Read chopi 1 Samuwele 6 Bible Online

1 Samuwele 6 - chopi bible

1 Samuwele 6

¹Ngako koko, dibhokiso da MKOMA di di zumbile ditikoni ka Vafilista mtxhanu wa mtxima ni yimbidi,

²Vafilista va to dhana vaphaxeli ni tiñanga, va txi kha vona: Hi na maha txani athu ngu dibhokiso da MKOMA kani? Hi geleni ti hi no di tshumetisa tona di txiya ka wukhalo wa dona.

³Vona va to kha vona: Ngako mi txi tshumeta dibhokiso da Txizimu txa ka Israyeli, mi ngadi tshumeteni di si na txilo, aniko di rumeleni ni mningelo wo dihela mnandu; sekoko mi na kalamuka, kambe mi na ziviswa mhaka yi yi mahako ti to dianza da Txizimu di si khukhi kwanu.

⁴Sekoko Vafilista va to kha vona: I mhamba muni yo dihela mnandu hi no txi ninga kani? Se vaphaxeli ni tiñanga, va to kha vona: Madingano ni mtengo wa vathangeli va Vafilista, mi na rumela mtxhanu wa sithunye sa nzalama ni mtxhanu wa makonzo a nzalama, nguko anu motshenu ni vathangeli vanu mi wetwe ngu mtungu wumwewo.

⁵Mahani koko, sifananiso sa sithunye sanu ni sifananiso sa makonzo anu, ale maxaselako ditiko, se mi dhumisa Txizimu txa ka Israyeli; mwendo Txizimu txi na hehukisa dianza da txona txitimwi kwanu, ni txitimwi ka txizimu txanu, ni txitimwi ka ditiko danu.

⁶Mi ndi na bangisela txani koko timbilu tanu, kufana ni Vaegipta ni Faro va nga bangisa timbilu tawe kani? Ina msana kova va di va xanisile ngutu, kha va va leka ve tsula, vona kha va tsula kani?

⁷Konkuwa koko, mahani txikotxikani txa txiphya, mi teka tihomu timbidi ta mikati ti mamisako, a ti ti sanzi ku sanzekwa dikange, mi sungelela tihomu ta mikati aha ka txikotxikani, se mi siya marole a tona m'tini.

⁸Sekoko tekani dibhokiso da MKOMA, mi di veka amu ka txikotxikani, aniko mi na beta amu ka txibhokiswana, didhawa ka txona, sifananiso sa nzalama asi mi no ningela kasiku kuva mhamba yo dihela mnandu, ngu kumaha keto, mi na si rumela si tsula.

⁹Sekoko wonani: Ngako txi txi kwelela ngu nzila ya m'hingano wa kuya Bheti-Semi, ngu txona Txizimu txi nga hi vangela dikhombo diya da hombe; ani i si ngeto, hi na tiziva taku dianza dakwe kha da hi gwesa, ni ti taku eto ti to hi humelela dwe.

¹⁰Se vavamna vale va to maha toneto, ve teka tihomu timbidi ta mikati ti nga txi mamisa, ve ti sungelela ka txikotxikani, kambe marole a tona ve ma sekela txibalani.

¹¹Se va to veka dibhokiso da MKOMA amu ka txikotxikani, kumweko ni txibhokiswana txi ku ni makonzo a nzalama ni sifananiso sa sithunye sawe.

¹²Sekoko tihomu ta mikati ti to tsimbila ngu nzila yo ya Bheti-Semi, ti txi londeta nzila yimweyo, ti tsimbila na ti txi bhoma-bhoma, ti si jiki tiya txinene mwendo txibhabha; se vathangeli va Vafilista va to londisela ngu msana ka tona, kala mhinganoni ka Bheti-Semi.

¹³Se va Bheti-Semi va ti ti elula fulaho mkovani, va di gute maso, va to wona dibhokiso; aniko va di di woni, va to tsaka.

¹⁴Se txikotxikani txi toya thembweni ka Joxuwa, wa Bheti-Semi, se txiya ema kona hale; koneho ku ti ni dirigwi da hombe; va to bhandisela mapulango a txikotxikani, ve ningela tihomu ta mikati u va mphaxo wo hiswa ka MKOMA.

¹⁵Se Valevhi va to txhikisa dibhokiso da MKOMA, kumweko ni txibhokiswana txile txi nga ti kumweko nado, na txi di ni siya sa nzalama, se ve si veka txitimwi ka dirigwi dile da hombe; kambe ka ditshiku donedo, vavamna va Bheti-Semi va to ningela mningelo wo hiswa, ni kumaha mphaxo ka MKOMA.

¹⁶Se ngako vathangeli vale va mtxhanu va Vafilista va di ti woni, va to tshumelela Ekroni ka ditshiku donedo.

¹⁷Asiya koko, nzithunye sa nzalama sile si nga rumelwa ka MKOMA ngu Vafilista, kasi kudihela mnandu: Txithunye tximwetxo ngu Asidhodhe, tximwani ngu Gaza, tximwani ngu Asikeloni, tximwani ngu Gati, ni tximwani ngu Ekroni;

¹⁸kumweko kambe ni makonzo a nzalama, madingano ni mtengo wa otshe madhoropa a Vafilista, o lumba mtxhanu wa vathangeli, kukhukhela ka madhoropa a mikhokhola kala ka sidhoropana, ni kala ka Abhele, i ku dirigwi da hombe dile va nga veka ka dona dibhokiso da MKOMA, di ku nga diho thembweni ka Joxuwa, wa Bheti-Semi, kala ka ditshiku da nyamsi.

¹⁹Se MKOMA a to daya vathu va Bheti-Semi, ngu kule va nga solela mndani ka dibhokiso da MKOMA, eza e daya vathu vo dingana 50.070 wa vavamna; sekoko vathu va to pandiseka, ngu kule MKOMA a nga maha phango ya hombe ngutu hagari ka vathu.

²⁰Sekoko vavamna va Bheti-Semi, va to kha vona: I mani a nga emako masoni ka MKOMA, Txizimu txiya txo sawuleka kani? Ni ku i mani kwathu a no kwelela kani?

²¹Va to rumela mitumi koko, ka vaaki va Kiriyate-Jeyarimi, va txi kha vona: Vafilista va wuyisile dibhokiso da MKOMA; relelani koko, mi ya di teka mi tsula nado.