Read chopi 1 Samuwele 21 Bible Online

1 Samuwele 21 - chopi bible

1 Samuwele 21

¹ Sekoko Dhavhidha a to ta Nobhe, ka mphaxeli Ayimeleki; se Ayimeleki a to huma a txi dhudhumela e hingeta Dhavhidha, a txi khene kwakwe: Ngu kutxani uta wekha, u si na m'thu kani?

²Se Dhavhidha a to khene ka mphaxeli Ayimeleki: Mfumeli a ni leletile mhaka, a txi khene: Yi nga ziwe ngu m'thu mhaka yi ni kurumako, kambe ni nga kuleleta; se majaha angu ni ma kombile wukhalo wokari ni wokari.

³Konkuwa koko, i txani wu ku natxo manzani kwako kani? Ni ninge mtxhanu wa mapawu, mwendo si u ku naso.

⁴Se mphaxeli a to xamula Dhavhidha, a txi khene: Kha ni na dipawu manzani do dyiwa ngu wuhi ni wuhi; kambe kova dipawu do sawuleka, ngako majaha ako ma di ti basisile ka vavasikati.

⁵Se Dhavhidha a to xamula ka mphaxeli, a txi khene: Ina, hi ni masiku mararu hi di hambani ni vavasikati; mbimo yi ni nga khukha nyatulo mimidi ya majaha yi ti sawulekile; ngu mamahelo okari dipawu da wihi ni wihi, ngutu-ngutu nyamswi di na sawuleka ka yimwani mimidi.

⁶ Sekoko mphaxeli a to mninga dipawu do sawuleka, nguko ku si ngani dimwani dipawu, hahanze ka mapawu a mhamba, ale ma nga thavisa masoni ka MKOMA, kasi kuveka dipawu do hisa, ka ditshiku di va thavisako dile da kale.

⁷Kambe ka ditshiku donedo ku ti ti mmweyo wa sithumi sa Sawule koneho, a di ñolekile masoni ka MKOMA; se ditina dakwe i ti ti Dhowege, Muedhomi, mthangeli wa hombe ka vadyisi va Sawule.

⁸Se Dhavhidha a to khene ka Ayimeleki: Ina kha ku na mseve mwendo ditxhari dokari hawa kani? Nguko kha na teka mseve hambi matxhari angu, nguko mhaka ya mfumeli i ti ya txikuluveta.

⁹ Se mphaxeli a to khene: Ditxhari da Goliya, Mufilista, awule awe u nga m'daya ka mkova wa Mkusuni, ndide hawa, di nga phutelwa ngu nguwo msana ka efodhe; se ngako u txi teka ku di lava, di teke, nguko kha ku na dimwani hawa hahanze ka dile. Se Dhavhidha a to khene: Kha ku na tximwani txo fana nado; ni ninge dona.

¹⁰Ka ditshiku dile, Dhavhidha a to khukha e tutuma masoni ka Sawule, eya ka Akisi, mfumeli wa Gati.

¹¹ Kambe sithumi sa Akisi si to m'gela ku kha sona: Ina wuwa hi nga Dhavhidha, mfumeli wa ditiko kani? Hi nga ene wu va nga ti mu embelelela tindando, va txi kha vona: Sawule a date diguma da mazana, kambe Dhavhidha a date digumi da magumi a mazana kani?

¹² Se Dhavhidha a to alakanya timhaka tiya mbiluni kwakwe, se e thava ngutu masoni ka Akisi, mfumeli wa Gati.

¹³ Ngu kumaha keto, a to hundula mapimo masoni kwawe, e ti maha txiphukuphuku manzani kwawe, e nyaranyara matimba a ha txikeni, e bzwata lure li tshika ngu mu ka maletu akwe.

¹⁴Sekoko Akisi a to khene ka sithumi sakwe: Ma ti wona ti to m'thu wuwa mbo xanga; mi mtisete txani kwangu kani?

¹⁵Mi to pfa to ni pwata vo xanga, koza mi ni tisela m'thu wuwa e ta ni xangela masoni kwangu kani? Ina wuwa a nga wulela nyambani kwangu kani?