Read cisena Mt. 17 Bible Online

Mt. 17 - cisena bible

Mt. 17

¹Pakupita ntsiku zitanthatu, Yezu akwata Pedhru, na amuna awiri muubale mwawo anacemerwa Tiyago na Juwau, okha ene, mbaenda na iwo pa phiri yakulapha kakamwe.

²Penepo Yezu aphinduka makhaliro ace pamaso pawo. Nkhope yace yatoma kuyetima ninga dzuwa, nguwo zace zadza kaceneratu kakamwe ninga cieza.

³Pa n'dzidzi ubodzi-bodzi, abulukira patsogolo pawo Mozesi na Eliya, mbakhaceza na Yezu.

⁴Na tenepo, Pedhru alonga kuna Yezu kuti: “Mbuya, mphyadidi tikhale pyathu pano! Mungafuna ine ndinamanga makumbi matatu. Ibodzi yanu, ibodzi ya Mozesi, inango ya Eliya.”

⁵Pedhru mbadzati kumala kulonga, khole ibodzi ya kuyetimira yaagudumira. Pa khole pabveka fala ibodzi ikhalonga tenepa: “Uyu ndi Mwana wanga wakufunika ananditsandzaisa. M'bvereni!”

⁶Anyakupfundza a Yezu na kupibva, agopa kakamwe mbakotamisa nkhope mpaka pantsi, mbamulambira.

⁷Mbwenye Yezu aafendedzera dhuzi mbaakhuya mbalonga kuti: “Lamukani! Lekani gopa!”

⁸Pidalamuka iwo, hadaonabve munthu unango tayu. Aona Yezu ekha basi.

⁹Mukhachita iwo pa phiri, Yezu aapanga tenepa: “Lekani kupanga munthu m'bodzi pire pidaona imwe, mpaka kufikira kuti Ine, Mwana wa Munthu, ndalamuka pa kufa.”

¹⁰Na tenepo, anyakupfundza ace am'bvundzisa kuti: “Thangwi yanji mphapo anyakudziwisa a Mwambo asalonga kuti pisafunika Eliya abwere pa kutoma?”

¹¹Yezu aatawira tenepa: “Ndimo mwene, Eliya anabwera kudza kasasanyira pinthu pyonsene.

¹²Mbwenye Ine ndisakupangani kuti: Eliya abwera kale, pontho iwo acimwana kun'dzindikira. Mbwenye ancitira pyonsene pikhafuna iwo. Tenepambo, Ine, Mwana wa Munthu, ndinadza kaoneswa nyatwa na iwo.”

¹³Kubulukira penepo, anyakupfundza ace adza kadzindikira kuti Yezu akhalonga Juwau Bhatixta.

¹⁴Mudafika iwo pa mbuto ikhakhala mwinji ukulu wa anthu, abwera mamuna m'bodzi kuna Yezu, mbagodama patsogolo pace, mbalonga tenepa:

¹⁵“Mbuya, ndibverenimbo ntsisi. Thangwi mwana wanga asagwa njiri mbathabuka pikulu. Kazinji kene asagwa pa moto, panango m'madzi.

¹⁶Ndabwera na iye kuna anyakupfundza anu, mbwenye iwo ancimwana kumuwangisa.”

¹⁷Yezu atawira tenepa: “Imwe anthu akusowa cikhulupiro! Ndinakhala na imwe mpaka lini? Mpaka lini ndinakuonerani nyatwa? M'bwereseni pano m'phale.”

¹⁸Na tenepo, Yezu aipwekera dimonyo, iyo mbibuluka m'manungo mwa m'phale. Kutomera n'dzidzi unowu, m'phale awanga.

¹⁹Buluka penepo anyakupfundza a Yezu anfendedzera mbam'bvundzisa pa khundu kuti: “Thangwi yanji ife taucimwana kuubulusa nzimu unowu?”

²⁰Yezu aatawira tenepa: “Ndi thangwi kukhulupira kwanu kwacepa. Ndimo mwene ndisakupangani kuti mungakhala na cikhulupiro ca kulandana na thunga ya mbeu ing'ono,[10] munakwanisa kupanga phiri iyi kuti: ‘Buluka pano uyende kule,’ iyo inaenda. Nkhabe cinthu cinacimwanika kuna imwe.

²¹[Mbwenye khaindi eneyi ya mizimu ya kuipa, isabuluka basi na miphembero na kupimana cakudya.[11]”]

²²Pikhakhala Yezu Kirixtu pabodzi na anyakupfundza ace ku Galileya, aapanga tenepa: “Ine, Mwana wa Munthu ndinati ndiperekwe m'manja mwa anthu.

²³Iwo anadza kandipha. Mbwenye pa ntsiku ya citatu ndinalamuka pa kufa.” Na tenepo anyakupfundza ace atsukwala napyo pikulu.

²⁴Pidafika Yezu na anyakupfundza ace ku nzinda wa Kafaranaumi, anyakukumbusa misonkho a nyumba ya ntsembe afendedzera Pedhru mbam'bvundza kuti: “Mpfundzisi wanu nkhabe kulipa nsonkho wa nyumba ya ntsembe?”

²⁵Pedhru aatawira kuti: “Ande, asalipa.” Pakupita kwace Pedhru n'nyumba, Yezu ndiye adatoma kum'bvundzisa kuti: “Simau, usaona tani? Ndi ani asatongwa kulipa nsonkho kuna amambo a padziko? Ndi anthu a dzindza ya mambo peno ndi anyaphena?”

²⁶Pedhru antawira kuti: “Ndi anyaphena.” Yezu ampanga kuti: “Ngakhala ndi tenepa, anthu a dzindza ya mambo nkhabe tongwa kupereka nsonkho.

²⁷Mbwenye toera anthu akhonde kunyerezera pyakuipa kuna ife, ndoko ku nyandza, ponya cimedzo cako m'madzi. Nyama yakutoma inamanga iwe na cimedzo, ibuluse uifungule n'kanwa mwace. Mwenemu unagumana kobiri ya parata, ibuluse uwapase toera kulipa nayo nsonkho wako na wanga.”