Read chopi Rute 3 Bible Online

Rute 3 - chopi bible

Rute 3

¹Se masale wa kona Nowemi a to khene: “Mwanangu, ina kha ti laveki ti to ni txi ku lavela wukhalo wo humula ka wona, kasiku u txi zumbiseka kani?

²Ina Bhowazi wule u nga ti ti ni mahorana akwe, hi nga dixaka dathu kani? Wona taku, a na ya hula sevhadha ha didhandoni kwakwe wusiku wuwa.

³Ngu mhaka yeto, samba, u txi tola mafura, u txi ambala simaha sako, u relela didhandoni, aniko u nga ti zivekise ka wamwamna, kala kuza a txi gwita kudya ni kusela.

⁴Se mbimo yi a no tsula kuya otela, u na wonisisa wukhalo wule a no otela ka wona; sekoko wulela, u txi vhunungula mikondo yakwe, u otela konaho, se ene a na kugela ati u fanelako ku ti maha.”

⁵Se Rute a to mxamula a txi khene: “Ni na maha totshe ti u ni gelako.”

⁶Sekoko Rute a to relela eya didhandoni, eya maha madingano ni totshe ti masale wakwe a nga mleletisa tona.

⁷Bhowazi ngako a di dyite ni kusela, na mbilu yakwe yi di tsakile, a to ya otela hafuhi ni mmumbu wa sevhadha; sekoko Rute a to ta ngu kunyanimela, a txi ya vhunungula didhamba ngu mikondoni ka Bhowazi, a txi otela.

⁸Se ku to maheka taku ngu hagari ka wusiku, wamwamna wule a to dhuka, a txi wuka ngu kuthava; se e wona wamsikati a di otete minengeni kwakwe.

⁹Se ene a to khene: “Ngawe mani kani?” Se Rute a to khene: Ngani Rute, txithumi txako; fenengeta txithumi txako koko ngu didhamba dako, nguko awe u mtiruli.

¹⁰Se ene a to khene: “MKOMA a na ku katekise, mwanangu; u mahile kha kwati wunene wuwa wako wo gwitisa, kupinda wo khata, nguko khwa lava kulondeta dizambi ni da dimwedo, da nyatithombe mwendo da txisiwana.

¹¹Se konkuwa, mwanangu, u nga thave; ni na ku mahela totshe ti u nga ti womba, nguko vathu votshe va didhoropa dangu, va tiziva ti to u wamsikati wamnene.

¹² Kambe konkuwa, ditshuri ngutu ati to ani ni mtiruli, aniko aho mmwani mtiruli wa hafuhi ngutu kupinda ani.

¹³Zumba hawa wusiku wuwa, se mangwana ni mixo, ngako ene a txi kutirula, ndinene, ene a na kutirule; aniko ngako asi ti lavi ku kutirula, MKOMA a hanyako, ani ni na kutirula! Otela hawa, kala mangwana.”

¹⁴Rute a to otela koko mikondoni ka Bhowazi, kala ni mixo; se a to wuka va sanzi kuzivana, nguko Bhowazi a ti ti khene: “Ti nga zivaneke taku wamsikati wokari a tile ha didhandoni.”

¹⁵A to khene kambe: “Tisa nguwo yi u nga fenengela u txi yi ñoleta.” Se ene a to yi ñoleta, se Bhowazi a to pima mtxhanu wa tipimo ni wumwewo ya sevhadha, se a txi mrweka; sekoko a to wulela didhoropani.

¹⁶Se Rute a to hoka ka masale wakwe, wule a nga khene: “Ti mahisile kutxani kani mwanangu?” Se Rute a to xawutela totshe ti wule wamwamna a nga mmahela.

¹⁷A to khene kambe: “Sevhadha yiya ya mtxhanu wa tipimo ni wumwewo, ngene a nga ni ninga, a txi khene: U nga tshumele u txi ya ka masale wako, u si nga ni txilo.”

¹⁸Sekoko Nowemi a to khene: “Thutha mwanangu, kala kuza u ziva ti yi no gwitisa tona mhaka; nguko awuwa wamwamna kha na mbi humula, kala kuza nyamsi a txi heta mhaka yiya.”