Read chopi 1 Samuwele 13 Bible Online

1 Samuwele 13 - chopi bible

1 Samuwele 13

¹Sawule a ti ti ni dilembe dimwedo da kufuma kwakwe, se ka dilembe da wumbidi a to fuma txitimwi ka Israyeli.

²Sekoko Sawule a to ti sawulela 3.000 wa vavamna va ka Israyeli; se 2.000 wawe a ti ti navo kona Mikimaxi ni mmangoni ka Bheteli, se 1.000 wa vona va ti ti ni Jonata kona Gibheya ka Bhenjamini; kambe votshe vathu vale va nga sala a to va tshumeta, mmweyo ni mmweyo eya m'tini kwakwe.

³Se Jonatani a to xasela vawoneleli va Vafilista vale va nga ti ti Gibheya, eto Vafilista va nga tiziva; ngu kumaha keto, Sawule a to veta mpundu ka dotshe ditiko, a txi khene: Engisani anu Vahebheru.

⁴Sekoko votshe va ka Israyeli va to pfa to khene: Sauwle a date vawoneleli va Vafilista, ni ku va ka Israyeli va ti mahile txinyenyeko ka Vafilista. Sekoko vathu va to rambwa kuya ka Sawule, kona Giligali.

⁵Se Vafilista va to sengeletana kasi kulwa ni Israyeli. Va ti ti ni 3.000 wa sikotxikani, ni 6.000 wa vagadhi va mahantxhi, ni vathu votala ku nga mtxhefa wa mambambe ka linene; kambe va to kwelela veya gova Mikimaxi, ngu didhawa da wutxani ka Bheti-Avheni.

⁶Va di ti woni koko vavamna va ka Israyeli to va xomuloni (nguko vathu va ti ti kamekile), vathu va to barama amu ka tiphako, ni amu ka mipa, ni hagari ka marigwi, ni amu ka sisima, ni maphalani,

⁷se Vahebheru va to txhatuka Jordhani veya ditikoni da Gadhi ni Gileyadhi; se Sawule a di ngadi Giligali, vathu votshe va to mlondeta na va txi dhudhumela.

⁸ A to rinzela mtxhanu wa masiku ni mambidi, kala ka mbimo yile Samuwele a nga yi womba; kambe Samuwele kha ya tsula Galigali, vathu va to hangalaka ve khukha ka Sawule.

⁹Sekoko Sawule a to khene: Ni neheleni mphaxo wo hiswa ni miningelo ya kudikha. Se a to ningela mphaxo wo hiswa.

¹⁰Se ku to maheka taku, a di hetile kuningela mphaxo wo hiswa, Samuwele a to hoka; se Sawule a to huma e mu hingeta kasi kuya mlosa.

¹¹Sekoko Samuwele a to khene: U mahile txani kani? Sawule a to khene: Ni di woni ti to vathu va khata ku hangalakela, ni ti to awe khu bwaki mndani ka masiku ale hi nga langana, ni ku Vafilista va sengeletani kona Mikimaxi,

¹²ni to khani: Konkuwa Vafilista va na kwetima ve ta lwa ni nani kheno Giligali, kambe kha ni se kombela masoni ka MKOMA: Se ni ti kurumetile ni ningela mningelo wo hiswa.

¹³Sekoko Samuwele a to khene ka Sawule: U mahile wuphukuphuku! Kambe khu ya xayisa mlayo wule MKOMA, Txizimu txako txi nga kuleleta wona. Nguko konkuwa MKOMA a di na tsanisa mfumo wako txitimwi ka Israyeli kala kupinduka.

¹⁴ Kambe konkuwa mfumo wako kha wu na mbi ya masoni; MKOMA a ti lavete m'thu mmwani awu a tsakisako mbilu yakwe. MKOMA a m'vekile ku va mthangeli txitimwi ka vathu vakwe, nguko khwa xayisa a ti MKOMA a nga kuleleta.

¹⁵Sekoko Samuwele a to khukha Giligali e kwelela eya Gibheya ka Bhenjamini; se Sawule a to bala vathu vale a nga ti navo, e mana vo dingana 600 wa vavamna.

¹⁶Se Sawule ni mwanakwe Jonatani, ni vathu vale va nga ti navo va to zumba Gibheya ka Bhenjamini; kambe Vafilista va to ya gova kona Mikimaxi.

¹⁷Se vaxaseli va to huma ngu wugoveloni ka Vafilista, i di mitxawa yiraru; wumwewo wa mitxawa wu to tshumela ngu nzila ya Ofira, ka ditiko da Sawule;

¹⁸kambe wumwani mtxawa wu to tshumela ngu nzila ya Bheti-Horoni; se wumwani mtxawa wu to tshumela ngu nzila ya mhingano wule wu nga wonetelana ni mkova wa Zebhoyini, ngu didhawa da txiwulani.

¹⁹Ku si nga ni mtshuli ni wammweyo ka dotshe ditiko da ka Israyeli, nguko Vafilista va ti ti wombile ku kha vona: Vahebheru va nga tshuli ditxhari mwendo lingove.

²⁰Ngu konaho votshe va ka Israyeli va ti ti ngirimela ka Vafilista kuya lotelwa tibhera tawe, ni misuka yawe, ni matxhapu awe, ni masikela awe.

²¹Aniko va ti ti ni titupa to lota ngu tona masikela awe, ni misuka yawe, ni tifoloko ta makwasa mararu, ni matxhapu, ni mindombo.

²²Se ku to maheka taku, ngu ditshiku da kulwa, kha kwa maneka ditxhari ni da dimwedo, hambi lingove manzani ka votshe vathu va va nga ti ti ni Sawule ni Jonatani; kambe ma to maneka ka Sawule ni mwanana wakwe Jonatani, dwe.

²³Se ku to huma vawoneleli va Vafilista veya zumba ka nzila ya Mikimaxi.