Read chopi 1 Samuwele 8 Bible Online

1 Samuwele 8 - chopi bible

1 Samuwele 8

¹Se ku to maheka taku, ngako Samuwele a di kumbile, a to veka vanana vakwe kuva valamuli txitimwi ka Israyeli.

²Se ditina da mwanana wakwe wa matiwula i ti ti Joyeli, kambe ditina da wa wumbidi i ti ti Abhiya; i ti valamuli kona Bherisebha.

³Aniko vanana vakwe kha va tsimbila ngu tinzila takwe; kambe va to wekelela ka timale, ve tumela kuxawa, ve hambanisa wululamo.

⁴Sekoko otshe madhota a ka Israyeli ma to sengeletana, me ta ka Samuwele, kona Rama,

⁵ se va txi kha vona kwakwe: Wona taku se u kumbile, kambe vanana vako kha va tsimbile ngu tinzila tako; hi emisele mfumeli koko, konkuwa, kasiku ene a na hi lamula, kufana ni kule otshe matiko ma ku ni vafumeli.

⁶Kambe dipswi e do di manekile di di bihile masoni ka Samuwele, mbimo yile va nga kha vona: Hi ninge mfumeli, kasiku e hi lamula. Se Samuwele a to maha mkombelo ka MKOMA.

⁷Se MKOMA a to khene ka Samuwele: Engisa mapswi a vathu ka toshe ti va no kugela, nguko kha va lambi awe; kambe ngani va ni lambako, kasiku ani ni si fumi txitimwi kwawe.

⁸Madingano ni yotshe mithumo yile va nga yi maha, kukhukhela ka ditshiku dile ni nga va humisa Egipta kala ka ditshiku da nyamsi, va ni lekile koko, kambe veya thumela simwani sizimu, ngu toneto va nga kumaha nawe.

⁹Konkuwa, koko, engisa dipswi dawe, kambe gela vathu vava, ti to i nava txihi txihena txa mfumeli, wu a no fuma txitimwi kwawe.

¹⁰Se Samuwele a to womba otshe mapswi a MKOMA ka vathu, vale va nga ti kombela mfumeli,

¹¹a txi khene: Txihena txa mfumeli wu a no fuma txitimwi kwanu, ngu txiya: A na teka vanana vanu e va maha va tsimbitisi va sikotxikani sakwe ni kuva vagadhi va mahantxhi akwe, kasiku ve tutuma masoni ka sikotxikani sakwe.

¹²Se a na va veka kuva vathangeli va magumi a mazana ni va mtxhanu wa magumi; ni kuva vadimi va tithembwe takwe, ni kuelula siyalo sakwe, kambe va na mmahela matxhari a yimbi ni tisimbi ta sikotxikani sakwe.

¹³Se a na teka vanana vanu vamahorana e va maha vamahi va mafura o bhumula, ni vabhiki, ni vayoki va mapawu.

¹⁴Kambe a na teka tithembwe tanu to nona, ni mivhinya yanu, ni miolivha yanu, e si ningela ka sithumi sakwe.

¹⁵Se a na teka sa wugumi ka timbewu tanu ni ka mivhinya yanu e si ningela ka mithenwa yakwe[3] ni ka sithumi sakwe.

¹⁶Kambe sithumi sanu sa txiwamna ni sithumi sanu sa txisikati, ni majaha anu o tshura, ni timbongola tanu, a na si teka, e si veka ka mithumo yakwe.

¹⁷A na teka sa wugumi ka mitxhambi yanu, se anu mi na va sithumi sakwe.

¹⁸Sekoko ka ditshiku donedo, mi na dila ngu mhaka ya mfumeli wanu, awu anu mi no va mi di msawute; kambe MKOMA kha na mbi mi engisa ka ditshiku donedo.

¹⁹Hambi keto, vathu kha va lava kuengisa dipswi da Samuwele; se va to kha vona: Ahim-him, kambe ku na ve ni mfumeli txitimwi kwathu.

²⁰Se nathu hi na fana ni otshe mamwani matiko; se mfumeli wathu a na hi lamula, kambe a na thangela masoni kwathu, ni ku hi lwela ka tiyimbi tathu.

²¹Ngako koko, Samuwele a di pfite otshe mapswi a vathu, a toya ma womba masoni ka MKOMA.

²²Sekoko MKOMA a to khene ka Samuwele: Engisa dipswi dawe, u va emisela mfumeli. Sekoko Samuwele a to khene ka vanana va ka Israyeli: Mmwani ni mmwani a na tsule didhoropani kwakwe.