Read chopi 1 Samuwele 7 Bible Online

1 Samuwele 7 - chopi bible

1 Samuwele 7

¹ Sekoko vathu va Kiriyate-Jeyarimi va to ta, ve ta teka dibhokiso da MKOMA, ve tsula nado nyumbani ka Abhinadhabhi, mmangoni; se va to sawulekisa Eleyazari, mwana Abhinadhabhi, kuva mxayisa wa dibhokiso da MKOMA.

²Se ku to maheka tito, kukhukhela ka ditshiku dile, dibhokiso di to zumba Kiriyate-Jeyarimi, kupinda masiku o tala, kala kuhoka magumi mambidi a malembe; se yotshe nyumba ya ka Israyeli yi to dila ka MKOMA.

³Sekoko Samuwele a to womba ka votshe va nyumba ya ka Israyeli, a txi khene: Ngako mi txi hundukela ka MKOMA ngu totshe timbilu tanu, thavisani sizimu sa vamatiko ni sa astarote hagari kwanu, mi lulamisela MKOMA timbilu tanu totshe, kambe mi thumela ene dwe, se a na mi hulukisa manzani ka Vafilista.

⁴Sekoko vanana va ka Israyeli va to thavisa sizimu sa va ka bhahali ni sa astarote hagari kwawe, ve thumela MKOMA dwe.

⁵Samuwele a to engeta, a txi khene: Sengeletani votshe va ka Israyeli kona Misipa, aniko na mi kombelela ka MKOMA.

⁶Se va to sengeletana kona Misipa, ve reka mati ve ma theletela masoni ka MKOMA, kambe ka ditshiku donedo va to titona kudya, va txi kha vona: Hi onhete MKOMA. Se Samuwele a to lamula vanana va ka Israyeli kona Misipa.

⁷Va di ti pfite koko Vafilista taku, vanana va ka Israyeli va ti sengeletanile kona Misipa, vahombe va Vafilista va to kwelela veya wukela va ka Israyeli; se mbimo yile vanana va ka Israyeli va nga tipfa va to thava ngu mhaka ya Vafilista.

⁸Ngu kumaha keto, vanana va ka Israyeli va to kha vona ka Samuwele: U nga karale ku hi pekela huwa ka MKOMA Txizimu txathu, kasiku a txi hi hulukisa manzani ka Vafilista.

⁹Sekoko Samuwele a to teka txinvutana txo ngadi txi txi mama, e maha ngu txona txotshe mphaxo wo hiswa ka MKOMA; Samuwele a to kombelela va ka Israyeli ka MKOMA, se MKOMA a to mu engisa.

¹⁰Se ku to maheka taku, ngako Samuwele a txi ngadi e maha mningelo wa kuhiswa, Vafilista va to bwaka ve ta lwa ni va ka Israyeli; se ka ditshiku dile, MKOMA a to dhinda ngu kudhinda ka hombe txitimwi ka Vafilista, e va vhinganyisa ha koza ve xulwa masoni ka vanana va ka Israyeli.

¹¹Se vathu va ka Israyeli va to khukha Misipa, ve londeta Vafilista, ve va dayela an'ze hahatshi ka Bheti-Kari.

¹²Sekoko Samuwele a to teka dirigwi e di emisa hagari ka Misipa ni Semi, kambe a to raya ditina[2] daku Ebhenezeri, a txi khene: Kala hawa, MKOMA a hi vhuni.

¹³Ngu kumaha keto, Vafilista va to xulwa ve si swi ve wuya kambe mihinganoni ka Israyeli, nguko dianza da MKOMA di to wukela Vafilista ka otshe masiku a Samuwele.

¹⁴Se madhoropa ale Vafilista va nga ti honyote ka va ka Israyeli, ma tshumetetwe ka va ka Israyeli, kukhukhela Ekroni an'ze Gati; ni mihingano ya Israyeli yi txhatxhisilwe manzani ka Vafilista; se ku to maneka kudikha hagari ka va ka Israyeli ni ka Vaamori.

¹⁵Se Samuwele a to lamula Israyeli ka otshe masiku a kuhanya kwakwe.

¹⁶Se dilembe ni dilembe Samuwele a ti ti tsula eya rendelekela Bheteli, ni Giligali, ni Misipa; se e lamula va ka Israyeli ka otshe makhalo ale.

¹⁷Aniko a ti ti tshumelela Rama, nguko nyumba yakwe yi ti ti koneyo, a ti ti lamula kona va ka Israyeli, se a to aka koneyo txiluvelo txa MKOMA.