Read chopi 1 Samuwele 29 Bible Online

1 Samuwele 29 - chopi bible

1 Samuwele 29

¹Se Vafilista va to sengeleta otshe mabutho awe a yimbi kona Afeki, kambe Vaisrayeli va to ya gova hafuhi ni txisima txi txi ku Jezireyeli.

²Se vathangeli va Vafilista va to tsula koneyo, ni mazana ni magumi a mazana; kambe Dhavhidha ni vathu vakwe va to tsula ni Akisi ngu msana.

³Sekoko vathangeli va Vafilista va to kha vona: Va maha txani Vahebheru vava hawa kani? Se Akisi a to khene ka vathangeli va Vafilista: I na hi nga Dhavhidha wuwa, txithumi txa Sawule, mfumeli wa Israyeli, wule a nga zumba ni nani masiku okari mwendo malembe kani? Kha na mana txionho ni txa tximwetxo kwakwe, kukhukhela ka ditshiku dile a nga ta ngu dona kala ka ditshiku da nyamsi.

⁴Kambe vathangeli va Vafilista va to muhenyela ngutu, va txi kha vona kwakwe: Tshumeta m'thu wuwa, eya ka wukhalo wakwe, wule awe u nga m'veka ka wona, a nga tsule ni nathu yimbini, kasiku asi hinduluki e maha mlala wathu yimbini; nguko a na divaleliswa kutxani ngu nyamne wakwe kani? Ina hi nga ngu kuningela misungo ya vathu vava kani?

⁵Hi nga ene Dhavhidha wule vamwani va nga ti ti xamula makharani, va txi kha vona: Sawule a date digumi da mazana, kambe Dhavhidha a date digumi da magumi a mazana, kani?

⁶Sekoko Akisi a to dhana Dhavhidha a txi khene kwakwe: Ni xambanya ngu MKOMA a hanyako, ti to awe u lulamile, ni ti to kuwulela kwako ni kuhuma kwako ni nani wugoveloni ndinene masoni kwangu; nguko kha na wona wubihi ni wawumwewo kwako, kukhukhela ka ditshiku dile u nga ta kwangu kala ka ditshiku da nyamsi; kambe masoni ka vathangeli khu tsakisi.

⁷Tshumela koko, konkuwa, tsula ngu kudikha; kasiku u si mahi txiphukuphuku masoni ka vathangeli va Vafilista.

⁸Sekoko Dhavhidha a to khene ka Akisi: Ngu kutxani kani? I txani ni nga onha kani? Mwendo i txani u nga txi wona ka txithumi txako, kukhukhela ka ditshiku dile ni nga ta masoni kwako kala ka ditshiku da nyamsi, aha koza ni vhalelwa ku yalwa ni valala va mfumeli, nyamne wangu kani?

⁹Kambe Akisi a to xamula ka Dhavhidha a txi khene: Ani na tiziva; ti to ngu ditshuri awe u lulamile masoni kwangu ku nga Ngelozi ya Txizimu; kambe vathangeli va Vafilista va to kha vona: A nga tsule wuwa ni nathu yimbini.

¹⁰Konkuwa koko, Vindukela mangwana ni mixo kumweko ni sithumi sa nyamne wako, sile u nga ta naso; mi di vindukete mangwana ni mixo, na ditambo di txi huma, tsulani.

¹¹Sekoko Dhavhidha a to phindula ngu mabimbi-kutxa ene ni vathu vakwe, kasiku ve khukha ni mixo, ve tshumelela ditikoni ka Vafilista; se Vafilista va to kwelela veya Jezireyeli.