Read chopi 1 Samuwele 24 Bible Online

1 Samuwele 24 - chopi bible

1 Samuwele 24

¹Se ku to maheka ti to mbimo yile Sawule a nga wuya ngu kututumisani ka Vafilista, va to m'gela ku kha vona: Wona taku Dhavhidha a txiwulani ka Eni-Gedhi.

²Sekoko Sawule a to teka 3.000 wa vavamna, avale va nga sawulwa hagari ka dotshe ditiko da Israyeli, se ve tsula ku lavani ka Dhavhidha ni vathu vakwe, kala tishokani ka mimango ya marigwi a timhoti.

³ Se va to hoka sibalani ka tinvuta hafuhi ni nzila, ahale ku nga ti ti ni diphala; se Sawule a to wulela ka dona, kuya ti ruma kona; kambe Dhavhidha ni vathu vakwe va ti ngu madhawani ka diphala.

⁴Sekoko vathu va Dhavhidha va to m'gela ku kha vona: Adiya ngu dona ditshiku di MKOMA a ngadi womba, a txi khene: Wona taku ni na ningeta mlala wako manzani kwako, u na maha kwakwe kuranda kwako. Se Dhavhidha a to khukha ngu kunyanimela eya wila tshoka ya txyambalo txa Sawule.

⁵Se ku to maheka koko taku, msana kova a di wite txyambalo txa Sawule, Dhavhidha a to xaniseka mbiluni, ngu kule a nga wila tshoka ya txyambalo txa Sawule;

⁶se a to khene ka vathu vakwe: MKOMA a na ni xayise ku ni si maheli nyamne wangu mhaka yiya, ka wule a nga totwa wa MKOMA, ngu kuguleta dianza dangu ni mwukela, nguko mbwo totwa wa MKOMA.

⁷Se ngu mapswi awa, Dhavhidha a to layetela vathu vakwe, asi va tumeleli kuve wukela Sawule; kambe Sawule a to huma ngu diphalani e simama ni nzila yakwe.

⁸Msana keto, Dhavhidha nene a to huma ngu diphalani, e kwangula ngu msana ka Sawule, a txi khene: Mfumeli, nyamne wangu! Se mbimo yile Sawule a nga tshembereka e wona msana, Dhavhidha a to nama hahatshi e khizama.

⁹Se Dhavhidha a to khene ka Sawule: Ngu kutxani u engisa mapswi a vathu vale va ku kha vona: Wona taku Dhavhidha a lava ku ku mahela to biha kani?

¹⁰Nyamsi u ti woni upune ti to MKOMA a ku ningete manzani kwangu ka diphala diya, vamwani va ni kuzetete ti to ni kudaya; kambe ni ku divalete, nguko ni ti khani: Kha ni na mbi nawuluta diwoko dangu ni wukela nyamne wangu, nguko mbo totwa wa MKOMA.

¹¹Wona koko, tata wangu, wona diye tshoka ya txyambalo txako manzani kwangu; nguko ani ni to wila tshoka ya txyambalo, kambe kha na kudaya. Wona koko, u tiziva ti to kha ku na wulala ni wubihi manzani kwangu, ni ti to ani kha na kuonhela; kambe awe wu lavetela kuthavisa wutomi wangu.

¹²MKOMA a na lamule hagari kwangu ni nawe, ni ku ni photela kwako; kambe dianza dangu kha di na mbi kuwukela.

¹³Kufana ni kuwomba ka vakale va nga kha vona: Wubihi wu huma ngu ka vabihi; kambe dianza dangu kha di na mbi kuwukela.

¹⁴A humela mani mfumeli wa va ka Israyeli kani? A tutumisa mani kani? U tutumisa yimbwa yo fa kani? Mwendo i ndata kani?

¹⁵Kambe MKOMA a na va mlamuli, a na lamula hagari kwangu ni nawe, a na ni wona, e xolisisa mhaka yangu, se a na ni hulukisa manzani kwako.

¹⁶Se ku to maheka ti to a di hetile Dhavhidha kuwombawomba ni Sawule otshe mapswi awa, Sawule a to khene: Ina dipswi dako diya mwanangu Dhavhidha kani? Sekoko Sawule a to guleta dipswi e dila.

¹⁷Se a to khene ka Dhavhidha: Awe u lulamile ngutu kupinda ani; nguko awe wu ni tshumetete ngu wunene, kambe ani ni ku tshumetete ngu wubihi.

¹⁸Nyamsi awe wu ni kombile wumbilu wu wu ku nawo ni nani; nguko MKOMA a ti ni ningete manzani kwako, kambe awe khu ya ni daya.

¹⁹Nguko i mani wo a di mani mlala wakwe a nga mleka e tsula ngu kuthutha kani? Ngu toneto, MKOMA a na ku tshumetele ngu wunene, ngu mhaka ya ti u nga ni mahela nyamsi.

²⁰Konkuwa koko, na tiziva ti to kha ditshuri u na fuma, ni ku mfumo wa va ka Israyeli wu na tsana manzani kwako.

²¹Xambanya konkuwa kwangu ngu MKOMA tito, khu na mbi fuvisa liveleko langu msana kwangu, hambi kufuvisa ditina dangu nyumbani ka tate wangu.

²²Sekoko Dhavhidha a to xambanya ka Sawule. Se Sawule e khukha e tsula m'tini kwakwe, kambe Dhavhidha ni vathu vakwe va to kwelela veya mikhokholani.