Read cisena Mt. 12 Bible Online

Mt. 12 - cisena bible

Mt. 12

¹Ntsiku ibodzi ya Sabudu, Yezu apita na pakati pa munda wa tirigu. Anyakupfundza ace na kubva njala atoma kupuruza tirigu toera adye.

²Mbwenye afarisi na kupiona penepyo alonga kuna Yezu tenepa: “Lang'ana pinacita anyakupfundza ako. Ali kucita basa ntsiku ya Sabudu, pinthu pinakhondeswa kucita ntsiku ya Sabudu.”

³Yezu atawira tenepa: “Kodi imwe mudzati kuona pidalembwa, na thangwi ya pidacita Dhavidhi na andzace, mudabva iwo njala?

⁴Iye apita N'nyumba ya Mulungu, pabodzi na andzace, mbadya mikate ya ntsembe, pinthu kuti pisakhondeswa na mwambo, mbwenye mbanyantsembe basi akhatawiriswa kudya mikate eneyo.

⁵Peno panango mudzati kuona pidalembwa mu Mwambo wa Mozesi, kuti ntsiku za maSabudu anyantsembe mu Nyumba ya Mulungu, asaunumpha mwambo wa Sabudu, mbwenye iwo mbakhonda kupasiwa thangwi?

⁶Mphapo Ine ndisakupangani kuti: ali pano nkulu kupita Nyumba eneyi ya Mulungu.

⁷ Imwe mbamudapidziwa pisalongeranji pinthu pidalembwa n'kati mwa Bukhu ya Mulungu kuti: ‘Ntsisi na ntsembe, pinafuna ine maka-maka ndi ntsisi,’ mbamudasiya kukonesa anthu a kusowa thangwi.

⁸Thangwi Ine, Mwana wa Munthu, ndine Mbuya wa Sabudu.”

⁹Yezu abuluka penepo mbapita n'nyumba ya kuphemberera.

¹⁰Akhalipo mwenemu mamuna m'bodzi wakulamala djanja. Afarisi akhakhala mwenemu, na kufuna kusaka thangwi ya kusumira nayo Yezu, atoma kumulesera mbam'bvundzisa kuti: “Kodi pisatawirirwa na mwambo, kukondza munthu ntsiku ya Sabudu?”

¹¹Yezu aatawira tenepa: “Mbani pakati panu anagwerwa na bira yace m'mulindi ntsiku ya Sabudu, mbakhonda kuibulusa?

¹²Mphapo dziwani kuti munthu na bira, anafunika maka-maka ndi munthu. Na thangwi eneyo, pisatawirirwa kucita udidi ntsiku za Sabudu.”

¹³Na tenepo, Yezu alonga kuna mamuna kuti: “Fungula djanja yako.” Iye aifungula. Penepo pene yawanga, mbikhala sawa-sawa ninga inango.

¹⁴Na tenepo, afarisi abuluka mbatoma kusaka njira ya kupha nayo Yezu.

¹⁵Yezu mudabva iye penepi, abuluka penepo anthu azinji mbakhantowera. Pontho onsene akhaduwala, Yezu aawangisa nthenda zawo,

¹⁶mbakhaapanga kuti akhonde kumulonga.

¹⁷Penepyo toera pisimbiswe pire pidalonga Mulungu na mulomo wa mporofeta Izaya pa thangwi ya Yezu kuti:

¹⁸“Uyu ndiye nyabasa wanga, adasankhula Ine, wanga wakufunika, ule ananditsandzaisa. Ndinaikha Nzimu wanga muna Iye, pontho Iye anati alonge kuna madzindza onsene, kuti Ine ndinadza kacita kufuna kwanga.

¹⁹Iye nkhabe kudza kalongana na munthu peno kudza kakhuwa. Pontho fala yace nkhabe kudza kabveka na anthu m'miseu.

²⁰Nkhabe kudza katema ntete wa kupanduka, pontho nkhabe kudza kathimisa nyale ya kupucira, mpaka kufuna kwanga kwakunda.

²¹Na tenepo, mbumba yonsene ya pantsi inadza kakhala na cidikhiro muna iye.”

²²Na tenepo, anthu an'dzesera Yezu mamuna m'bodzi wa boli-boli pontho mbakhala bewewe akhadaphatwa na mizimu ya kuipa. Yezu amuwangisa, mamuna mbakwanisa kulonga na kuona.

²³Anthu akhadzumatirwa napyo mbakhabvundzisa kuti: “Kodi siye unowu tayu mwana wa Dhavidhi?”

²⁴Mbwenye afarisi na kubva penepyo, akhadungunya mbakhalonga tenepa: “Ndiye basi Bhelizebhu, nkulu wa madimonyo, anampasa mphambvu za kuthamangisa madimonyo.”

²⁵Yezu na kudziwa manyerezero awo, aapanga tenepa: “Umambo onsene ungagawika okha-okha, unamalisira kufudzika. Sawa-sawambo na nzinda peno nyumba, ingagawika yokhene, inamalisira kufudzika.

²⁶Ngakhala Sathani asathamangisa Sathani, nkhulongera kuti iye agawika ekha ene. Na tenepo, umambo wace unakhala tani pontho na mphambvu?

²⁷Ngakhala Ine ndisathamangisa madimonyo na mphambvu za Bhelizebhu, ana anu asaathamangisa na mphambvu za ani? Na thangwi eneyo, iwo anati akukoneseni.

²⁸Mbwenye ngakhala Ine ndisathamangisa mizimu ya kuipa na mphambvu za Nzimu wa Mulungu, nkhulongera kuti Umambo wa Mulungu wafika muna imwe.

²⁹“Peno, munthu anakwanisa tani kuphweta nyumba ya ndzace wa mphambvu toera kum'bera pinthu pyace, pakutoma mbadzati kum'manga? Angamala, anakwanisa kum'bera n'nyumba mwace.

³⁰“Anakhonda kukhala na Ine, unowu ndiye nyamalwa wanga. Anakhonda kundiphedza kugumanya, asamwaza.

³¹Na thangwi eneyo, ndisakupangani kuti: kudawa peno kuxola konsene kunalekererwa. Mbwenye ule anaxola Nzimu Wakucena, nkhabe kudza kalekererwa.

³²Onsene ale anandilonga kuipa Ine, Mwana wa Munthu, anadza kalekererwa. Mbwenye ale anapokanya Nzimu Wakucena, nkhabe kudza kalekererwa, pantsi pano na kudzulu kwene.”

³³“Lang'anani, muti wadidi usabala nsapu wadidi, pontho muti wa kuipa usabala nsapu wa kuipa. Thangwi muti usadziwika na nsapu wace.

³⁴Dzindza ya m'bobo! Munalonga tani pinthu pyadidi, anthu a kuipa ninga imwe? Thangwi mulomo usalonga pire pidadzala muntima.

³⁵Munthu wadidi asabulusa pinthu pyadidi pidakoya iye muntima wace wadidi. Mbwenye munthu wa kuipa asabulusambo pinthu pya kuipa pidakoya iye muntima wace wa kuipa.

³⁶Ndinakupangani kuti ntsiku inatonga Mulungu dziko, m'bodzi na m'bodzi analimira pamaso pa Mulungu na mafala ace onsene a kuipa akhadalonga iye.

³⁷Thangwi mafala ako ndiwo anadza kakupemberesa peno kakukonesa.”

³⁸Na tenepo, anyakudziwisa a Mwambo na afarisi aphemba Yezu kuti: “Mpfundzisi, tipangizeni cidzindikiro cibodzi ca cirengo.”

³⁹Yezu aatawira tenepa: “Anthu a midzidzi ino mbakuipa pontho mbakhonda kunyindirika! Asaphemba cidzindikiro ca cirengo, mbwenye nkhabe cidzindikiro cinango cinafuna kudza kaona iwo, kupiringana cidzindikiro ca mporofeta Djona.

⁴⁰Thangwi sawa-sawa ninga Djona amala ntsiku zitatu, masiku na masikati m'mimba mwa nyama ikulu ya m'madzi, tenepambo Ine Mwana wa Munthu, ndinadza kakhala ntsiku zitatu, masiku na masikati, pantsi pa mataka.

⁴¹Pa ntsiku ya kutongwa kwa dziko na Mulungu, anthu a ku Ninivi anadza kalamuka mbakonesa anthu a dziko ino, thangwi abva kucenjezwa kwawo na Djona, mbachunyuka kudawa kwawo. Mbwenye ali pano nkulu kupiringana Djona.

⁴²Pontho mambo wa nkazi wa ku khundu ya bangwe anati aatonge anthu a ntsiku zino mbaakonesa. Thangwi iye abwera kubulukira kudadhoroma dziko toera kudza kabva udziwisi wa Salomau, mphapo cincino lang'anani, ali pano nkulu kupiringana Salomau.”

⁴³“Nzimu wa kuipa ungabuluka muna munthu, usaenda mbundzendza-ndzendza n'thando kusaka mbuto ya kupuma. Ungakhonda kugumana mbuto,

⁴⁴usalonga kuti: ‘Ndinabwerera ku nyumba kwanga kudabuluka ine.’ Ungafika, asaigumana nkhabemo munthu, yamala kupsairwa na kusasanyirwa.

⁴⁵Na tenepo, unabuluka mbuyenda kakwata mizimu inango minomwe ya kutekera kakamwe kupiringana iye, mbipita yonsene kakhala mwenemu. Penepo makhaliro ace munthu ule, anatekereratu kakamwe kupiringana makhaliro ace akutoma. Ndipyo pinafuna kudza kacitika kuna anthu awa a kuipa a ntsiku zino.”

⁴⁶Pa n'dzidzi ukhalonga Yezu na mbumba, afika abale ace na mai wace mbakhala kunja, mbakhasaka kuti alonge na Iye.

⁴⁷Na tenepo, munthu m'bodzi aenda kampanga Yezu kuti: “Mai wako na abale ako ali kunja uku, asafuna kulonga na iwe.[7]”

⁴⁸Yezu abvundzisa tenepa: “Mbani mai wanga, pontho mbani abale anga?”

⁴⁹Pakumala athonya anyakupfundza ace mbalonga tenepa: “Awa ndiwo mai wanga na abale anga.

⁵⁰Thangwi ule anacita kufuna kwa Baba wanga ali kudzulu, unowu ndiye m'bale wanga wa mamuna, mwana-nkazi wanga, na mai wanga.”