Read chopi 1 Samuwele 15 Bible Online

1 Samuwele 15 - chopi bible

1 Samuwele 15

¹ Sekoko Samuwele a to khene ka Sawule: MKOMA a ni rumile ku ta kutota kuva mfumeli txitimwi ka vathu vakwe, i ku va ka Israyeli; Konkuwa koko, engisa dipswi da mahungu a MKOMA.

² MKOMA wa Mabutho a Tiyimbi a womba tiya: Ani ni alakanyile ti Vaamaleki va nga mahela va ka Israyeli; taku vatsivela nzila mbimo yi va nga ti huma ngu Egipta.

³Tsula koko, konkuwa, u ya xasela Vaamaleki, u onhetela sotshe si va ku naso, u nga vatsetse; aniko u na daya vavamna ni vavasikati, vafana ni vanana va ha tshumbuni, tihomu ni tinvuta, makamelu ni timbongola.

⁴Se Sawule a to dhana vathu e ta va bala kona Telayimi: I ti ti 200.000 wa vavamna vo tsimbila ngu mikondo ni 10.000 wa vavamna va ka Judha.

⁵Ngako Sawule koko, a di hokile didhoropani ka Amaleki, a to veka vabarameli mkovani.

⁶Se Sawule a to khene ka Vakeni: Tsulani, khukhani, mi huma hagari ka Vaamaleki, kasiku mi si xaselwi kumweko navo, nguko anu mi kombisile wumbilu ka votshe vanana va ka Israyeli, mbimo yile va nga ti wuya ngu Egipta. Ngu kumaha keto, Vakeni va to khukha hagari ka Vaamaleki.

⁷Sekoko Sawule a to xula Vaamaleki, kukhukhela Havhila kala kuya hoka Suri, ku nga rendekelana ni Egipta.

⁸Se a to ñola Agage, mfumeli wa Vaamaleki; kambe votshe vathu a to va lovisa ngu ditxhari.

⁹Se Sawule ni vathu vakwe va to divalela Agage, ni tinvuta takwe ta ti nene ni tihomu takwe, tihamba, ni simwani sa lisima, kha va lava ku si lovisa do gwita; kambe sotshe simaha sa kwa mbi vhuna txilo ni sa kwa mbi na lisima va to si lovisa do gwita.

¹⁰Sekoko dipswi da MKOMA di tile ka Samuwele, di txi kha dona:

¹¹Na tilaya nguku ni nga veka Sawule e maha mfumeli; nguko a lekile kulondeta sileleto sangu, kambe kha xayisa mapswi angu. Sekoko Samuwele a to henya, e dila ka MKOMA wusiku wotshe.

¹²Se Samuwele a to vindukela ni mixo e hingeta Sawule; se ku to ziviswa ka Samuwele va txi kha vona: Konkuwa Sawule a hokile Karmeli, kambe wona taku a ti emisete phande. Sekoko a to horoloka e pinda e relela Giligali.

¹³A to ta koko, Samuwele ka Sawule; se Sawule a txi khene kwakwe: Mana kukatekiswa awe ngu MKOMA, ni mahile dipswi da MKOMA.

¹⁴Sekoko Samuwele a to khene: Diguwa da txani koko, da tinvuta di di pfalako tinzeveni kwangu, ni kubhoma ka tihomu ta mikati ni kupfako kani?

¹⁵Se Sawule a to khene: Va ti tekile ka Vaamaleki; nguko vathu va tekile tinvuta ni tihomu ta mikati totshura, kasiku ta maha mningelo ka MKOMA, Txizimu txako; kambe simwani hi haxulete si txi bhi.

¹⁶Sekoko Samuwele a to khene ka Sawule: Ema, ni na kugela ti MKOMA a nga ni gela wusiku wuwa. Se ene a to m'gela ku khene: Womba!

¹⁷Se Samuwele a to khene: Hambi ku awe u ku m'dotho kuwonani kwako, khwa vekwa kuva mthangeli ka tihunzu ta ka Israyeli kani? Kambe MKOMA a ku totile kuva mfumeli txitimwi ka Israyeli.

¹⁸MKOMA a kurumete ka nzila yiya, a txi khene: Tsula, u ya xasela vaonhi vava Vaamaleki, va txi bhi, u lwa navo kala kuza u vaheta.

¹⁹Ngu kutxani koko, u nga mbi engisa dispwi da MKOMA kani? Kambe wu to tutumela kuhanda u maha to biha masoni ka MKOMA.

²⁰Sekoko Sawule a to khene ka Samuwele: Ani ni enigisile dipswi da MKOMA, kambe ni tsimbila ngu nzila yile MKOMA a nga ni ruma ka yona; ni tisile Agage, mfumeli wa Vaamaleki, aniko Vaamaleki ni va lovisile va txi bhi.

²¹Kambe vathu va handile tinvuta ni tihomu ta mikati, ni simwani sa lisima ka sile so nyenyeka, kasi kuya si ningela ka MKOMA, Txizimu txako, kona Giligali.

²²Kambe Samuwele a to khene: Ina MKOMA a tsakiswa ngu miningelo ya kuhiswa ni miphaxo, kupinda kuengisa dipswi da MKOMA kani? Wonani taku kuengisa kutshuko kupinda mphaxo; ni kupfisisa kutshuko kupinda mafura a tihamba.

²³Nguko kutitsimba kufana ni txionho txa wuloyi, ni kutikulisa kufana ni wubihi ni kukhozela sifananiso. Nga kule awe u nga lamba dipswi da MKOMA, nene a ku lambile, kasi ku u si mahi mfumeli.

²⁴Sekoko Sawule a to khene ka Samuwele: Ni onhile, nguko ni ndakile sileleto sa MKOMA ni mapswi akwe; nguko ni to thava vathu ni engisa dipswi dawe.

²⁵Konkuwa koko, na ku kombela, divalela txionha txangu, hi tshumela hotshe ni ya khozela MKOMA.

²⁶Kambe Samuwele a to khene ka Sawule: Kha ni na mbi tshumela ni nawe; nga kule u nga lamba dipswi da MKOMA, nene MKOMA a ku lambile, kasiku u si mahi mfumeli txitimwi ka Israyeli.

²⁷Se mbimo yile Samuwele a nga tshembereka a txi lava kutsula, Sawule a to mñola ngu txyambalo txawe se txi vharuka.

²⁸Sekoko Samuwele a to m'gela ku khene: Nyamsi MKOMA a vharute mfumo wa ka Israyeli manzani kwako, se wu ningela ka mwakelani wako, wa tshuko kupinda awe.

²⁹Kambe awule i ku Mtamo wa va ka Israyeli kha hembi mwendo kutilaya; nguko hi nga m'thu waku a na tilaya.

³⁰Sekoko Sawule a to khene: Ni onhile! Kambe konkuwa ni ninge lisima masoni ka vathangeli va vathu vangu ni masoni ka va ka Israyeli, u tshumela ni nani kasiku ni ya khozela MKOMA Txizimu txako.

³¹Sekoko Samuwele a to tumela kutsula ni Sawule, se Sawule a to khozela MKOMA.

³²Sekoko Samuwele a to khene: Tisani Agage ahawa, mfumeli wa Vaamaleki. Se Agage a toya kwakwe a di tsakile; se a txi khene: Kha ditshuri kupandiseka ka lifo kupindile.

³³Aniko Samuwele a to khene: Kufana ni kule ditxhari dako di nga dayela vanana va vavasikati, ngu kumaha keto mwamwako nene a na dawa mwanana wakwe kufana ni vona. Sekoko Samuwele a to gangela Agage masoni ka MKOMA, kona Giligali.

³⁴Sekoko Samuwele a to tsula Rama; kambe Sawule a to kwelela eya m'tini kwakwe, kona Gibheya ka Sawule.

³⁵Se Samuwele kha swa kambe a txi wonana ni Sawule kala ka ditshiku da kufa kwawe; nguko Samuwele a ti ti ni wumbilu ni Sawule. Se MKOMA a to tilaya ngu kule a nga veka Sawule kuva mfumeli txitimwi ka va ka Israyeli.