe, yi txi tura nga msanje: Yi txi wela txitimwi ka didhawa da wuraru da minambo ni sisima.

¹¹ Ditina da nyeleti i ti “Muheso” se didhawa da wuraru da mati di to hinduka di maha muheso, se vathu vavangi va to fa ngu mhaka ya mati ma nga ti hindukile me bava.

¹²Se ngelozi ya wunene yi to veta mpundu wa yona. Ku to hokelwa didhawa da wuraru da ditambo, didhawa da wuraru da mtxima, ni didhawa da wuraru da tinyeleti, ahawa koza didhawa da wuraru da sona di phumiswa; se mitshikari wu to luza didhawa da wuraru da kuwonekela ka wona, kufana ni wusiku ni wona.

¹³Se konako ni to wona ni kuengisa ngungwa yi nga ti puruma txitimwi ha mpfhukani, yi kwangula ngu dipswi da hombe, yi txi: “Dikhombo, Dikhombo! Dikhombo ka vale va nga aka ha mafuni, mbimo yi yi no vetwa mipundu ya tingelozi ta tiraru ti ku ngadi ti txi na veta!”