Read chopi 1 Samuwele 23 Bible Online

1 Samuwele 23 - chopi bible

1 Samuwele 23

¹Se Dhavhidha a to gelwa, va txi kha vona: Wona taku Vafilista va lwa ni Keyila, kambe va handa sizendani.

²Se Dhavhidha a to wotisa ka MKOMA, a txi khene: Ina ani ni tsula kuya xasela Vafilista vava kani? Se MKOMA a to khene ka Dhavhidha: Tsula u ya xasela Vafilista u lamulela didhoropa da Keyila.

³Kambe vathu va Dhavhidha, va to kha vona kwakwe: Wona taku, hambiku ditikoni ka Judha ha thava; ngutu-ngutu ngako hi txiya didhoropani da Keyila ku yalwa ni mabutho a Vafilista.

⁴Sekoko Dhavhidha a to wotisa kambe ka MKOMA, se MKOMA a to mxamula, a txi khene: Khukha, relela uya Keyila, nguko ni na ningela Vafilista manzani kwako.

⁵Sekoko Dhavhidha a to khukha ni vathu vakwe veya Keyila, ku yalwa ni Vafilista, ve teka mitxhambi, kambe va to onhetela ngutu; ngu kumaha keto, Dhavhidha a to lamulela vahanyi va Keyila.

⁶Se ku to maheka tito, mbimo yile Abhiyatari, mwana Ayimeleki, a nga tutuma eya ka Dhavhidha, kona Keyila, a to relela ni efodhe manzani.

⁷Kambe Sawule a to ziviswa taku Dhavhidha a wulete Keyila. Se Sawule a to khene: Txizimu txi mningete manzani kwangu, nguko a ti vhalete, ngu kuya wulela ka didhoropa da matimba ni sikhweketo sa tisimbi.

⁸Sekoko Sawule a to ramba votshe vathu veya kulwani, kasi kuve relela Keyila, kuya randela Dhavhidha ni vathu vakwe.

⁹A di ti zivile koko, Dhavhidha ti to Sawule wa maha makungo o biha o mwukela, a to khene ka Abhiyatari, mphaxeli: Tisa efodhe ahawa!

¹⁰Se Dhavhidha a to khene: Awe MKOMA, Txizimu txa Israyeli, txithumi txako ngu ditshuri txi pfite ti to Sawule a lava kuta Keyila, e ta hoxota didhoropa ngu mhaka yangu.

¹¹Ina vaaki va didhoropa da Keyila va na ni ningela manzani kwakwe kani? Ina Sawule a na relela kufana ni tile txithumi txako txi nga ti pfisa tona kani? O! MKOMA, Txizimu txa Israyeli, zivisa txithumi txako. Se MKOMA a to khene: A na relela!

¹²Dhavhidha a to khene kambe: Ina vathu va Keyila, va na ni ningela ani ni vathu vangu, manzani ka Sawule kani? Se MKOMA a to khene: Va na mi ningela.

¹³Sekoko Dhavhidha a to khukha ni vathu vakwe, vo dingana 600, ve huma Keyila ve horolokela ni ditiko; se ngako Sawule a di zivisilwe to Dhavhidha a tutumile kona Keyila, a to leka makungo o mwukela.

¹⁴Se Dhavhidha a to zumba txiwulani, ka mikhokhola, a to ya ka mmango wa txiwulani ka Zifi; se Sawule a to mlavetela masiku otshe, aniko Txizimu txi ya mningela manzani kwakwe.

¹⁵A di ti woni koko, Dhavhidha taku Sawule a lavetela wutomi wakwe, Dhavhidha a to zumba amu ka txitinga, txiwulani ka Zifi.

¹⁶Sekoko Jonatani, mwana Sawule a to khukha eya ka Dhavhidha txitingani e tsanisa dianza dakwe ka Txizimu,

¹⁷a txi khene kwakwe: U nga thave, nguko dianza da tate wangu Sawule kha di na mbi kumana; aniko awe u na fuma txitimwi ka va ka Israyeli, se ani ni na va wa wumbidi kwako; ngu ti nene tate wangu Sawule a ti zivako.

¹⁸ Se va to maha txitumelelano ngu wumbidi wawe masoni ka MKOMA. Dhavhidha a to zumba txitingani, kambe Jonatani a to tshumela e tsula m'tini kwakwe.

¹⁹ Sekoko Vazife va to tsula ka Sawule, kona Gibheya, va txi ya kha vona: Ina Dhavhidha kha barama hagari kwathu ka mikhokhola ya txitingani, mmangoni ka Hakila, wu ku didhawa da txinene ka Jesimoni kani?

²⁰Konkuwa koko, awe mfumeli kuluveta u relela madingano ni kotshe kunavela ka muhefemulo wako; nguko athu hi zumba hi di mningete manzani ka mfumeli.

²¹Sekoko Sawule a to khene: Katekiswani anu ngu MKOMA, nguko anu mi ni pfete.

²²Tsulani koko, mi ya wotisisa kha kwati, mi ziva ni kuwona wukhalo wu a tolovelako kumaneka ka wona, ni va va tolovelako ku mwona; nguko ni getwe ti to a txharihile ngutu.

²³Ngu kumaha keto, wonisisani kha kwati, mi zivisisa madingano ni otshe makhalo a baramako ka ona; sekoko mi na wuya kwangu ni dotshe ditshuri, aniko ani nata tsula ni nanu; se ku na maheka tito, a diho ka ditiko dile, ni na mlava amu hagari ka otshe magumi a mazana a va ka Judha.

²⁴Sekoko vona va to khukha veya Zifi, ve thangela Sawule; kambe Dhavhidha ni vathu vakwe va ti ti txiwulani ka Mahomi, libalani, ngu didhawa da txinene ka Jesimoni.

²⁵Se Sawule ni vathu vakwe va to tsimbila ve mlava, kambe vamwani va to ya zivisa Dhavhidha, se a to relela ka dirigwi dile eya zumba txiwulani ka Mahomi; a di ti pfite Sawule a to londeta Dhavhidha txiwulani ka Mahomi.

²⁶Sawule a to tsimbila ngu didhawa dimwedo da mmango, se Dhavhidha ni vathu vakwe ve tsimbila ngu dimwani didhawa da mmango; se ku to maheka taku Dhavhidha e kuluveta e huluka ka Sawule; kambe Sawule ni vathu vakwe va to randela Dhavhidha ni vathu vakwe, va txi lava ku va ñola.

²⁷Sekoko mtumi wu to ya kha wona ka Sawule: Kuluveta u wuya, nguko Vafilista va wulete ditikoni.

²⁸Ngu kumaha keto, Sawule a to leka kututumisa Dhavhidha, e tshumela e yalwa ni Vafilista. Ngu toneto, wukhalo wule wu to dhanwa[7] ku i Sela-Hamalekote.

²⁹Se Dhavhidha a to kwelela eya zumba mikhokholani ka Eni-Gedhi.