Read chopi 1 Samuwele 26 Bible Online

1 Samuwele 26 - chopi bible

1 Samuwele 26

¹ Se Vazifi va toya ka sawule kona Gibheya va txi kha vona: Ina Dhavhidha kha mbharama mmangoni ka Hakila, wu wu ku txidigeni ka Jesimoni kani?

²Sekoko Sawule a to khukha e relela txiwulani ka Zifi, kumweko ni 3.000 wa vavamna va nga sawulwa hagari ka va ka Israyeli, kuya lava Dhavhidha txiwulani ka Zifi.

³Se Sawule a toya gova mmangoni ka Hakila, wu wu ku txidigeni ka Jesimoni, hafuhi ni nzila; kambe Dhavhidha a to zumba txiwulani, se e wona Sawule a txi ta ngu msana kwakwe kona txiwulani.

⁴Dhavhidha koko a to rumela tixoli, ti ya ziva to Sawule wata kha ditshuri.

⁵Se Dhavhidha a to khukha eya ka wukhalo wule Sawule a nga ti govile ka wona; Dhavhidha a to wona wukhalo wu Sawule a nga ti sate ka wona ni Abhineri, mwana Neri, mthangeli wa dibutho dakwe da yimbi; se Sawule a ti otete hagari ka sikotxikani, vathu va ti mranganyetile ngu madhawani.

⁶Se Dhavhidha a to xamula ka Ayimeleki, Muheti, ni ka Abhixayi, mwana Zeruiya, mwanawe wa Jowabhi, a txi khene: I mani a no relela ni nani hi ya ka Sawule wugoveloni kani? Se Abhixayi a to khene: Ani ni na relela ni nawe!

⁷Dhavhidha koko ni Abhixayi va to tsula ka vathu ni wusiku, se va to wona Sawule a di otete, a di otete hagari ka wukhalo wa sikotxikani, na mseve wakwe a di wu zimile hahatshi ngu misungoni kwakwe; kambe Abhineri ni vathu va ti otete ngu madhawani kwakwe.

⁸Sekoko Abhixayi a to khene ka Dhavhidha: Nyamsi Txizimu txi ku ningile mlala wako manzani kwako; konkuwa koko ni leke ni tekela ku mthola ngu mseve, ni mpata ni mafu, kha ni na mbi mthola kumbidi.

⁹Se Dhavhidha a to khene ka Abhixayi: U nga mmahe txilo; nguko i mani a nga guletako diwoko dakwe ka msawuleki wa MKOMA asi mani mnandu kani?

¹⁰Dhavhidha a to engeta a txi khene: Ni xambanya ngu MKOMA wu a hanyako, taku MKOMA a na m'daya, mwendo ti to ditshiku da kufa kwakwe di na hoka, ni ku mwendo a na relela ku yalwa a txi ya lova.

¹¹MKOMA a na ni xayise ku ni si guleti diwoko dangu ni daya wule a nga totwa wa MKOMA, kambe konkuwa, teka mseve wu wu ku misungoni kwakwe ni ngoto ya mati hi tsula.

¹²Dhavhidha koko, a to teka mseve ni ngoto ya mati misungoni ka Sawule, ve tsula; kha kwa maneka ni mmweyo wo ti wona, hambi wo tipfa, mwendo kuwuka; nguko votshe va ti mani wukohe, nguko MKOMA a ti va otelisile ngu wukohe wa hombe.

¹³Se Dhavhidha a to pinda eya ka dimwani didhawa, eya ema tshokani ka mmango ngu kule, aha ka ku ngu hagari kwawe kumaneka mpfhuka wo lapha.

¹⁴Se Dhavhidha a to kwangula ka vathu ni ka Abhineri, mwana Neri, a txi khene: Khu na mbi xamula Abhineri kani? Sekoko Abhineri a to xamula, a txi khene: Ngawe mani wu kwangulako ka mfumeli kani?

¹⁵Sekoko Dhavhidha a to khene ka Abhineri: Ina hi ngawe wamwamna wa ndena kani? Se i mani a kuho Israyeli wo fana ni nawe kani? Ngu kutxani koko, u nga lamba kuwonelela mfumeli, nyamne wako kani? Nguko kutile m'thu wokari ka ta hoxota mfumeli, nyamne wako.

¹⁶Hi nga ta tinene eto u nga maha; ni xambanya ngu MKOMA a hanyako, anu mi fanela kufa, anu mi nga mbi wonelela nyamne wanu, wule a nga totwa wa MKOMA; wonani koko, konkuwa taku, aha wu ku kona mseve wa mfumeli ni ngoto ya mati, sile si nga ti misungoni kwakwe.

¹⁷Sekoko Sawule a to ziva dipswi da Dhavhidha, a nje khene: Ina hi nga dipswi dako mwanangu Dhavhidha kani? Se Dhavhidha a to khene: Dispwi dangu, awe mfumeli, nyamne wangu!

¹⁸A to khene kambe: Ngu kutxani nyamne wangu e tutumisa txithumi txakwe nga tiya kani? Nji txani ni nga onha koko, kani? Ni ku wubihi muni wu kuho kwangu kani?

¹⁹Konkuwa koko, na ku kombela awe mfumeli nyamne wangu, ti to u engisa mapswi a txithumi txako: Ngako MKOMA a txi kukurumeta ku ni wukela, a na amukele mningelo wa sakudya; kambe ngako i di vanana va vathu va na ruketelwe masoni ka MKOMA; nguko nyamsi vona va ni tutumisile, kasi ku ni si mani txyavelo txa thomba ya MKOMA, va txi kha vona: Tsula, u ya thumela simwani sizimu.

²⁰Konkuwa koko, wu nga thekele mnoha wangu ha mafuni, masoni ka MKOMA; mfumeli wa Israyeli koko a to huma kuya xota ndata, kufana ni m'thu wule a tutumisako tshukwa mimangoni.

²¹Sekoko Sawule a to khene: Ni onhile! Wuya, mwanangu Dhavhidha! Nguko kha ni na mbi kumaha to biha, nguko nyamsi u woni lisima la wutomi wangu masoni kwako. Wona taku, ni mahile wuphukuphuku, ni onhile ngutu ta tinene.

²²Sekoko Dhavhidha a to xamula, a txi khene: Ndiwo hawa mseve wa mfumeli; a nate mmweyo ka vafana vako e ta teka.

²³Kambe MKOMA a na tshumetela ka mmweyo ni mmweyo ngu kululama kwakwe ni kuthembeka kwakwe; nguko nyamsi koko MKOMA a ti ku ningete manzani kwangu, kambe kha lava kuguleta dianza dangu ni wukela wule a nga totwa wa MKOMA.

²⁴Wona taku, nga kule wutomi wako wu nga va wa lisima masoni kwangu, ni wona wutomi wangu wu nave wa lisima masoni ka MKOMA, se ene a na ni txhatxhise ka sotshe sixaniso.

²⁵Sekoko Sawule a to khene ka Dhavhidha: Kateka awe mwanangu Dhavhidha; nguko wu na maha timhaka ta hombe, kambe wu na humelela. Sekoko Dhavhidha a to tsula ngu nzila yakwe, se Sawule nene a to tshumela eya wukhaloni kwakwe.