Read cisena Mt. 21 Bible Online

Mt. 21 - cisena bible

Mt. 21

¹Mukhakhala iwo dhuzi na Djerusalema, mbafika pa cisa ca Bhetifaji, pa phiri ya Mulivera, Yezu atuma anyakupfundza ace awiri,

²mbaapanga tenepa: “Ndokoni ku cisa ciri kutsogolo kwanu. Pinacita imwe pite mwenemu, munagumana buru ikazi yakumangirwa, ina mwana wace. Asudzuleni mubwere na iwo kuno.

³Mungabvundziwa na munthu, longani kuti Mbuya asaafuna. Penepo pene anakusiyani mbamudza na iwo.”

⁴Ipi pyacitika toera pisimbiswe pikhadalongwa na mporofeta kuti:

⁵“Longani kuna nzinda[18] wa Siyau kuti: ‘Lang'ana, Mambo wako ali kudza kuna iwe! Ali kudza mbacepeseka padzulu pa buru, padzulu pa mwana wa buru, mwana wa cinyama cakukwata mitolo.’ ”

⁶Anyakupfundza ace aenda, mbacita ninga mudapangwa iwo na Yezu.

⁷Iwo aibweresa buru ikazi na mwana buru, mbakwata nguwo zawo mbaziyikha pa nsana pa pinyama, Yezu mbakwira mbakhala padzulu pa nguwo.

⁸Mwinji ukulu wa anthu ukhathasika nguwo zawo n'njira, anango mbakhatema masandzu a miti, mbakhaathasika n'njira.

⁹ Na tenepo, mwinji wa anthu akhaenda kutsogolo, na ale akhabwera n'nduli mwa Yezu, akhakhuwa tenepa: “Hosana kuna Mwana wa Dhavidhi! Mbasimbwe ule anadza mu dzina ya Mbuya! Hosana kudzulu kakamwe!”

¹⁰Yezu mudapita Iye mu Djerusalema, anthu onsene a mwenemu adzudzumika mbakhabvundza kuti: “Mbani unowu uyu?”

¹¹Mbumba ikhatawira tenepa: “Uyu ndi Yezu, mporofeta wa ku cisa ca Nazareti, ku nzinda wa Galileya.”

¹²Yezu apita mu Nyumba ya Mulungu, mbatoma kuthamangisa onsene akhagula na akhagulisa mwenemu. Abhoma meza za ale akhacinja kobiri, pontho na mipando ya ale akhagulisa nkhangaiwa,

¹³mbaapanga tenepa: “Pyalembwa m'Bukhu ya Mulungu kuti: ‘Nyumba yanga inadza kacemerwa nyumba ya kuphemberera,’ mbwenye imwe mwaisanduza kuti ikhale ‘mphako ya kubisalira mambava. ’ ”

¹⁴Mwenemu, mu Nyumba ya Mulungu, maboli-boli na anyakulamala akhaenda kuna Yezu, Iye mbaawangisa.

¹⁵Mbwenye akulu aanyantsembe na anyakudziwisa a Mwambo aipirwa pikulu na kuona pinthu pyakudzumisa pikhacita Yezu, pontho na kubva kukhuwa kukhacita ana ang'ono mu Nyumba ya Mulungu, mbakhalonga kuti: “Hosana Mwana wa Dhavidhi!”

¹⁶Na tenepo, iwo abvundzisa Yezu kuti: “Usapibva pinalonga ana awa?” Yezu aatawira tenepa: “Ande, ndisapibva. Imwe cipo mudzati kupiona pidalembwa n'kati mwa Bukhu ya Mulungu kuti: “Mulungu acita kuti ana ang'ono na ana a pabere apase mbiri Mulungu?”

¹⁷Na tenepo, Yezu aasiya mbabuluka mu nzinda unowu mbaenda kagona ku cisa ca Bhetanya.

¹⁸Mangwana mwace na macibese ene, pa kubwerera kwace kwenda ku nzinda, Yezu abva njala.

¹⁹Na kuona muti ubodzi wa nsambvu n'khundu-n'khundu mwa njira, aufendedzera dhuzi. Mbwenye agumana masamba basi, nkhabe misapu. Na tenepo, Yezu aupikirira mbaupanga kuti: “Na lini unadza kabala pontho nsapu!” Pa n'dzidzi ubodzi-bodzi muti wauma.

²⁰Anyakupfundza a Yezu na kupiona penepyo, adzumatirwa napyo mbabvundzisa kuti: “Kodi wauma tani muti unowu wa nsambvu pa n'dzidzi ubodzi ene?”

²¹Mbwenye Yezu aatawira kuti: “Ndimo mwene ndisakupangani kuti, mungakhulupira mbamukhonda kupenula, munacita pinthu pikulu kakamwe kupiringana ipi pidacitira ine muti. Na tenepo, munakwanisa kupanga phiri iyi kuti: ‘Buluka penepo ugwe m'bara.’ Penepyo pinacitika.

²²Mungakhala na cikhulupiro, munatambira pyonsene pinaphemba imwe pa miphembero.”

²³Yezu apita mu Nyumba ya Mulungu, mbatoma kupfundzisa. Penepo anfendedzera dhuzi akulu aanyantsembe na mathubu a mbumba, mbam'bvundza tenepa: “Kodi iwe uli kucita pinthu penepi na mphambvu za utongi wa ani? Mbani akupasa mphambvu za utongi unowu?”

²⁴Yezu atawira tenepa: “Ine ndisafunambo kukubvundzani. Munganditawira, Ine ndinakupangani mbani adandipasa mphambvu za utongi zinacita na Ine pinthu penepi.

²⁵Batixmu ya Juwau ikhali ya kupi? Ya kudzulu peno ya anthu?” Iwo akhaketesana okha-okha, mbakhalonga tenepa: “Tingalonga kuti ndi ya kudzulu, iye anadza kabvundza kuti: ‘Mphapo thangwi yanji imwe mwakhonda kuntawira Juwau?’

²⁶Mbwenye tingalonga kuti: Ndi ya anthu, mbaticiteni mphole na mbumba. Thangwi onsene asan'dziwa Juwau ninga mporofeta.”

²⁷Na tenepo, iwo antawira Yezu kuti: “Nkhabe kupidziwa.” Yezu aatawira kuti: “Inembo nkhabe kukupangani na pang'ono pene, kuti ndi mphambvu za utongi wa ani zinacita na Ine pinthu penepi.”

²⁸“Musaona tani? Mamuna m'bodzi akhakhala na ana ace awiri amuna. Aenda kuna mwana wace wakutoma mbampanga kuti: ‘Mwana wanga, ndoko ukhaphate basa lero ku munda wa mauva.’

²⁹Iye atawira tenepa: ‘Nkhabe funa.’ Mbwenye pa kupita n'dzidzi pang'ono asandikika, mbaenda.

³⁰Baba aenda kapanga mwana waciwiri pibodzi-bodzi. Iye antawira kuti: ‘Ande, ndinaenda.’ Mbwenye hadaenda tayu.”

³¹Yezu aabvundza: “Mbani pa ana awiri awa adacita kufuna kwa baba wace?” Iwo antawira kuti: “Ndi wakutoma.” Yezu aapanga kuti: “Ndimo mwene, Ine ndisakupangani kuti ale anyakukumbusa misonkho na ale akazi anacita ulukwali anakuthangirani kupita mu Umambo wa Mulungu.

³²Thangwi Juwau abwera kudza kakupangisani njira yakulungama, imwe mwan'khonda. Mbwenye anyakukumbusa misonkho na akazi anacita ulukwali antawira. Pontho pa pyonsene pidamala kuona imwe ipi, imwe mwacimwana kuchunyuka, pontho mwakhonda kuntawira.”

³³Bvani nsanje unango: “Akhalipo mamuna m'bodzi, baba wa pa nyumba, adacheka miti ya mauva m'munda mwace. Auzungulira na mpanda, mbacita mbuto ibodzi ya kukamuliramo mauva toera kucita vinyu, pontho mbamanga cirindo. Buluka penepo, akwata munda mbaurikisa na anthu anango anyakulima, pidamala iye mbaenda ulendo wace.

³⁴Pidakwana iwo n'dzidzi wa kubulusa mauva, mwanacinthu munda atuma anyabasa ace kuna anyakulima, toera aende kapaswe misapu.

³⁵“Mbwenye anyakulima aphata anyabasa ale, m'bodzi wawo mbaphekeswa, unango mbaphiwa, pontho unango mbamenyiwa na myala.

³⁶Na tenepo, mwanacinthu munda atuma anyabasa anango azinji kupita akutoma. Mbwenye anyakulima aacita pibodzi-bodzi.

³⁷Pakumalisa, aatumira mwana wace ene, mbalonga kuti: ‘Mwana wanga, iwo anati amulemedze.’

³⁸“Mbwenye anyakulima pidamuona iwo mwana, alonga okha-okha kuti: ‘Uyu ndiye mwanaciro unthaka! Tendeni timuphe, tisale na unthaka wace.’

³⁹Na tenepo, iwo amphata, mbamponya kunja kwa munda wa mauva, mbamupha.

⁴⁰“Mphapo angabwera mwanacinthu munda, anaacita tani anyakulima enewa?”

⁴¹Iwo atawira tenepa: “Anaapha mwa upandu anthu enewa a kuipa, mbakwata munda wa mauva mbaurikisa na anyakulima anango, ale anakwanisa kumpasa phindi yace pa n'dzidzi wakubvuna.”

⁴²Yezu aapanga tenepa: “Imwe cipo mudzati kuona pidalembwa m'Bukhu ya Mulungu kuti: “ ‘Mwala udakhondiwa na anyakumanga nyumba, ndiwo udadza kakhala mwala wakufunika kakamwe? Penepi pyabuluka kuna Mbuya, pontho ndi cinthu cakudzumisa kuna ife.’ ”

⁴³“Na tenepo, ndisakupangani kuti Umambo wa Mulungu munadza kaupokoserwa, mbupaswa dzindza inango inabala misapu.

⁴⁴Onsene anagwa padzulu pa mwala uyu, ananyedzeka, mbwenye ule anagwerwa na iwo, anapeyeka kudza pfumbi.[19]”

⁴⁵Akulu aanyantsembe na afarisi, na kubva misanje eneyo, apidziwa kuti Yezu asalonga iwo.

⁴⁶Na thangwi eneyo, iwo akhasaka kuti anam'manga tani, mbwenye akhagopa mbumba, thangwi Yezu akhadziwika na mbumba yonsene kuti ndi mporofeta.