Read chopi 1 Samuwele 17 Bible Online

1 Samuwele 17 - chopi bible

1 Samuwele 17

¹Se Vafilista va to sengeleta mabutho awe kasi ku yalwa, va to ya sengeletana kona Soko, i ku ditiko da ka Judha, kambe veya gova ngu hagari ka Soko ni Azeka, m'hinganoni ka Dhamini.

²Kambe Sawule ni vavamna va ka Israyeli va to sengeletana, veya gova ka mkova wa Mkusuni, se ve ti lulamisela kulwa ni Vafilista.

³Se Vafilista va ti zumbile mmangoni, ngu didhawa dimwani, kambe va ka Israyeli va ti ka wumwani mmango ngu dimwani didhawa; se mkova wu ti ngu hagari kwawe.

⁴Sekoko ku to huma wamwamna wa ndena ngu digoveloni ka Vafilista, wule ditina dakwe i nga ti ti Goliya, wa Gati, a nga ti ni mtxhanu wa mikono ni wumwewo kulapha ni dianza dimwedo.

⁵A ti ambate txigoko txa msuku ha msungo kwakwe, ni txikatawu txa magwagwarimba, se kunemela ka txikatawu i ti ti ka 5.000 wa maxekele a msuku.

⁶A ti ti ni sivhikelo sa msuku txitimwi ka mikondo yakwe, ni txivhikelo txa msuku makatani kwakwe.

⁷Se ndonga ya ditxhari dakwe yi ti ti fana ni phande ya mluki, se simbi ya ditxhari dakwe i ti ti ni kunemela ka 600 wa maxekele a simbi; kambe masoni kwakwe ku ti thangela mrwali wa sivhikelo.

⁸Se Goliya a to ema, e huwelela ka mabutho a Israyeli, a txi khene: Mi humela txani mi di xomile yimbi kani? Ina ani kha ni nga Mufilista, se anu, kha mi nga sithumi sa Sawule kani? Sawulani hagari kwanu wamwamna wu a no relela e ta kwangu.

⁹Ngako ene a txo ta lwa ni nani e ni daya, hi na maha sithumi sanu; kambe, ngako ani ni txo ta mxula ni m'daya, mi na maha sithumi sathu, mi na hi thumela.

¹⁰Ato khene kambe Mufilista: Nyamsi na phikizana ni mabutho a ka Israyeli, ni txi khani: Ni ningeni wamwamna, kasiku hi talwa ngu wumbidi wathu.

¹¹Sekoko ngako Sawule ni votshe va ka Israyeli va di pfite mapswi a Mufilista, va to xamala ni kuthava ngutu.

¹²Se Dhavhidha i ti ti mwanana wa wamwamna wokari wa Efrata, ka Bhetlehema wa Judha, awu ditina dakwe i nga ti ti Jese, a nga ti ti ni mtxhanu wa vanana ni vararu; se ka masiku a Sawule wamwamna wuwa a ti kumbile, i ti wa tanga ya hombe hagari ka vathu.

¹³Se vanana vararu va hombe va majaha va Jese, va to tsula ni Sawule yimbini; matina awe i Eliyabhe, matiwula akwe, se wa wumbidi i Abhinadhabhi, ni wa wuraru i Sama.

¹⁴Dhavhidha i ti mnanda ka vona, se vakomwakwe va vararu va to londeta Sawule.

¹⁵Kambe Dhavhidha a ti tiya ka Sawule, a txi tshumela e wuya Bhetlehema ku ta dyisa tinvuta ta tate wakwe.

¹⁶Sekoko mnadani ka mune wa magumi a masiku, Mufilista koko, a to tikombisa mixo ni minova.

¹⁷Se Jese a to khene ka mwanakwe Dhavhidha: Na ku kombela, teka efa yiya ya mafaka o yokwa, ni simbwanda siya sa digumi, wu tutuma wu heleketa ka vakomwako wugoveloni.

¹⁸Aniko teka digumi da magadi a masi u ya ninga mthangeli wa mabutho, kambe u naya txisela vakomwako, u xola taku mwendo va hanya kha kwati; se u na ya wuya ni txi tsaniso txa kona.

¹⁹Se a ti tiho Sawule kumweko navo, ni votshe vavamna va ka Israyeli mkovani ka Mkusuni, va txi lwa ni Vafilista.

²⁰Sekoko Dhavhidha a to wuka ni mixo ngutu, e siya tinvuta takwe ni mwoleleli wokari, se e teka mrwalo wakwe e tsula, madingano ni ti Jese a nga mu leletisa tona; se a to hoka ka wukhalo wa sikotxikani, mbimo yile dibutho da yimbi di nga ti ti longisela kuya kulwani, na di txi embelela tindando ta yimbi.

²¹Se va ka Israyeli ni Vafilista va to fola, va txi ema ve wonetelana.

²²Se Dhavhidha a to leka mrwalo wakwe manzani ka muwoneleli wa thundu, e tutumela kuya yimbini; se a di hokile a to wotisa vakomwakwe taku mwendo va wuka kha kwati.

²³Se a txi ngadi e womba-womba navo, a to wona wamwamna wa ndena wa dibutho da Vafilista a txi kwelela, wule ditina dakwe i nga ti ti Goliya, Mufilista wa Gati, se e womba-womba madingano ni mapswi ale, na Dhavhidha a txi tipfa.

²⁴Kambe votshe vavamna va ka Israyeli, va di woni wamwamna wule, va to tutuma va txithava ngutu,

²⁵va txi kha vona: Ina mi mwoni wamwamna wule a kwelelako kani? Se a kwelete ku ta ruketela va ka Israyeli. Ku na maheka tito, awule a no m'daya, mfumeli a na mninga thomba yayingi ngutu, e mninga ni mwanana wakwe wa dihorana, ni kumaha ti taku nyumba ya tate wakwe yi txhatxheka ko diha khupo kona Israyeli.

²⁶Sekoko Dhavhidha a to womba ka vavamna vale a nga ti ti navo, a txi khene: Mi na mmahela txani wamwamna wule a no daya Mufilista wuwa, e thavisa txiruko txitimwi ka Israyeli kani? Kasi i mani Mufilista wuwa, wa kwa mba yiswa wukwerani, wo a nga ruketela mabutho a yimbi a Txizimu txo hanya kani?

²⁷Se vathu va to engeta ve m'gela madingano ni mapswi ale, va txi kha vona: A na mahelwa tiya ni tiya wamwamna wule a no m'daya.

²⁸Se mbimo yile Eliyabhe, mkomwakwe a nga tipfa, a txi womba ka vavamna vale, a to henyela Dhavhidha, a txi khene: U tete txani hawa kani? Se u ti site ni mani tinvuta tile ta tidotho txiwulani kani? Na kuziva kha kwati kutikulisa kwako, ni wubihi wa mbilu yako, taku u tete ku ta wona kulwa ka yimbi.

²⁹Sekoko Dhavhidha a to khene: Ni to maha txani ani koko, kani? Ina kha ni faneli ku wotisa txilo kani?

³⁰Se a to khukha eya wotisa ka mmwani m'thu dipswi dile; se vathu va to tshumela ve xamula madingano ni mapswi o khata.

³¹Se va di pfite mapswi ale Dhavhidha a nga ma womba, va to ya gela Sawule, aniko a to rumela ku veya mteka.

³²Se Dhavhidha a to khene ka Sawule: Ti nga gume mtamo timbilu ngu mhaka yakwe; txithumi txako txi na tsula txi yalwa ni Mufilista wuwa.

³³Kambe Sawule a to khene ka Dhavhidha: Khu na mbi tsula u yalwa ni Mufilista wuwa; nguko u ngadi m'dotho, kambe ene mbwamwamna wa yimbi kukhukhela wuphyani kwakwe.

³⁴Sekoko Dhavhidha a to khene ka Sawule: Txithumi txako txi ti ti dyisa tinvuta ta tate wa txona; se ku txi ta ngonyamo mwendo ursu yi ta ñola nvuta ka mtxhanbi,

³⁵se ani ni ti huma ni yi tutumisa, ni yidaya, ni namuruta txifuyo mkanani ka yona; se yi txi ni wukela, ni ti ko yi ñola titshaya ni yi daya yifa.

³⁶Se txithumi txako txi ti dayiseto ngonyamo mwendo ursu; ni na mahisa toneto ka Mufilista wuwa wa kwa mbi yiswa wukwerani kufana ni tximwetxo txa sihari, ngu kule a nga ruketela mabutho a tiyimbi a Txizimu txi txi hanyako.

³⁷A to khene kambe Dhavhidha: MKOMA a ni hulukisile manzani ka ngonyamo ni ka ursu; ene a na ni hulukisa manzani ka Mufilista wuwa. Sekoko Sawule a to khene ka Dhavhidha: Tsula, MKOMA a nave ni nawe!

³⁸Se Sawule a to ambeka Dhavhidha syambalo sakwe, kambe e mu sanzeka txigoko txa msuku ha msungo, e mu ambeka ni txikatawu txa simbi.

³⁹Se Dhavhidha a to sunga ditxhari txitimwi ka syambalo sakwe e khata kutsimbila; kambe asi khali ku si duketa; sekoko Dhavhidha a to khene ka Sawule: Kha ni sikoti kutsimbila ni siya, nguko kha ni khali ku si duketa. Se Dhavhidha a to si thavisa.

⁴⁰Se a to teka ndonga yakwe manzani, eya ti sawulela mtxhanu wa marigwi txinambwanani, e ma veka amu ka mrava wa wudyisi, wu a nga ti ti nawo; e teka txibhalakaza txakwe manzani, e tshuketela ka Mufilista.

⁴¹Se Mufilista nene a to khukha e tshuketela Dhavhidha; kambe mrwali wa txivhikelo txakwe a ti thangete masoni kwakwe.

⁴²Se mbimo yi Mufilista a nga wona Dhavhidha a to mueyisa, nguko i ti ti ngadi mfana, wo tshura, wa txiemo txo khaleka.

⁴³A to khene koko, Mufilista ka Dhavhidha: Ina ani no va yimbwa, aku u ni telako ni tindonga kani? Se Mufilista a to ruketela Dhavhidha ngu sizimu sawe.

⁴⁴A to khene kambe Mufilista ka Dhavhidha: Ngono kwangu! Ni na ningela nyama yako ka sinyana sa nzumani ni ka sihari sa txitinga.

⁴⁵Kambe Dhavhidha a to khene ka Mufilista: Awe uta kwangu wu di ni ditxhari, ni mseve, ni txivhikelo; kambe ani ni ta kwako ngu ditina da MKOMA wa Mabutho a Tiyimbi, i ku Txizimu txa Mabutho a Tiyimbi a ka Israyeli, awule wu mruketelako.

⁴⁶Kona nyamsi MKOMA a na kuningela manzani kwangu; se ni na kudaya, ni wila msungo; kambe sirumbi sa wugoveloni ka Vafilista ni na si ningela kona nyamsi ka sinyana sa nzumani, ni ka sihari sa ha mafuni; aniko mafu otshe ma na ziva taku Txizimu txiho kona Israyeli.

⁴⁷Ni wotshe msengeletano wuwa wu na tiziva ti to MKOMA wa hanyisa, na i si nga ngu ditxhari mwendo mseve; nguko kulwa nga MKOMA, se ene a na mi ningela manzani kwathu.

⁴⁸Se ku to maheka taku, mbimo yile Mufilista a nga khukha e hingeta Dhavhidha, Dhavhidha a to kuluveta e tutumela ku yalwa, e tshangana ni Mufilista.

⁴⁹Se Dhavhidha a to wuletisa dianza amu ka mrava, e teka dirigwi, e di rinza ngu txibhalakaza, e faya Mufilista ha ka mbanza; se dirigwi di to nyuvela amu ka mbanza, e wa hahatshi ngu khohe yakwe.

⁵⁰Ngu kumaha keto, Dhavhidha a to xula Mufilista, ngu txibhalakaza ni dirigwi, a to faya Mufilista, se e m'daya na Dhavhidha asi nga ni ditxhari manzani.

⁵¹Ngu kumaha keto, Dhavhidha a to tutuma, eya ema txitimwi ka Mufilista, se a to teka ditxhari dakwe, e di swomola txiwununi kwakwe; se e daya Mufilista, e mwila msungo ngu dona. Se ngako Vafilista va di woni taku ndena[5] yawe yi datwe, va to tutuma.

⁵²Sekoko vavamna va ka Israyeli ni va ka Judha va to khukha, ve tsaka ngutu, ve tutumisa Vafilista kala kuya hoka mkovani ni kala kuya hoka ka sike sa Ekroni; se sirumbi sa Vafilista si to mbambamela hanzila, kukhukhela Saharayimi kala Gati ni kuya hoka Ekroni.

⁵³Sekoko vanana va ka Israyeli va to wuya ngu kututumisani ka Vafilista, veya handa magoveloni kwawe.

⁵⁴Se Dhavhidha a to teka msungo wa Mufilista a txi wu tisa Jerusalema; kambe matxhari akwe a to ma veka ditendani kwakwe.

⁵⁵Se mbimo yile Sawule a nga wona Dhavhidha a txi tsula kuya tshangana ni Mufilista, a to khene ka Abhineri, mthangeli wa dibutho da yimbi: Abhineri, mwanana wa mani mfana wuwa kani? Se Abhineri a to khene: Wu na hanye muhefemulo wako, awe mfumeli, kha ni m'zivi.

⁵⁶Sekoko mfumeli a to khene: Wotisa koko, ti to mfana wuwa i mwana mani.

⁵⁷Mbimo yile koko, Dhavhidha a nga wuya ngu kuya daya Mufilista, Abhineri a to mteka e heleketa masoni ka Sawule, a di ngadi ni msungo wa Mufilista manzani kwakwe.

⁵⁸Se Sawule a to khene kwakwe: Mfanawe, u mwana mani kani? Se Dhavhidha a to khene: Ni mwana txithumi txako Jese, wa Bhetlehema.