Read chopi 1 Samuwele 22 Bible Online

1 Samuwele 22 - chopi bible

1 Samuwele 22

¹Sekoko Dhavhidha a to khukha hale eya barama diphalani ka Adhulamu; se mbimo yi vanawe ni votshe va nyumba ya tate wakwe va nga tipfa, va to relela veya kwakwe.

²Se votshe vathu vale va nga ti ti xaniseka, ni votshe vathu vale va nga ti ni minandu, ni votshe vathu vale va nga ti ni moya wo biha, va to sengeletana kwakwe, se ene e va mthangeli wawe; vale a nga ti na vo i ti vo dingana 400 wa vavamna.

³Se Dhavhidha a to khukha koneyo eya Misipa ka Vamowabhi, a txi ya khene ka mfumeli wa Vamowabhi: Ni kombela ti to tate wangu ni mame wangu ve zumba ni nanu, kala kuza ni zivi a ti Txizimu txi no maha ngu ngani.

⁴Se a to va tisa masoni ka mfumeli wa Vamowabhi, ve ta zumba nayo otshe masiku ale Dhavhidha a nga ti zumba mikhokholani.

⁵Kambe mprofeti Gadhi a to khene ka Dhavhidha: U nga zumbe mkhokholani; khukha u ya ditikoni da ka Judha. Sekoko Dhavhidha a to khukha eya wulela txitingani ka Herete.

⁶Se Sawule a to tipfa to Dhavhidha ni vale a nga ti navo va manwi; kambe Sawule a ti zumbile Gibheya, hahatshi ka mindonga, kona Rama, a di ni ditxhari manzani kwakwe, kumweko ni sotshe sithumi sakwe.

⁷Sekoko Sawule a to khene ka sotshe sithumi sakwe sile si nga ti kumweko nayo: Ni engiseni, na mikombela, anu vanana va ka Bhenjamini, ina mwanana wa Jese a na mininga anu motshenu, tithembwe ni mivhinya, ni ku motshenu e mi maha vathangeli va digumi da mazana ni vathangeli va mazana,

⁸kuza anu motshenu mi maha txikungo txo ni wukela kani? Se ku to pwateka ni wammweyo wo ni zivisa to mwanana wangu a mahile txitumelelano ni mwanana wa Jese; awalo ni wammweyo hagari kwanu a ni khatalelako, e ni gela to mwanana wangu a kujetete txithumi txangu, kasi ku ni mahela siduko, kufana ni ti ni ti wonako nyamsi.

⁹Sekoko Dhowege, Muedhomi, awule nene a nga ti ni sithumi sa Sawule a to xamula, a txi khene: Ni woni mwana Jese a txita Nobhe ka Ayimeleki, mwana Ayitubhe,

¹⁰ awule Ayimeleki a nga mwotisela ka MKOMA, ni ku mninga sakudya, e mninga kambe ni ditxhari da Goliya, Mufilista.

¹¹Sekoko mfumeli a to rumela kuya dhana mphaxeli Ayimeleki, mwana Ayitubhe, ni votshe va nyumba ya tate wakwe, ni vaphaxeli vale va nga ti Nobhe; se votshe va to ta ka mfumeli.

¹²Se Sawule a to khene: Engisa, na ku kombela, awe mwana Ayitubhe. Aniko ene a to khene: Ngani wuwa, awe nyamne wangu.

¹³Sekoko Sawule a to khene kwakwe: Ngu kutxani, awe ni mwana Jese mi nga maha txikungo txo ni wukela kani? Awe u mningele sakudya ni ditxhari, kambe u wotisile ngu ngene ka Txizimu, kasi ku e ni wukela ngu ku ni mahela siduko, nga ti ti wonekako ka ditshiku diya.

¹⁴Se Ayimeleki a to xamula ka mfumeli, a txi khene: I mani a kuho hagari ka sotshe sithumi sako, wo thembeka kufana ni Dhavhidha, mwane wa mfumeli, wo engisa ni kudhundeka nyumbani kwako kani?

¹⁵Ina no khata nyamsi ku mwotisela ka Txizimu kani? Yi nave kule ni nani mhakeyo! Mfumeli a nga veke mnandu ni wawumwewo ka txithumi txakwe, hambi ka votshe va nyumba ya tate wangu, nguko txithumi txako kha txya ziva txilo ka totshe timhaketo, tatingi mwendo ta tidotho.

¹⁶Kambe mfumeli a to khene kwakwe: Ayimeleki, kha ditshuri wu na fa, awe ni votshe va nyumba ya tate wako.

¹⁷Se mfumeli a to khene ka vawoneleli vakwe, vale va nga ti kumweko nayo: Hundulukani mi daya vaphaxeli va MKOMA, nguko ni vona va pfana ni Dhavhidha, nguko va ti zivile to a tutumile kambe kha va ni zivisa. Aniko sithumi sa mfumeli kha sa tumela kudaya vaphaxeli va MKOMA.

¹⁸Sekoko Sawule a to khene ka Dhowege: Hunduluka awe u daya vaphaxeli! Se Dhowege, Muedhomi a to tshembereka e daya vaphaxeli, aniko ka ditshiku donedo a to daya mtxhanu wa magumi ni magumi mararu ni mtxhanu wa vavamna vale va nga ti ambate efodhe ya linyu.

¹⁹Sawule a to xasela Nobhe, didhoropa da vaphaxeli vale ngu ditxhari; kukhukhela ka wamwamna kala ka wamsikati, kukhukhela ka vanana kala ka timenzani; tihomu, timbongola ni tinvuta, ni sona si datwe ngu ditxhari.

²⁰Kambe ku to huluka mmweyo wa vanana va Ayimeleki, mwana Ayitubhe, wule ditina dakwe i nga ti ti Abhiyatari, a nga tutuma eya ka Dhavhidha.

²¹Se Abhiyatari a to ya gela Dhavhidha ti to Sawule a date vaphaxeli va MKOMA.

²²Sekoko Dhavhidha a to khene ka Abhiyatari: Ani ni ti zivile ka ditshiku dile taku, a diho hale Dhowege, Muedhomi, kha na mbi lamba kuya gela Sawule to a ni woni; Mnandu wa lifo la votshe va nyumba ya tate wako wu txitimwi kwangu.

²³Zumba ni nani, u nga thave, nguko awule a lavako kulovisa wutomi wangu, ngeneyo a lavako kulovisa wutomi wako, se u na huluka kumweko ni nani.