Read chopi 1 Samuwele 30 Bible Online

1 Samuwele 30 - chopi bible

1 Samuwele 30

¹Ku to maheka koko taku, mbimo yile Dhavhidha ni vathu vakwe va nga hoka didhoropani ka Zikilage ngu ditshiku da wuraru, Vaamaleki va ti xasete Wulambwe ni didhoropa da Zikilage, va ti hoxotile didhoropa da Zikilage, ve di hisa ngu mndilo.

²Se va to teka vavasikati vale va nga ti ka dona, ve va maha tikhumbi, kambe kha va daya m'thu ni wammweyo, hambi wam'dotho mwendo wa hombe; va to va teka dwe ve tsula navo.

³Se Dhavhidha ni vathu vakwe va to ya didhoropani, va to di mana di di hisilwe ngu mndilo, se vasikati vawe, ni vanana vawe va majaha ni vamahorana, va to tekwa ve yiswa wukhumbini.

⁴Sekoko Dhavhidha ni vathu vale a nga ti navo va to pekeletela tihuwa ve dila, kala kuza ve guma mtamo wo dila.

⁵ Vasikati va Dhavhidha va vambidi va to tekwa ni vona ve yiswa wukhumbini; Ayinowami, mujezireyeli, ni Abhigayeli, msikati wa Nabhali, mukarimeli.

⁶Se Dhavhidha a to henya ngutu, nguko vathu va ti ti womba-womba ngu kulava ku m'balisela ngu marigwi, nguko timbilu ta vathu votshe ti ti kuxanisekani, mmwani ni mmwani ngu mhaka ya vanana vakwe va majaha ni vamahorana; hambi keto Dhavhidha a to tsana ka MKOMA, Txizimu txakwe.

⁷ Se Dhavhidha a to khene ka mphaxeli Abhiyatari, mwana Ayimeleki: Na ku kombela, ni tisele efodhe hawa. Se Abhiyatari a to tisa efodhe ka Dhavhidha.

⁸Sekoko Dhavhidha a to wotisa ka MKOMA a txi khene: Ina ni nga wulondeta mtxawa wuwa wa masotxhwa kani? Ina na wu mana kani? Se MKOMA a to m'gela ku khene: Wu londete, nguko ngu ditshuri u na wu mana kambe u txhatxhisa sotshe.

⁹A to khukha koko, Dhavhidha, ni 600 wa vavamna vale a nga ti navo, se veya hoka txinambwanani ka Bhesori, ahale va nga ya ema kona vale va nga ti sate ngu msana.

¹⁰Se Dhavhidha a to londeta Vaamaleki, ene ni 400 wa vavamna, nguko 200 wa vavamna va ti sate msana, kha va sikota kutxhatuka txinambwana txa Bhesori, ngu kukarala ngutu.

¹¹Se va to mana wa wamwamna wa Muegipta libalani ve mu yisa ka Dhavhidha; va to mninga sakudya, e dya, ve mninga ni mati e sela.

¹²Va to mninga ni txibhutwana txa makuwa o oma, ni sizangwa simbidi sa mauvha e dya; se a to mana mtamo, nguko ku ti ti pindile masiku mararu ni wusiku wa kona a sa dya sakudya, ni kusela mati.

¹³Sekoko Dhavhidha a to m'gela ku khene: U waka mani awe, ni ku u ta ngu hani kani? Se mfana wule wa Muegipta a to khene: Ni txithumi txa wa wamwamna wa muamaleki, kambe nyamne wangu a ni lekile, nguko ni hetile masiku mararu ni txi lwala.

¹⁴Athu hi ti ko ya xasela didhawa da wulambwe ka Vakereti, ni didhawa da va ka Judha, ni didhawa da wulambwe ka Vakalebhi, hi hisa ni didhoropa da Zikilagi.

¹⁵Se Dhavhidha a to khene kwakwe: Ina u nga relela, u ni heleketa ka mtxawa ewo wa masotxhwa kani? Se a to khene: Xambanya ka Txizimu ti to khu na mbi ni daya, hambi ku ni ningela manzani ka nyamne wangu, se ni na relela ni kuheleketa ka mtxawa ewo wa masotxhwa.

¹⁶Se a to relela e mu heleketa. Kambe va to ya va mana va di hangalakile ka otshe madhawa a ditiko, va txidya, ni kusela, ni kusinya, ngu mhaka ya sotshe sile va nga handa ditikoni ka Vafilista ni ditikoni ka va ka Judha.

¹⁷Se Dhavhidha a to va xasela, kukhukhela ni mixo kala ni minova ya mangwananani ka kona, kha ka huluka ni wammweyo, hahanze ka 400 wa majaha dwe ale ma nga gadha makamelu, me tutuma.

¹⁸Ngu kumaha keto, Dhavhidha a to txhatxhisa sotshe sile si nga ti tekilwe ngu Vaamaleki; e txhatxhisa ni vasikati vakwe vavambidi.

¹⁹Aniko kha pwata ni wammweyo, kukhukhela ka wam'dotho kala ka wa hombe, ni kala ka vanana va majaha ni vamahorana; ni kukhukhela ka sile so handwa kala ka sotshe sile va nga ti teketwe; sotshe Dhavhidha a to wuya naso.

²⁰Dhavhidha a to teka kambe totshe tinvuta ni tihomu ta mikati, se veya ti pata ka simwani sifuyo, va txi kha vona: Asiya si handilwe ngu Dhavhidha.

²¹Se mbimo yile Dhavhidha a nga hoka ka vavamna vale va 200, vale va nga ti karate ngutu, ve tandeka kulondeta Dhavhidha, ve sala txinambwanani ka Bhesori, va to huma ve hingeta Dhavhidha ni vathu vale a nga ti wuya navo; a di va hokete Dhavhidha a to va losa ngu kudikha.

²²Sekoko votshe vabihi ni vanana va Bheliyali, i ku vamwevo ka vavamna vale va nga ti tsute ni Dhavhidha, va to xamula va txi kha vona: Evo va nga mbi tsula ni nathu, kha hi na mbi va ninga sile hi nga handa; kambe mmweyo ni mmweyo a na teke msikati wakwe ni vanana vakwe e tsula.

²³Kambe Dhavhidha a to khene: Mi nga maheni eto vanathu, nguko siya hi ningilwe ngu MKOMA, a hi xayisile ni kuningela mtxawa wa masotxhwa manzani kwathu, ale ma nga ti ta ku ta hi wukela.

²⁴Se i mani wu a ndi no mi engisa ka to fana ni tiya kani? Nguko txyavelo txa vale va nga ti ti yite yimbini txi na lumba vale va nga ti ti sate ni thundu; va na abaniselwa ngu kufana.

²⁵Kukhukhela ka ditshiku donedo ni kuya masoni ku to mahisa toneto, a to si veka kuva txileleto ni txihena ka va ka Israyeli, kala ka ditshiku da nyamsi.

²⁶Se mbimo yile Dhavhidha a nga hoka Zikilage, a to rumela sile so handwa ka madhota a ka Judha, i ku vangana vakwe, a txi khene: Dikatonyana diya danu, da sile hi nga ya handa ka valala va MKOMA:

²⁷Ka vale va ku Bheteli, ni va Ramoti ka Wulambwe, ni va Jatiri,

²⁸ni va Aroweri, ni va Sifimote, ni va Estemowa,

²⁹ni va Rakali, ni ka vale va nga ti ti madhoropani ka Vajerameyeli, ni ka madhoropa a Vakeni,

³⁰ni va Horima, ni va Bhorasani, ni va Atace,

³¹ni va Hebroni, ni ka otshe makhalo ale a nga tsimbila ka ona Dhavhidha, ene ni vathu vakwe.