Read chopi 1 Samuwele 19 Bible Online

1 Samuwele 19 - chopi bible

1 Samuwele 19

¹Se Sawule a to gela Jonatani, mwanana wakwe, ni sotshe sithumi sakwe taku ve daya Dhavhidha. Kambe Jonatani, mwanana wa Sawule, a ti ti dhunda ngutu Dhavhidha.

²Se Jonatani a to gela Dhavhidha a txi khene: Tate wangu Sawule, a lava ku kudaya; ngu mhaka yeto, konkuwa ti wonele, vindukela u ya zumba ka wukhalo wo sisala, u barama kona.

³Se ani ni na huma ni ya maneka ni tate wangu hafuhi ni txitinga txi wu no va u di ka txona; aniko ani ni na womba-womba ngu ngawe ka tate wangu, kasi ku ni ziva ditshuri, se ngu msana na kuzivisa.

⁴Sekoko Jonatani a to womba-womba ni tate wakwe Sawule ngu wunene wa Dhavhidha, a txi khene: U nga onhe awe mfumeli ngu kuwukela txithumi txako Dhavhidha, nguko ni txona kha txa kuonhela, nguko mithumo ya txona njinene ngutu kwako.

⁵Nguko a ningetile wutomi wakwe e daya Vafilista, ni MKOMA a txhatxhisile votshe va ka Israyeli; awe upune wu ti woni u tsaka; ngu kutxani koko, u lava kuonha ngu kuwukela mnoha wa kwa mbi na mnandu, ngu kudaya Dhavhidha asi na txigelo kani?

⁶Kambe Sawule a to engisa dipswi da Jonatani, se e xambanya a txi khene: Ni xambanya ngu MKOMA wu a hanyako, Dhavhidha kha na mbi fa.

⁷Se Jonatani a to dhana Dhavhidha, e mtxhamusela otshe mapswi awa, aniko Jonatani a to teka Dhavhidha e tsula nayo ka Sawule; kambe eya maneka kona kufana ni kale.

⁸Se ku to tshumela kumaneka yimbi; Dhavhidha a to huma e yalwa ni Vafilista, se e va dayela ngutu; kala kuza ve tutuma masoni kwakwe.

⁹Kambe moya wo biha wo ta ngu ka MKOMA, wu to wulela kambe ka Sawule, mbimo yile ene a nga ti khalahatshile nyumbani kwakwe, a di ni mseve wakwe manzani, se Dhavhidha a ti veta txitende txakwe.

¹⁰Se Sawule a to lavetela kuthola Dhavhidha e mpata ni diseta; kambe Dhavhidha a to vhika masoni ka Sawule, se ene eya jongota diseta ngu mseve; sekoko Dhavhidha a to tutuma e huluka ka wona wusiku wule.

¹¹ Kambe Sawule a to rumela mitumi yi ya m'tini ka Dhavhidha ya kuya mwonelela, ni ku m'daya ni mixo; e yo Mikali msikati wakwe, a to zivisa Dhavhidha, a txi khene: Ngako u si hulukisi wutomi wako wusiku wuwa, mangwana va nata kudaya.

¹²Sekoko Mikali a to txhikisa Dhavhidha ngu ha ka difasitela; ene a to thava e tutuma, se e huluka.

¹³Se Mikali a to teka[6] txithombe, e txi otelisa ka mbhedhu, a to sanzeka didhowo da phongo ha msungo ka txona, se e txi fenengeta ngu didhamba.

¹⁴Se ngako Sawule a di rumete mitumi kuya ñola Dhavhidha, Mikali a to khene: Wa lwala.

¹⁵Sekoko Sawule a to ruma mitumi kuya wona Dhavhidha, a txi khene: Mneheni a di kona hambhedhuni ho, kasi ku ni ta m'daya.

¹⁶Yi di wulete koko mitumi, yi to wona txithombe ha mbhedhuni, ni didhowo da phongo ha msungo ka txona.

¹⁷Sekoko Sawule a to khene ka Mikali: Ngu kutxani u nga ni xenga, u leka mlala wangu e tutuma kani? Se Mikali a to khene ka Sawule: Nguko ene a ti khene kwangu: Ni leke ni tsula, nguko ani ni nga kudaya.

¹⁸Ngu kumaha keto Dhavhidha a to tutuma e huluka, eya ka Samuwele, kona Rama, eya m'geletela totshe tile Sawule a nga ti maha; se Dhavhidha ni Samuwele va to khukha veya zumba Nayote.

¹⁹Se va to zivisa Sawule, va txi kha vona: Wona taku Dhavhidha a Nayote, kona Rama.

²⁰Sekoko Sawule a to rumela mitumi yo londeta Dhavhidha, avale va nga wona mtxawa wa vaprofeti va txi profeta, eho a nga ti kona Samuwele a txi vathangela; se Moya wa Txizimu wu tota txitimwi ka mitumi ya Sawule, ni vona va to profeta.

²¹Se ngako Sawule a di zivisilwe eto, a to rumela yimwani mitumi, se evo ni vona va to ya profeta; sekoko Sawule a to rumela mitumi ya wuraru, avale ni vona va nga ya profeta.

²²Sekoko a to tsula apune Rama, eya hoka ka txisima txa hombe txi nga ti maneka Seko; se a di wotisile, a to khene: Va hani Samuwele ni Dhavhidha kani? Se va to m'gela ku kha vona: Wona taku va maneka Nayote, kona Rama.

²³Sekoko a to tsula Nayote, kona Rama; se Moya wa Txizimu wu to wulela kwakwe, se e tsimbila a txi profeta kala kuza e hoka Nayote, kona Rama.

²⁴ Se a to thavisa syambalo sakwe, e profeta nene masoni ka Samuwele, a to zumba ditshiku dotshe ni wusiku wotshe i di tximbwiri; nga ha ku wombwako tito: Sawule nene i mmweyo wa vaprofeti kani?