Read cisena Mt. 13 Bible Online

Mt. 13 - cisena bible

Mt. 13

¹Ntsiku eneyi ibodzi-bodzi, Yezu abuluka ku nyumba mbaenda kakhala pantsi n'gombe mwa nyandza.

²Na tenepo, wagumanyikana mwinji ukulu wa anthu n'khundu mwace. Na thangwi eneyo, Iye akwira m'bote mbakhala pantsi, mbumba yonsene ikhakhala mbidalimira n'gombe mwa nyandza.

³Pontho, Iye akhapfundzisa pinthu pizinji na misanje, mbalonga tenepa: “Mamuna m'bodzi abuluka kwenda kawaza mbeu.

⁴Mukhawaza iye, mbeu zinango zagwa n'khundu mwa njira. Na tenepo, zabwera mbalame mbamala kuzidzonkhona.

⁵Khundu inango ya mbeu yagwa pa mbuto ya myala, pakhagumanika mataka pang'ono basi. Penepo mbeu yamera na mwansanga thangwi mataka akhadacepa.

⁶Mbwenye na kupisa kwa dzuwa, umera wamala kupya mbuuma na thangwi ya kusowa michici.

⁷Khundu inango ya mbeu yagwa pa minga. Minga yakula, mbeu mbizicimwana kufantsa.

⁸Mbwenye mbeu inango yagwa pa mataka adidi. Na tenepo, yabala misapu: makumatatu, makumatanthatu, inango dzana pa mbeu ibodzi.”

⁹Yezu athimiza na kulonga kuti: “Ule ana makutu a kubva, mbabve!”

¹⁰Na tenepo, Yezu abvundziswa na anyakupfundza ace kuti: “Thangwi yanji musalonga na misanje kuna anthu?”

¹¹Yezu atawira tenepa: “Kuli imwe, mwapaswa udziwisi wa kudziwa pyakubisala pya Umambo wa kudzulu, mbwenye iwo nkhabe.

¹²Thangwi ule anapyo, anapaswa pontho pinango, pontho anakhala na pizinji. Mbwenye ule adapisowa, anapokoserwa na pire pyene pina iye.

¹³Ndi thangwi eneyo ndisaapanga na misanje. “ ‘Thangwi asaona, mbwenye nkhabe onesesa. Asabva, mbwenye nkhabe bvesera, pontho nkhabe bvesesa.’

¹⁴Na tenepo, pyasimbiswa kuna iwo pire pikhadapangwa mporofeta Izaya na Mulungu kuti: “ ‘Imwe munabva, mbwenye nkhabe kudza kabvesesa tayu. Munaona, mbwenye nkhabe kudza kaonesesa tayu.

¹⁵ Thangwi mbumba iyi yauma ntima. Yafunga makutu mbiphopa maso. Mbapidakhonda kukhala tenepa, maso awo mbadaona, makutu awo mbadabva. Pontho mbadakwanisa kudzindikira na ndzeru zawo, mbabwera kuna Ine, Ine mbidaawangisa.’

¹⁶Mbwenye kutsandzaya nkhwanu imwe, thangwi maso anu ali kuona, makutu anu ali kubva.

¹⁷Thangwi ndimo mwene Ine ndisakupangani kuti: Maporofeta azinji, na anthu azinji akulungama, akhafunambo kuona penepi pinaona imwe, mbwenye acimwana kupiona. Pontho akhafunambo kubva pinabva imwe, mbwenye acimwana kupibva.

¹⁸“Bveserani, mphapo, pinalongera nsanje wa nyakuwaza mbeu.

¹⁹Ale anabva Mphangwa Zadidi za Umambo wa Mulungu mbakhonda kuzibvesesa, asabwera nyamalwa kudza kabulusa pire pidapita m'mitima. Eneyi ndiyo mbeu idagwa m'mbale mwa njira.

²⁰Mbeu idagwa pa mataka a myala isalongera ale adabva Mphangwa Zadidi mbazitambira na kukomerwa.

²¹Mbwenye nkhabe khala n'dzidzi ukulu ene, thangwi nkhabe michici. Na tenepo, nyatwa zingaagwera, peno angachingwa na thangwi ya fala ya Mulungu, asabwerera n'nduli na mwansanga.

²²Mbeu idabzalwa pakati pa minga, isalongera ale anabva Mphangwa Zadidi mbakhonda kubala misapu, na thangwi ya kukula kwa pinthu pya kunyerezera pya padziko ino, pontho na kusaka kupfuma, pisacita kuti fala ya Mulungu ikhonde kufantsa pontho ikhonde kubala misapu.

²³Mbwenye mbeu idagwa pa mataka adidi isalongera ale anabva fala ya Mulungu mbaibvesesa. Na tenepo, awa asabaladi misapu yakukwana, makumatatu, anango makumatanthatu, anangombo dzana pa mbeu ibodzi.”

²⁴Yezu alonga nsanje unango kuna anthu kuti: “Umambo wa kudzulu walandana na mamuna m'bodzi adabzala mbeu yadidi m'munda mwace.

²⁵Mbwenye na masiku mwace, anthu onsene mbakhagona, abwera nyamalwa wace mbabzala tsanga ya nyakasongole pakati pa tirigu, mbaenda pyace.

²⁶Pidakula umera wa tirigu mbutumbuka, tsanga ya nyakasongole yaonekambo.

²⁷“Na tenepo, abwera anyabasa a mwanacinthu munda, mbampanga tenepa: ‘Mbuya, kodi mbeu idabzala imwe m'munda mwanu ikhali yadidi tayu? Mphapo tsanga iyi ya nyakasongole yabuluka kupi?’

²⁸“Mbwenye iye aatawira tenepa: ‘Ndi nyamalwa m'bodzi adacita penepi.’ “Na tenepo, anyabasa am'bvundza kuti: ‘Musafuna kuti tiyende kaidule?’

²⁹“Mwanacinthu munda aatawira kuti: ‘Nkhabe, isiyeni! Gopa pa kudula nyakasongole munadza kadulambo pabodzi na tirigu ene.

³⁰Siyani pyonsene pikule pabodzi, mpaka n'dzidzi wa kubvuna. Pa kubvuna, ndinaapanga anyakubvuna kuti pakutoma agumanye nyakasongole mbamanga mapuli toera apisiwe na moto. Angamala agumanyembo tirigu aikhe n'cikwa mwanga.’ ”

³¹Yezu aapanga nsanje unango, mbalonga tenepa: “Umambo wa kudzulu walandana na mbeu ibodzi inacemerwa muxtarda idabzaliwa na mamuna m'bodzi m'munda mwace.

³²Iyo ndi mbeu ing'ono kakamwe kupita mbeu zinango. Mbwenye ingamera isakuliratu kakamwe kupiringana mbeu zinango zonsene, mpaka kufikira kukhala muti wakukhalambo na nthawi. Mbalame mbizibwera kamanga ntsandza zawo mu nthawi zace.”

³³Yezu aapanga nsanje unango, mbalonga kuti: “Umambo wa kudzulu walandana na ntombwe wa kutupisa mikate, udakwata nkazi mbaubvungaza na ntsengwa zitatu za ufa, mpaka kutupisa ufa onsene.”

³⁴Yezu alonga kuna anthu, pinthu pyonsene ipi na misanje. Nkhabe cikhaapanga Iye mbakhonda kulonga na misanje.

³⁵ Pyonsene ipi ndi toera pisimbiswe pire pikhadalonga mporofeta kuti: “Ndinadza kalonga na misanje na iwo, pontho ndinadza kafokotoza pinthu pidabisala kutomera pakutoma kwa dziko.”

³⁶Na tenepo, Yezu pakumala kupanganizana na mbumba, aenda ku nyumba. Penepo afika anyakupfundza ace mbam'phemba kuti: “Tipfundziseni pinalongera nsanje wa nyakasongole, m'munda.”

³⁷Yezu aatawira tenepa: “Adabzala mbeu yadidi ndine, Mwana wa Munthu.

³⁸Munda ndi dziko ya pantsi pano. Mbeu yadidi ndi ana a Umambo wa Mulungu. Tsanga ya nyakasongole ndi ana a Nyamalwa.

³⁹Nyamalwa adabzala nyakasongole ndi Dyabu. Kubvuna ndi kumala kwa dziko. Anyakubvuna ndi anju za Mulungu.

⁴⁰Ninga nyakasongole asagumanyiwa mbaenda kapisiwa pa moto, tenepa pinacitikambo pakumala kwa dziko.

⁴¹Ine, Mwana wa Munthu, ndinatuma anju zanga kwenda kabulusa mu umambo pyonsene pinagwegwedusa, na onsene anadawa,

⁴²toera aaponye mu moto wa kugaka. Mwenemu anthu anati alire na kukukuta mano.

⁴³Na tenepo, anthu akulungama anayetimira ninga dzuwa mu Umambo wa Babawo. Ana makutu a kubva mbabve.”

⁴⁴“Umambo wa kudzulu walandana na mpfuma yakubisiwa m'munda. Munthu anailokota asaibisa pontho. Mbaenda na kukomerwa konsene kagulisa pinthu pyace pyonsene pina iye, mbagula munda unowu.

⁴⁵Pontho Umambo wa kudzulu usalandaniswa na mamuna m'bodzi nyamalonda anasaka myala yakubalika kakamwe.

⁴⁶Na tenepo, angaugumana mwala wa ntengo ukulu, asaenda kagulisa pinthu pyonsene pina iye, mbagula mwala unowu.”

⁴⁷“Pontho, Umambo wa kudzulu usakhala ninga kokota inagwisirwa m'bara mbikokota nyama za m'madzi za ntundu onsene.

⁴⁸Ingadzala kokota na nyama, anyakokota asaikwewa kuntunda, mbakhala pantsi, mbatoma kuzisankhula. Nyama zadidi mbaziyikha m'pitundu, mbwenye zakuipa mbazitaya kunja.

⁴⁹Ndi sawa-sawambo ninga pinafuna kudza kacitika pakumala kwa dziko. Zinabwera anju za Mulungu, mbizibulusa anthu akuipa pakati pa anthu akulungama.

⁵⁰Na tenepo, iwo anaaponya anthu akuipa mu moto wa kugaka. Mwenemu anthu anati alire na kukukuta mano.”

⁵¹Yezu aabvundza anyakupfundza ace kuti: “Mwapibvesa pyonsene ipi?” Iwo antawira tenepa: “Ande, Mbuya!”

⁵²Na tenepo, Yezu aapanga kuti: “Na thangwi eneyo, nyakudziwisa onsene wa Mwambo, anatawira cipfundzo ca Umambo wa kudzulu, asalandana na baba wa pa nyumba anadziwa kubulusa pa mpfuma yace pinthu pipsa na pyakale.”

⁵³Yezu pidamala iye kulonga misanje eneyo abuluka penepo.

⁵⁴Pidafika iye ku dziko kwawo atoma kupfundzisa mbumba n'kati mwa nyumba ya kuphemberera. Ale akham'bvesera akhadzumatirwa napyo mbakhalonga tenepa: “Augumana kupi udziwisi unowu, na mphambvu zenezi za kucita pirengo?

⁵⁵Siye unowu tayu mwana misiri karipintero? Mai wace siye Mariya tayu? Pontho abale ace siwo enewa anacemerwa Tiyago na Zuze na Simau na Djuda tayu?

⁵⁶Anaakazi ace onsene nkhabe kukhala na ife kuno? Mphapo pyonsene ipi pyabulukira kupi?”

⁵⁷Na tenepo, iwo akhaipirwa na thangwi yace. Mbwenye Yezu aapanga tenepa: “Mporofeta asalemebza mbuto zonsene. Mbwenye nkhabe kulemebza ku dziko kwace pontho na pa nyumba pace.”

⁵⁸Na thangwi ya kukhonda kutawira kwawo, Yezu akhonda kucita pirengo pizinji kweneko.