Read chopi 1 Samuwele 11 Bible Online

1 Samuwele 11 - chopi bible

1 Samuwele 11

¹Sekoko Nahasi Muamoni a to kwelela, eya randela didhoropa da Jabhesi-Giliyadhi, se vathu votshe va Jabhesi va to gela Nahasi, va txi kha vona: “Maha txitumelelano ni nathu, aniko athu hi na kuthumela.”

²Aniko Nahasi Muamoni a to va gela tiya: Ni na maha txitumelelano ni nanu, ka zumbelo yiya: Ngako mi txi mmweyo ni mmweyo kwanu e xokola diso da txinene, ngu kumaha keto ni veka etxo txiruko txitimwi ka votshe va ka Israyeli.

³Sekoko madhota a Jabhesi ma to m'gela ku kha ona: Hi ninge mtxhanu wa masiku ni mambidi, kasiku hi rumela mitumi ka yotshe mihingano ya ka Israyeli, se ngako ku si maneki wu hi txhatxhisa, hi na ti ningela kwako.

⁴Se mbimo yile mitumi yi nga hoka Gibheya ka Sawule, yi to gela vathu mapswi awa. Sekoko vathu votshe va to kwangula, ve dila.

⁵Ka mbimo yoneyo Sawule a ti wuya ngu thembweni, ngu msana ka tihomu; se a txi khene: Ku to maheka txani aku vathu va dilako kani? Se va to mtxhamusela mapswi a vathu va Jabhesi.

⁶Sekoko mbimo yile Sawule a nga pfa timhaka eto, Moya wa Txizimu wu to wulela kwakwe, se kuhenya kwakwe ku to tura ngutu.

⁷Se a to teka tihomu timbidi e daya, e wilela ngu sihango, e si rumela ka dotshe ditiko da ka Israyeli ngu manza a mitumi, a txi khene: Ni wuhi wule a no mbi huma e londeta Sawule ni Samuwele, tihomu takwe ti na mahwa tonatiya. Sekoko kuthava MKOMA kutota txitimwi ka vathu, ve huma votshe ngu mbilu yimweyo.

⁸Sawule a to va bala kona Bhezeki, se kumaneka 300.000 wa vanana va ka Israyeli; ni 30.000 wa vavamna va ka Judha.

⁹Sekoko va to kha vona ka mitumi yile yi nga ta: Gelani vathu va Jebhesi-Gileyadhi, mi txi khanu: Mangwana ni mitshikari, ku nata kutxhatxhiswa kwanu. Yi to ta koko mitumi, yi ta zivisa ka vathu Jebhesi, aniko vona va to tsaka.

¹⁰Se vathu va Jabhesi va to kha vona ka va ka Amoni: Mangwana, hi na huma hi ta ti ningela kwanu, sekoko mi na maha ngu ngathu totshe ti mi ti wonako.

¹¹Se ku to maheka tito, magwanani ka kona, Sawule a to abanisa vathu ngu mitxawa yiraru, aniko veya wulela wugoveloni ni mabimbi-kutxa, kambe va to xasela va ka Amoni kala ni mitshikari. Se avale va nga sala va to hangalaka mmweyo no mmweyo eya ka wukhalo wakwe.

¹²Sekoko vathu va to kha vona ka Samuwele: I mani wule a nga ti ti khene Sawule kha na mbi fuma txitimwi kwathu kani? Hi ningeni vathuvo hi va daya.

¹³Aniko Sawule a to khene: Nyamsi, kha ku na mbi dawa m'thu ni wammweyo, nguko nyamsi MKOMA a hulukisile Israyeli.

¹⁴Se Samuwele a to khene ka vathu: Ngonani, hi tsimbileni Giligali hi ya wuseta kona mfumo.

¹⁵Se vathu votshe va to khukha veya Giligali, veya simeka Sawule ku va mfumeli masoni ka MKOMA kona Giligali, kambe va to ningela mningelo wa kudikha masoni ka MKOMA; Sawule ni votshe vavamna va ka Israyeli va to tsaka ngutu koneyo.