Read chopi 1 Samuwele 2 Bible Online

1 Samuwele 2 - chopi bible

1 Samuwele 2

¹ Sekoko Ana a to kombela, a txi khene: Mbilu yangu yi tsakela MKOMA, ni mtamo wangu u guletilwe ka MKOMA; Txisofu txangu txi asamile txitimwi ka valala vangu, nguko na tsaka kuhanyisani kwako.

²Kha ku na wo sawuleka kufana ni MKOMA; nguko kuwalo mmwani hahanze kwako; kha ku na dirigwi ni da dimwedo do fana ni Txizimu txathu.

³Mi nga andiseni mapswi o tikulisa, ni mapswi o ti guleta ma nga hume sisofuni kwanu; nguko MKOMA, Njizimu txa wutxhari, ene wa veka mithumo yathu ha txikaloni.

⁴Wulaho wa tindena wu funyilwe, ni vale va nga ti wisilwe va tsanisilwe ngu mtamo.

⁵Avale kale va nga ti tikhura, vathumela dipawu, aniko konkuwa avale va nga ti ni nzala va humute; hambi txifule txi velekile mtxhanu wa vanana ni vambidi, se awule a nga ti ni vanana votala a sate ekha.

⁶MKOMA ngene a thavisako wutomi, kambe ngene a ningako; wa relelisa m'thu dithithani, se e tshumela e m'humisa ka dona.

⁷MKOMA wa va nga wusiwana, kambe wa fumisa; wa veka hahatshi, kambe wa guleta.

⁸Wa humisa txisiwana amu ka dikhuma, wa guleta txikulungu madhakani, kasi ku e txi khalahatshisa hagari ka vakoma, ni kuvaninga thomba ya txikhalo txa wudhumo; nguko makhato a mafu nga MKOMA, a vekile ditiko txitimwi ka ona.

⁹A na xayisa mikondo ya va sawuleki vakwe, aniko vabihi va na maha siduma amu ka txidema; nguko m'thu kha na mbi humelela ngu mtamo wakwe.

¹⁰A va valwako ni MKOMA va na phwaraselwa; a na va dhindela a di nzumani; MKOMA a na lamula magwito a mafu, ni kuninga mtamo ka mfumeli wa ona, kambe a na guleta wukoma wa msawuleki wakwe.

¹¹Sekoko Elikana a to tshumelela m'tini kwakwe, kona Rama; aniko mfana a to sala a txi thumela MKOMA masoni ka mphaxeli Eli.

¹²Aniko vanana va Eli i ti ti vanana va wubihi, kambe va ti si zivi MKOMA;

¹³nguko txitoloveto txa vaphaxeli vale, ka vathu i ti ti txiya: Ngako wokari a txi ningela mphaxo wokari, mfana wa mphaxeli a ti tiya a di ni garfo manzani kwakwe, ya magwasa mararu, mbimo sile nyama yihalako;

¹⁴e ta thola nyama amu ka khadi, mwendo amu ka digalongo, mwendo amu ka xungwa, mwendo amu ka dibhota; se sotshe si garfo yi sikotako ku si humisa, mphaxeli a ti ko teka. Se va ti mahisa toneto ka votshe va ka Israyeli vale va nga ti ti ya kona Silo.

¹⁵Kambe na mafura ma sanzi kuhiswa, mfana wa mphaxeli a ti ti ta khene ka m'thu wule a ningelako mphaxo: Naheta nyameyo ni ya yokela mphaxeli, nguko kha na mbi amukela ngu kwako nyama yo bhikwa, hahanze ka yayimbiso.

¹⁶Se ngako m'thu a txo m'gela ku khene: Thangani ngu kuhisa mafura a nyamsi, se ngu msana u na ti tekela yi u yi navelako, sekoko, ene a ti ti mxamula, a txi khene: Ahim-him, ni ninge konkuwa; aniko, ngako wo txa lamba ni na maha ngu kuhonyola.

¹⁷Ngu kumaha keto, txionho txa majaha awa i ti ti txa hombe ngutu masoni ka MKOMA, nguko vathu va ti eyisa mningelo wa MKOMA.

¹⁸Aniko Samuwele a txi thuma masoni ka MKOMA, na i di ngadi mfana, adi ambate efodhe ya linyu.

¹⁹Se dilembe ni dilembe, mwamwakwe a ti ti mrungela syambalo sa sidotho, e ta mninga mbimo yi a tako ni mwamna wakwe ku ta maha mphaxo wa dilembe.

²⁰Se Eli a to katekisa Elikana ni msikati wakwe, a txi khene: MKOMA a na ku ninge mbewu ngu ka msikati wuwa, ngu mhaka ya txikombelo txile a nga txi maha ka MKOMA. Se va to tshumelela ka wukhalo wawe.

²¹MKOMA koko a to katekisa Ana, se e mana txirumbu e veleka vanana vararu va vafana ni vanana vambidi vamahorana; se mfana Samuwele a ti kula masoni ka MKOMA.

²²Sekoko Eli a ti ti kumbile ngutu, aniko a to pfa totshe tile vanana vakwe va nga ti maha, ka votshe va ka Israyeli, niku va otela ni vavasikati vale va nga ti sengeletana ngu mitxawa ha txikeni ka ditenda da msengeletano.

²³Se a txi khene kwawe: Mi mahela txani timhaka to nga tiya kani? Nguko na pfa ngu ka votshe vathu vava timhaka ta wubihi wanu.

²⁴Ahim-him, vana vangu! Nguko hi nga nduma ya yinene yi ni yi pfako; ma pengisa vathu va MKOMA.

²⁵Ngako m'thu a txi onhela mmwani m'thu, valamuli va na mlamula; aniko ngako m'thu a txi onhela MKOMA, i mani a no mkombelela kani? Hambi keto, kha va engisa dipswi da tate wawe, nguko MKOMA a ti ti lava ku vadaya.

²⁶ Se mfana Samuwele a to kula a txi tsakelwa ngu MKOMA ni vathu.

²⁷Se kutota m'thu wa Txizimu ka Eli, a txi ta m'gela tiya: MKOMA a womba tiya: Ina kha na tikomba ngu ditshuri, ka nyumba ya tate wako, va ka Israyeli va di ngadi Egipta, nyumbani ka Faro, kani?

²⁸ Se ani ni msawute hagari ka totshe tihunzu ta va ka Israyeli kuva mphaxeli, kasiku e ningela txitimwi ka txiluvelo txangu, ni kuhisa dibaselo, e tisa efodhe masoni kwangu; kambe ni ningete nyumbani ka tate wako, yotshe miningelo ya kuhiswa ya vanana va ka Israyeli.

²⁹Ngu kutxani mi sola miphaxo ni miningelo yangu ya sakudya, yile ni nga leletela kuva yi ningelwa nyumbani kwangu, kambe u thava vanana vako kupinda ani, kasiku mi ti enisa ngu milangelwa ya yotshe miningelo ya vathu vangu va ka Israyeli, kani?

³⁰Ngu kumaha keto, MKOMA Txizimu txa Israyeli, a khene: Ngu ditshuri ani ni wombile ti taku, nyumba yako ni nyumba ya tate wako, ti na tsimbila masoni kwangu kala kupinduka; aniko konkuwa, kuwomba MKOMA,: Timhaketo ti nave kule ni nani! Nguko ni na thava avale va ni thavako, kambe avale va ni eyisako va na wiswa tingana.

³¹Wona taku mata masiku ale ni no wila diwoko dako ni diwoko da nyumba ya tate wako, kasiku ku si maneki txikosana ni txa tximwetxo ka nyumba yako.

³²Se wu na wona kuxaniseka ka Nyumba ya Txizimu, ka wukhalo wa totshe ta tinene tile ni no mahela Israyeli; kambe kha ku na mbi va ni txikosana ni txa tximwetxo nyumbani kwako, ka masiku otshe.

³³Aniko m'thu wule ani ni no mba mthavisa txiluveloni kwangu, a na hisa maso ako ni kudyiseta muhefemulo wako. Se votshe vathu vavangi va nyumba yako va nafa na va sanzi kukumba.

³⁴ Se txikombiso txi txi nota txitimwi ka vanana vako va vambidi, Hofini ni Fineyasi; ngu ti to ngu wumbidi wawe va nafa ditshiku dimwedo.

³⁵Se ani ni na ti emisela mphaxeli wo thembeka, awu a no maha madingano ni kulava ka mbilu yangu ni muhefemulo wangu, kambe ani ni na muakela nyumba yo tsana, aniko a na tsimbila masoni ka msawuleki wangu kala kupinduka.

³⁶Se ku na maheka tito, votshe vale va no sala ka miboti ya nyumba yako, va nata khizama masoni kwakwe, ve kombela male ya silivhela mwendo txikhwemu txa dipawu, va txi kha vona: Na kukombela ni tumelele ni maha mthumo wokari wa wuphaxeli, kasiku ni txi na mana kudya txikhwemu txa dipawu.