Read chopi 1 Samuwele 14 Bible Online

1 Samuwele 14 - chopi bible

1 Samuwele 14

¹Se ku to maheka, koko, taku ka ditshiku dimwani Jonatani mwana Sawule, a to gela mfana wule a nga ti ti mrwalela matxhari, a txi khene: Ngono, hi tsula ka vawoneleli va Vafilista, vaku ngu didhawa da kheya. Kambe Jonatani kha gela tate wakwe.

²Se Sawule a ti ti mhinganoni ka Gibheya, hahatshi ka mndonga wa mromani wu nga ti ti Migroni; se vathu vale a nga ti navo i ti vo dingana 600 wa vavamna.

³Kambe Ayiyasi, mwana Ayitubhe, mwanawe wa Ikabho, mwana Finiyasi, mwana Eli, mphaxeli wa MKOMA kona Silo, a ti ti ambate efodhe; kambe vathu va si tiziva taku Jonatani a ti ti tsute.

⁴Se hagari ka tinzila ti Jonatani a nga ti tshawunyeta ngu tona eya ka vawoneleli va Vafilista, ku ti ti ni marigwi mambidi o lapha ma ku ni tshoka, dimwedo ka didhawa da kheno ni dimwani ka didhawa da kheya; ditina da dimwedo i ti ti Bhozezi; se ditina da dimwani i ti ti Sene.

⁵Dirigwi dimwedo da wuphemba di ti ti ngu masoni ka Mikimaxi, se dimwani da wulambwe, di ti ti ngu masoni ka Gibheya.

⁶Jonatani koko, a to khene ka mfana wule a nga ti mrwalela matxhari: Ngono, hi tsimbile ka vawoneleli va va makhuna; kutilava MKOMA a na hi lwela, nguko ka MKOMA kha txi ngaho txi a tandekako ku txi hulukisa, hambi i di vavangi mwendo vavadotho.

⁷Sekoko mrwali wa matxhari akwe a to m'gela ku khene: Maha totshe ti ti ku mbiluni kwako; tsimbila kotshe madingano ni mbilu yako, ani ni ni nawe.

⁸Jonatani koko, a to khene: Wona taku hi na tsula ka vavamna vale, hi ya ti wonekisa kwawe.

⁹Se ngako va txo hi gela ku kha vona: Emani kala kuza hi ta kwanu; sekoko hi na ema ka wukhalo wathu, hi si tshuketi hafuhi kwawe.

¹⁰Kambe ngako va txi kha vona: Kwelelani mi ta kwathu; sekoko hi na kwelela, nguko MKOMA a na va a di va ningete manzani kwathu; se etxo txi na va txikombiso kwathu.

¹¹Ngu wumbidi wawe va to ti kombekisa ka vawoneleli va Vafilista, se Vafilista va to kha vona: Wonani taku Vahebheru va humile ngu maphalani mule va nga ti baramile kona.

¹²Se vavamna vale vawoneleli va to xamula ka Jonatani ni ka mrwali wa matxhari akwe, va txi kha vona: Kwelelani mi ta kwathu! Aniko athu hi nata mi gondisa. Se Jonatani a to khene ka mrwali wa matxhari akwe: Kwelela u ni londeta ngu msana, nguko MKOMA a va ningete manzani ka Israyeli.

¹³Sekoko Jonatani a to kwelela ngu mikondo yakwe ni manza akwe, kambe mrwali wa matxhari akwe e mu londisa ngu msana; se va to wa masoni ka Jonatani, se mrwali wakwe wa matxhari e va daya ngu msana kwakwe.

¹⁴Se kumaheka kuxula kuwa ko khata, Jonatani ni mrwali wa matxhari akwe va date vavamna va magumi mambidi, ka wukhalonyana wu dingana hafu ya txikwele txa thembwe, txo txi nga dimwa ngu tihomu timbidi.

¹⁵Se ku to va ni kuthava wugoveloni, txitingani ni ka votshe vathu; vawoneleli ni vona ni vaxaseli va to dhudhumela, a ha koza ni ditiko di zinginika, nguko i ti ti kuthava kutako ngu ka Txizimu.

¹⁶Vawoneleli va Sawule koko, vale va nga ti Gibheya ka Bhenjamini, va to wona vathu va txi thekela ngu kututuma, na va txi gumulana.

¹⁷Sekoko Sawule a to khene ka vathu vale a nga ti navo: Balani vathu hi na wona to, i mani a nga khukha hagari kwathu. Se va to bala, se ve wona to hambi Jonatani ni mrwali wa matxhari akwe va ti si ngaho.

¹⁸Sekoko Sawule a to khene ka Ayiyasi: Tisa dibhokiso da Txizimu hawa. (Nguko ka ditshiku dile, dibhokiso da Txizimu di ti ni vanana va ka Israyeli).

¹⁹Se ku to maheka tito, ngako Sawule a txi ngadi e womba-womba ni mphaxeli, kuthava kule ku nga ti wugoveloni ka Vafilista ku to kula ngutu, kuanda, se Sawule a je khene ka mphaxeli: Thavisa dianza dako!

²⁰Sekoko Sawule kumweko ni votshe vathu vale a nga ti navo, va to sengeletana, veya kulwani; wona taku ditxhari da mmweyo di ti ti thola mmwani, se ku to maneka pfilu-pfilu ya hombe ngutu.

²¹Kambe hagari ka Vafilista ku ti ti ni Vahebheru, kufana ni kukhatani, avale va nga kwelela navo veya randela wugovelo; se ni vona vava va to ti pata ni va ka Israyeli, vale va nga ti ti ni Sawule ni Jonatani.

²²Va di tipfite koko, votshe vathu va ka Israyeli vale va nga ti baramile ka mmango wa Efrayime, ti taku Vafilista va tutumile, ni vona va to va tutumisa ve yalwa navo.

²³Ka ditshiku donedo MKOMA a to hulukisa Israyeli; se wugovelo wu to hoka Bheti-Avheni.

²⁴Se ka ditshiku dile vathu va ka Israyeli va ti rerekile ngutu, nguko Sawule a ti xambanyile ka vathu, a txi khene: Dikhombo ka m'thu wule a no dya dipawu kala ni minova, kasiku ni ti photela ka valala vangu. Se vathu votshe va to leka kudya dipawu.

²⁵Se votshe vathu va to wulela txitingani; mule ku nga ti ni wulombe hahatshi.

²⁶Se ngako vathu va di hokile txitingani va to wona kujomba ka wulombe; hambi keto, ni wammweyo kha yisa dianza dakwe ha txisofu, nguko vathu va ti thava txixambanyo.

²⁷Kambe Jonatani kha tipfa mbimo yile tate wakwe a nga xambanya ka vathu, se a to nawuluta tshoka ya donga yile a nga ti nayo manzani, e yi nakanisa ngu amu ka dihesa da wulombe; se a txi wuletisa diwoko mkanani, maso akwe ma to tuleka.

²⁸Sekoko mmweyo ka vathu a to xamula a txi khene: Tate wako a xambanyile ka vathu, a txi khene: Dikhombo ka m'thu wule a no dya dipawu nyamsi. Nguko vathu va ti ti gumile mtamo.

²⁹Sekoko Jonatani a to khene: Tate wangu wa nemetisa vathu, wonani, maso angu ma tulekile ngu kule ni nga danzanyana wulombe wuwa.

³⁰I ti tshuko i ti ku vathu nyamsi ngu kutxhatxheka vadyite so handwa si va nga si mana ka valala vawe. Aniko konkuwa kuxaselwa ka Vafilista kha ka maha ka hombe.

³¹Kambe ka ditshiku donedo va to xasela Vafilista, kukhukhela Mikimaxi kala Ayijaloni; se vathu va ti gumile mtamo ngutu.

³²Sekoko vathu va to tutumela kuya handa, ve teka tinvuta, ni tihomu, ni marole, se ve si daya hahatshi, ve dya ni mnoha wa sona.

³³ Se va to zivisa Sawule va txi kha vona: Wona taku vathu va onhela MKOMA, ngu kudya nyama ni mnoha wa yona. Se ene a to khene: Mi onhile ngutu; wumbulutani dirigwi da hombe nyamsi di ta hawa kwangu.

³⁴Sawule a to khene kambe: Hangalakani hagari ka vathu, mi va gela tiya: Mmweyo ni mmweyo a na tise homu yakwe, ni nvuta yakwe, mi ta daya hawa, midya, aniko mi nga onheleni MKOMA ngu kudya nyama ni mnoha wa yona. Sekoko vathu votshe va to tisa ni wusiku, mmweyo ni mmweyo ngu dianza dakwe, homu yakwe, ve ta daya koneho.

³⁵Sekoko Sawule a to akela MKOMA txiluvelo; atxiya njiluvelo txo khata txi a nga akela MKOMA.

³⁶Msana keto, Sawule a to khene: A hi releleni hi londeta Vafilista ni wusiku, hi ya va handa kala kuza ditxitxa, kambe hi nga siyeni m'thu ni wammweyo kwawe. Se va to kha vona: Maha ti u ti wonako i di ta tinene masoni kwako. Kambe mphaxeli a to khene: A hi tshuketeni ahawa ka Txizimu.

³⁷Sekoko Sawule a to wotisa ka Txizimu a txi khene: Ina ni nga relela ni londeta Vafilista kani? Ina u na va ningela manzani ka va ka Israyeli kani? Aniko ka ditshiku dile Txizimu kha txa mxamula.

³⁸Sekoko Sawule a to khene: Tshuketani kheno, motshenu vathangeli va vathu, xolisisani mi wona to txionho muni txi nga mahwa nyamsi.

³⁹Nguko ni xambanya ngu MKOMA, a hulukisako Israyeli, ti to hambi ngako mnandu wu di ka mwanana wangu Jonatani, kha ditshuri a na fa. Se kha ku na ni wammweyo a nga xamula ka votshe vathu.

⁴⁰Sawule a to khene kambe ka votshe va ka Israyeli: Anu mi na va ka dimwani didhawa, se ani ni mwanana wangu Jonatani hi nava ka didhawa dimwani. Sekoko vathu va to kha vona ka Sawule: Maha ti u ti wonako i di ta tinene masoni kwako.

⁴¹Sawule koko, a to khene ka MKOMA, Txizimu txa Israyeli: Kombisa ditshuri. Sekoko Jonatani ni Sawule va to ñolwa ngu xolo, se vathu va to huluka.

⁴²Sekoko Sawule a to khene: Xaxuvani hagari kwangu ni ka mwanana wangu Jonatani. Se ku to ñolwa Jonatani.

⁴³Sekoko Sawule a to khene ka Jonatani: Ni gele ti wu nga maha. Se Jonatani a to m'gela a txi khene: Ni to danzanyana wulombe wa wudotho ngu tshoka ya donga yi ni nga ti nayo manzani; se ni fanela kufa kani?

⁴⁴Sekoko Sawule a to khene: Txizimu txi na mahe toneto ni kuengetela, nguko kha ditshuri u na fa, Jonatani.

⁴⁵Kambe vathu va to kha vona ka Sawule: Ina Jonatani a na fa, ene wule a nga maha mthumo wa hombe wo hulukisa Israyeli kani? Ti nga maheke to nga eto. Hi xambanya ngu MKOMA a hanyako, u nga thuke u wisa hahatshi msisi ni wawumwewo dwe wa ha msungo kwakwe! Nguko Jonatani a mahile eto ni Txizimu nyamsi. Ngu kumaha keto, vathu va to hulukisa Jonatani, kasiku asi fi.

⁴⁶Kambe Sawule a to leka kulondeta Vafilista, se Vafilista ve tshumelela ka wukhalo wawe.

⁴⁷Sekoko Sawule a to fuma txitimwi ka Israyeli e lwa ni votshe valala vakwe, vale va nga ti mrandete, i ku vava: Mowabhi, ni vanana va Amoni, ni Edhomi, ni vafumeli va Zobha, ni Vafilista; kotshe amu a nga ti tiya, a ti ko xula.

⁴⁸Se a to va ni mtamo ngutu, e dayela Vaamaleki, e txhatxhisa va ka Israyeli manzani ka vale va nga ti va xanisa.

⁴⁹Se vanana va Sawule va majaha i ti ti Jonatani, ni Isivhi, ni Malikisuwa; se matina a vanana vakwe vavambidi vamahorana i ti ti vava: Ditina da mkoma wa kona i ti Merabhe, se ditina da mnanda wa kona i ti Mikali.

⁵⁰Se ditina da msikati wa Sawule i ti Ayinowami, mwana Ayimahasi; kambe ditina da mthangeli wa dibutho da yimbi i ti Abhineri, mwana Neri, tatanyani wa Sawule.

⁵¹Se Kisi tate wa Sawule, ni Neri tate wa Abhineri, i ti ti vanana va Abhiyeli.

⁵²Se ku to maneka yimbi ya hombe yo wukela Vafilista, ka otshe masiku a kuhanya ka Sawule. Ngu kumaha keto, votshe vavamna va tindena ni mtamo, avale Sawule a nga va wona a to va teka ve maha vakwe.