Read chopi 1 Samuwele 27 Bible Online

1 Samuwele 27 - chopi bible

1 Samuwele 27

¹Kambe Dhavhidha a to khene mbiluni kwakwe: Dimwani ditshiku ni na dawa ngu Sawule; kha ku nata tshuko kwangu kupinda ku ni huluka ni kuluveta ni tsula ditikoni ka Vafilista; kasiku Sawule a txi leka ku ni xota ka yotshe mihingano ya Israyeli; ngu kumaha keto ni na huluka ka dianza dakwe.

²Sekoko Dhavhidha a to khukha kumweko ni 600 wa vathu vale a nga ti navo veya ka Akisi, mwana Mahoki, mfumeli wa Gati.

³Se Dhavhidha a to ya zumba ni Akisi kona Gati, ene ni vathu vakwe, mmwani ni mmwani ni nyumba yakwe; Dhavhidha ni vasikati vakwe va vambidi, Ayinowami, Mujezireyeli, ni Abhigayeli, msikati wa Nabhali, Mukarmeli.

⁴Se mbimo si Sawule a nga gelwa to Dhavhidha a tutumile eya Gati, kha mu xota kambe.

⁵Se Dhavhidha a to khene ka Akisi: Nga ku ni di mani dikato masoni kwako, ni ninge wukhalo wo zumba ka wona ka didhoropa dimwedo da amu ditikoni; Txi nga zumbisa kutxani koko txithumi txako ni nawe didhoropani ka wufumeli kani?

⁶Sekoko ka ditshiku donedo, Akisi a to ninga Dhavhidha didhoropa da Zikilage (ngu kumaha keto didhoropa da Zikilage di lumba vafumeli va ka Judha, kala ka ditshiku da nyamsi).

⁷Se Dhavhidha a to zumba ditikoni ka Vafilista dilembe dimwedo ni mune wa mitxima.

⁸Dhavhidha a to kwelela ni vathu veya xasela Vagesuri, ni Vagerisi, ni Vaameleki; nguko kale i ti ti vona vahanyi va ditiko dile, kukhukhela Suri kala ditikoni ka Egipta.

⁹Se Dhavhidha a to xasela ditiko dile, e daya vavamna ni va vasikati, e teka tinvuta, ni tihomu, ni timbongola, ni makamelu, ni syambalo; e tsula a txi wuya naso ka Akisi.

¹⁰A txi khene kha Akisi: Mi xasete hani nyamsi kani? Dhavhidha a ti ti khene: Hi xasete Wulambe ka Judha, ni Wulambe ka Vajerameli, ni Wulambwe ka Vakeni.

¹¹Se Dhavhidha asi siye m'thu a txi hanya ka vavamna ni ka vavasikati, kasi ku va tisa Gati, a txi ta khene: Kasiku va si hi wombeli va txi kha vona: Dhavhidha a mahile tiya. Se e txo i ti txitoloveto txakwe ka masiku otshe ale a nga zumba ditikoni ka Vafilista.

¹²Akisi a ti themba Dhavhidha, a txi khene: A ti mahile wo nyenywa ngu vathu va ka Israyeli, ngu kumaha keto, a na maha txithumi txangu kala kupinduka.