Read cisena Mt. 2 Bible Online

Mt. 2 - cisena bible

Mt. 2

¹Yezu abaliwa ku cisa ca Bheleya, ku dziko ya Djudeya, pa midzidzi ikhatonga mambo Herodhi. Pakupita ntsiku zingasi Yezu mbadabalwa kale, abwera ku Djerusalema anthu anyakudziwisa pya nyenyezi, a kumabulukira dzuwa. Pidafika iwo,

²abvundzisa tenepa: “Ali kupi mambo wa madjuda adabaliwa cincino? Thangwi ife taiona nyenyezi yace kumabulukira dzuwa. Na tenepo, tabwera kamulambira.”

³Mambo Herodhi, na kupibva pinthu penepi, atutumuka napyo pikulu iye na anthu anango onsene a mu nzinda unowu wa Djerusalema.

⁴Na thangwi eneyo, mambo Herodhi acemeresa akulu onsene aanyantsembe na anyakudziwisa a Mwambo a mbumba, mbaabvundza kuti: “Kodi ndipangeni, ndi kupi kunafuna baliwa Kirixtu?”

⁵Iwo antawira tenepa: “Anabaliwa ku Bheleya, mu dziko ya Djudeya.” Thangwi Mulungu alonga na mporofeta Mikeya kuti:

⁶“ ‘Iwe Bheleya, cisa ca dziko ya Djudeya, leka kunyerezera kuti iwe ndiwe cinzinda cing'ono-ng'ono kakamwe pakati pa mizinda inango mikulu mu Djudeya. Thangwi n'dziko mwako, ndimo munafuna buluka N'tsogoleri anafuna kumbiza mbumba yanga ya Izarayeli.’ ”

⁷Buluka penepo, mambo Herodhi acemeresa pa khundu ale anyakudziwisa pya nyenyezi a kumabulukira dzuwa, mbaabvundzisa na kuaphemba kuti ampange mwadidi n'dzidzi udatoma iwo kuona nyenyezi.

⁸Pakumala penepi, aatuma kuti aende ku dziko ya Bheleya, mbaapanga tenepa: “Ndokoni mukhabvundzise mwadidi mwene, mungan'gumana, bwererani na kuno mundidziwisembo toera ine ndiyendembo kamulambire.”

⁹Pakumala kubva pyonsene pikhalonga mambo, anyakudziwisa nyenyezi abuluka mbaenda ulendo wawo. Penepo, iwo aona kuti nyenyezi ire ikhaatsogolera pakubuluka kwawo kumabulukira dzuwa, yaabulukira pontho kutsogolo kwawo mbikhaatsogolera mpaka kufikira kulimira cidzulu-dzulu pa nyumba ikhagumanika mwana.

¹⁰Na tenepo, iwo, na kuiona pontho nyenyezi, akomerwa pikulu kakamwe.

¹¹Pidafika iwo penepo, apita n'nyumba, agumana mwana na Mariya, mai wace. Iwo atoma kugodamira mwana na kumulambira. Pidamala iwo, abulusa mbapereka miyoni yawo ya ntengo ukulu kakamwe, inacemerwa oro, insensu[3] na mira.[4]

¹²Buluka penepo, Mulungu aacenjeza mu ndoto kuti aleke kwenda kaonana pontho na mambo Herodhi. Na tenepo, iwo abwerera na njira inango kwenda ku dziko kwawo.

¹³Pikhabwerera iwo kwenda ku dziko kwawo, anju m'bodzi wa Mulungu abwera kuna Zuze, mu ndoto, mbampanga tenepa: “Lamuka, kwata mwana na mai wace uthawire ku Idjipitu. Khala kweneko mpaka kufikira ntsiku inalonga ine pontho kuti ubwerere, thangwi Herodhi anadza kasaka mwana toera amuphe.”

¹⁴Zuze alamuka, akwata mwana na mai wace, mbaenda na iwo ku Idjipitu na masiku,

¹⁵ mbakhala kweneko mpaka kufa kwa mambo Herodhi. Na tenepo, pyacitika pire pikhadalonga Mulungu kale ene na mulomo wa mporofeta kuti: “Ndacemera mwana wanga kuti abuluke ku Idjipitu.”

¹⁶Mambo Herodhi mudapyona iye kuti anyengezwa na anthu anyakudziwisa pya nyenyezi a kumabulukira dzuwa, akhala wakuipirwa. Mbatoma kubulusa mwambo wace wa kuphesa ana onsene akhagumanika na pyaka piwiri kwenda pantsi mu dziko ya Bheleya na m'pisa pinango pya n'khundu-n'khundu, ninga mukhadapangirwa iye na amuna a kumabulukira dzuwa, pa thangwi ya n'dzidzi udatoma kuonekera nyenyezi.

¹⁷Na tenepo, pyasimbiswa pire pikhadalonga mporofeta Jeremiya kuti:

¹⁸“Ku Ramaa kwabveka n'khuwo. Cikhali ciriro na kubva kupha pikulu kwa mai Rakeli, na thangwi ya kuferwa na anace. Na tenepo, iye asakhonda kumatamizwa thangwi anace onsene amala kufa.”

¹⁹Pa kufa kwa Herodhi, anju m'bodzi wa Mulungu aonekera kuna Zuze mu ndoto ku Idjipitu,

²⁰mbampanga tenepa: “Lamuka, kwata mwana na mai wace uyende na iwo ku dziko ya Izarayeli, thangwi afa ale akhafuna kupha mwana.”

²¹Zuze alamuka, akwata mwana na mai wace, mbabwerera kwenda na iwo ku dziko ya Izarayeli.

²²Mbwenye Zuze, na kubva kuti pa kufa kwa mambo Herodhi adapita pa mpando pace ndi mwana wace anacemerwa Arikilau, agopa kubwerera ku dziko eneyo. Na thangwi eneyo, Mulungu amulotesa pontho. Iye alamuka mbaenda ku dziko ya Galileya,

²³mbaenda kakhala mu nzinda wa Nazareti. Tenepa, pyasimbiswa pire pikhadalongwa na maporofeta kuti: “Iye anadza kacemerwa wa ku Nazareti.”