Read cisena Mt. 23 Bible Online

Mt. 23 - cisena bible

Mt. 23

¹Buluka penepo Yezu alonga na mwinji wa anthu na anyakupfundza ace kuti:

²“Anyakudziwisa a Mwambo na afarisi asagumanika mbatonga pa mpando wa Mozesi.

³Na tenepo, abvereni mbamucita pyonsene pinakupangani iwo. Mbwenye lekani kucita pinacita iwo, thangwi nkhabe kucita pinalonga iwo.

⁴Thangwi iwo asadziwa basi kupasa andzawo mitolo yakulemera mbaiyikha pa phewa pawo, mbwenye iwo ene nkhabe kukwanisa kuikwata. Pontho asacimwana kulamusa na cala cene cibodzi toera kuaphedza.

⁵Na tenepo, iwo asacita mabasa awo onsene, toera aoniwe na anthu. Lang'anani mafala adalemba iwo, mbaswetera pa nkhope pawo na m'mikono ya nguwo zawo! Pontho lang'anani pimbverere pya kulapha pya nguwo zawo!

⁶Pa maphwandu, asafuna mbuto zakutoma, pontho na mipando yakutoma n'kati mwa nyumba za kuphemberera.

⁷Asafuna kuti anthu aamwanyike na cilemedzo m'misika, pontho asafuna kucemerwa apfundzisi.

⁸Mbwenye imwe lekani kutawira kucemerwa apfundzisi, thangwi Mpfundzisi wanu ndi m'bodzi basi. Imwe monsene ndimwe ubale wanu.

⁹Pontho lekani kucemera baba, munthu wa pantsi pano. Thangwi Baba wanu ndi m'bodzi basi, ule ali kudzulu.

¹⁰Pontho lekani kucemerana atsogoleri, thangwi N'tsogoleri wanu ndi m'bodzi basi, Kirixtu.

¹¹Mbwenye nkulu pakati panu, mbakhale n'dzakazi wanu.

¹²Na tenepo, munthu onsene anapikuza ekha, anadza kacepeswa, mbwenye ule anacepeseka, anadza kakuzwa.”

¹³Yezu aapanga kuti: “Muna nyatwa imwe, anyakudziwisa a Mwambo na afarisi a uthambi! Thangwi musafungira anthu Umambo wa kudzulu. Imwe ene nkhabe pita, pontho nkhabe siya kuti apite ale anafuna kupita.

¹⁴[“Muna nyatwa imwe anyakudziwisa a Mwambo, na afarisi a uthambi! Thangwi musatapata nyumba za akazi adaferwa na amuna awo, mbamuadhobha na kucita miphembero yakukhonda kugwandira. Na thangwi eneyo munati muoneswe nyatwa zikulu.[21]]

¹⁵“Muna nyatwa imwe, anyakudziwisa a Mwambo na afarisi a uthambi! Thangwi musafamba m'bara na kuntunda kwene, toera kunyengerera munthu kuti apite mu mwambo wanu. Mbwenye mungankwanisa, musancita kuti akhale munthu wa kupita mu infernu kawiri kupiringana imwe.

¹⁶“Muna nyatwa imwe, atsogoleri a kukhonda kuona, thangwi musapfundzisa kuti: ‘Munthu anadumbira na dzina ya Nyumba ya Mulungu, penepi nkhabe pinthu. Mbwenye ule anadumbira na dzina ya oro wa Nyumba ya Mulungu, unowu asatongwa kuti acite cire cidadumbirira iye.’

¹⁷Imwe madzemwamwe pontho maboli-boli! Kodi cikulu ndi cipi? Oro, peno Nyumba ya Mulungu inacenesa oro?

¹⁸Pontho musapfundzisa kuti: ‘Munthu anadumbira na dzina ya guwa ya ntsembe, penepi nkhabe pinthu. Mbwenye ule anadumbira na dzina ya ntsembe inaikhwa pa guwa ya ntsembe, unowu asatongwa kucita cire cidadumbirira iye.’

¹⁹Maboli-boli! Kodi cikulu ndi cipi? Ndi ntsembe peno guwa ya ntsembe inacenesa ntsembe?

²⁰Na tenepo, anadumbira na dzina ya guwa ya ntsembe, asadumbirambo na dzina ya guwa ya ntsembe, na pyonsene pyene pinagumanika padzulu pace.

²¹Pontho ule anadumbira na dzina ya Nyumba ya Mulungu, asadumbirambo na dzina eneyo, na ya Mulungu anakhala mwenemu.

²²Na tenepo, anadumbira na dzina ya kudzulu, asadumbirambo na dzina ya mpando wa Umambo wa Mulungu, pontho na dzina yace, Iye Mulungu anakhala penepo.

²³“Muna nyatwa imwe anyakudziwisa a Mwambo na afarisi, ndimwe anyauthambi! Thangwi musapereka cacikhumi ca masamba a n'dimba mwanu, mbamupwaza pinthu pinafunika kakamwe pa mwambo, ninga: udidi, ntsisi na kunyindirika. Ipi ndipyo pikhafunika kuti mupicitembo pabodzi na pinthu pinango pinacita imwe.

²⁴Imwe atsogoleri maboli-boli! Musasungula imbu, mbamumeza cinyama cikulu cinacemerwa kamelo.

²⁵“Muna nyatwa imwe anyakudziwisa a Mwambo na afarisi, ndimwe anyauthambi! Thangwi musatsuka kunja kwa ndiko na kwa mbale, mbwenye iwo n'kati mwawo adzala na kusirira pontho na upandu.

²⁶Iwe nfarisi boli-boli! Pakutoma tsuka n'kati mwa ndiko na mwa mbale, toera kunja kucenembo.

²⁷“Muna nyatwa imwe anyakudziwisa a Mwambo na afarisi, ndimwe anyauthambi! Thangwi mwakhala ninga nthumbi za kukhwaziwa ntoto, mbizibalika kunja, mbwenye n'kati mwace mwadzala na magogodo a anthu a kufa na pinthu pyonsene pya kunyanyasa.

²⁸Na tenepo, sawa-sawambo na imwe. Thangwi kunja musaoneka akulungama pamaso pa anthu, mbwenye n'kati mwanu mwadzala na uthambi pontho na uipi.”

²⁹“Muna nyatwa imwe anyakudziwisa a Mwambo na afarisi, ndimwe anyauthambi! Thangwi musacitira nthumbi maporofeta, mbamuikha maluwa pa nthumbi za anthu akulungama,

³⁰mbamulonga kuti: ‘Mbatidakhala pabodzi na ambuya athu pa midzidzi eneyo, ife mbatidakhala naanthu tayu pa kupha kudacita iwo maporofeta!’

³¹Tenepa, musapicitira umboni mwekha kuti ndimwe ana a ale adapha maporofeta.

³²Dzadzani mphapo n'dida udatoma ambuya anu.

³³“Imwe nyoka! Ana a m'bobo! Munakwanisa tani kuthawa nyatwa za mu infernu?

³⁴Na thangwi eneyo ine ndinakutumirani maporofeta, adziwisi na anyakudziwisa a Mwambo. Apo imwe, azinji awo munadza kaapha, anango munaakhomera pa ntanda, pontho anango munaakwapula n'kati mwa nyumba za kuphemberera, mbamuazonda m'mizinda na m'mizinda.

³⁵Na tenepo, nyatwa zinati zikugwereni na thangwi ya ciropa cidataika pantsi ca onsene anyakulungama, kutomera ciropa ca munthu wakulungama Abheli, mpaka kuna ciropa ca Zakariya mwana wa Barakiya, ule adapha imwe pakati-na-kati, uku Nyumba ya Mulungu uku guwa ya ntsembe.

³⁶Ndimo mwene, ndisakupangani kuti anthu a ntsiku zino anadza kagwerwa nazo nyatwa zenezi.”

³⁷Yezu alonga tenepa: “Djerusalema, Djerusalema, iwe unapha maporofeta, pontho mbumenya na myala ale adatumirwa iwe na Mulungu! Kangasi mbandifuna kugumanya ana ako, ninga nkhuku isagumanya anapiye ace m'mapapido mwace, iwe mbukhonda!

³⁸Lang'anani, nyumba yanu inadza kakhala madembe.

³⁹Mphapo Ine ndisakupangani kuti imwe nkhabe kudza kandionabve tayu, mpaka n'dzidzi unadza imwe kalonga kuti: ‘Mbasimbwe ule anadza na dzina ya Mbuya!’ ”