Read cisena Mt. 25 Bible Online

Mt. 25 - cisena bible

Mt. 25

¹Yezu alonga kuti: “Umambo wa kudzulu unadza kalandana na amyali khumi akhadakwata nyale zawo mbaenda kagumana na mwali wa mamuna.

²Axanu awo akhali madzemwa, axanu akhali a ndzeru.

³Madzemwa akwata nyale zawo, mbwenye aduwala kukwata mafuta.

⁴Mbwenye andzawo a ndzeru, akwata nyale zawo pabodzi na mafuta mu ntete.

⁵Na thangwi ya kudembuka kwa mwali wa mamuna, atsikana onsene aphatwa na citulo mbagona.

⁶“Mbwenye pa chiti-chiti, wabveka n'khuwo kuti: ‘Ali kudza mwali wa mamuna! Lamukani mukantambire!’

⁷“Na tenepo, amyali onsene alamuka mbasasanyira nyale zawo.

⁸Penepo, amyali madzemwa atoma kuphemba andzawo a ndzeru kuti: ‘Tipasenimbo pang'ono mafuta anu, thangwi nyale zathu ziri kuthima.’

⁹“Mbwenye amyali a ndzeru aatawira tenepa: ‘Nkhabe, gopa panango nkhabe kudza kakwana kuna ife na imwe ene. Ndokoni kagule kunaguliswa iwo’.

¹⁰“Mudabuluka iwo kwenda kagula mafuta, mwali wa mamuna afika. Amyali akhadamala kusasanyira apita na iye pabodzi mu phwandu ya banja. Penepo citseko cafungwa.

¹¹“Buluka penepo, abwerambo andzawo mbalonga tenepa: ‘Mbuya, Mbuya, tifungulireni citseko!’

¹²“Mbwenye mwali wa mamuna aatawira tenepa: ‘Ndimo mwene ndisakupangani kuti ine nkhabe kukudziwani!’

¹³“Na tenepo, Yezu aapanga kuti: ‘Khalani mbamulang'anira. Thangwi imwe nkhabe kuidziwa ntsiku peno n'dzidzi.’ ”

¹⁴“Penepi pinakhala ninga mamuna m'bodzi adacita ulendo wace. Pakubuluka kwace, acemera anyabasa ace mbaasiyira mpfuma zace.

¹⁵Na tenepo, abulusa kobiri zixanu mbapasa munthu m'bodzi, kobiri ziwiri mbapasa unango, kobiri ibodzi mbapasambo unango m'bodzi. Munthu m'bodzi na m'bodzi apasiwa ntengo unakwanirana na ndzeru zace. Pakumala penepo, abuluka mbaenda.

¹⁶Ule adatambira kobiri zixanu azikwata, mbaenda na mwansanga kazicitisa malonda, mbawina zinango zixanu.

¹⁷Ule adatambira kobiri ziwiri acitambo pibodzi-bodzi, mbawinambo pontho kobiri ziwiri.

¹⁸Mbwenye ule adatambira kobiri ibodzi, akumba djenje pantsi, mbaibisa penepo kobiri idapaswa iye na mbuya wace.

¹⁹“Pakupita ntsiku zizinji, abwera mbuya wawo, mbaaphemba toera asake kudziwa pidacita iwo na kobiri zace.

²⁰Na tenepo, abwera nyabasa ule akhadatambira kobiri zixanu mbalonga tenepa: ‘Mbuya, kobiri zixanu zidandipasa imwe ndi izi. Mbwenye pa ntengo unowu ndawina pontho zinango izi zixanu.’

²¹Mbuya wace ampanga tenepa: ‘Wacita pyadidi! Ndiwe nyabasa wadidi na wakunyindirika. Wakwanisa kunyindirika pa pinthu ping'ono, ndinadza kakunyindira pa pinthu pikulu. Mphapo cincino bwera udze katsandzaye pabodzi na ine.’

²²Buluka penepo, abwerambo ule akhadatambira kobiri ziwiri, mbalonga tenepa: ‘Mbuya, kobiri ziwiri zikhadandipasa imwe ndi izi. Mbwenye pa ntengo unowu, ndawina pontho zinango izi ziwiri.’

²³Mbuya wace ampanga tenepa: ‘Wacita pyadidi! Ndiwe nyabasa wadidi na wakunyindirika. Na tenepo, wakwanisa kunyindirika pa pinthu ping'ono, ndinadza kakunyindirambo pa pinthu pikulu. Mphapo cincino bwera udze katsandzaye pabodzi na ine.’

²⁴Pakumalisa abwerambo ule akhadatambira kobiri ibodzi, mbalonga tenepa: ‘Mbuya, ine ndisakudziwani kuti imwe ndimwe munthu wakunentsa, thangwi musabvuna padakhonda imwe kubzala, pontho musagumanya padakhonda imwe kumwaza pinthu.

²⁵Na thangwi eneyo ndagopa, mbandiibisa pantsi kobiri yanu. Mphapo lero kwatani kobiri yanu ixi.’

²⁶Penepo, mbuya wace antawira tenepa: ‘Iwe ndiwe nyabasa wa kuipa, pontho ndiwe wakupolola. Iwe ukhapidziwa kuti ine ndisabvuna padakhonda ine kubzala, pontho ndisagumanya padakhonda ine kuwaza mbeu.

²⁷Na tenepo, watani mphapo wakhonda kuyikha kobiri yanga n'nyumba zinakoyera anthu kobiri? Pa kubwerera kwanga, mbidaipaswa na m'bairo.

²⁸Mpokosereni kobiri yace, muipase ule ana kobiri khumi.

²⁹Thangwi ule anapyo, anadza kapaswa pontho pinango, toera piyinjipiretu kakamwe pinthu pyace. Mbwenye ule adapisowa, anadza kapokoserwa na pire pyene pina iye.

³⁰Na tenepo, nyabasa uyu wakukhonda kuphedzera cinthu, mponyeni kunja, n'cidima. Mwenemu munadza kabveka ciliro na kugeda-geda mano’.”

³¹Yezu alonga pontho kuti: “Ine Mwana wa Munthu ndingadza kabwera mu mbiri yanga pabodzi na maanju anga onsene, ndinadza kakhala pa mpando wanga wa umambo.

³²Anthu a madziko onsene a pantsi anagumanyikana patsogolo panga. Penepo ndinaapambula pa nsoka wa andzawo sawa-sawa ninga nkumbidzi asapambula mbuzi pa nkumbi wa mabira.

³³Pontho ndinadza kaikha mabira ku nkono wa madyo, mbuzi ku nkono wa bzere.

³⁴Na tenepo, Ine Mambo wawo ndinalonga kuna ale ali ku nkono wanga wa madyo kuti: ‘Bwerani imwe anyakusimbwa a Baba wanga! Tambirani umambo udasasanyirwa imwe ninga unthaka na Baba wanga, kubulukira pakutoma kwa dziko.

³⁵Thangwi ndikhabva njala, imwe mwandipasa ca kudya. Ndikhabva nyota, imwe mwandipasa ca kumwa. Pontho ndikhali munthu wakudza, imwe mwanditambira.

³⁶Ndikhakhala na usiwa, imwe mwandipasa ca kubvala. Ndikhaduwala, imwe mukhadza kandiona. Ndikhakhala n'kaidi, pontho imwe mukhadza kandiona.’

³⁷“Penepo ale akulungama anadza kabvundza mbalonga tenepa: ‘Mbuya, takuonani lini na njala mbatikupasani ca kudya? Peno na nyota mbatikupasani ca kumwa?

³⁸Pontho ndi lini takuonani ninga munthu wakudza, mbatikupasani mbuto ya kugona? Peno na usiwa mbatikupasani ca kubvala?

³⁹Pontho takuonani lini mbamuduwala peno mbamuli n'kaidi, mbatidza kakuonani?’

⁴⁰“Mbwenye Ine ndinaatawira tenepa: ‘Ndimo mwene ndisakupangani kuti: pire pikhacitira imwe m'bodzi wa abale anga ang'ono, mukhapicitira Ine ene.’

⁴¹“Buluka penepo ndinalongambo na ale ali ku nkono wanga wa bzere kuti: ‘Bulukani pano imwe anthu a kuipa! Ndokoni mu moto wakukhonda kumala, udacitirwa Sathani pabodzi na maanju ace.

⁴²Thangwi ndikhakhala na njala, imwe mwandimana ca kudya. Ndikhakhala na nyota, imwe mwandimana madzi.

⁴³Pontho ndikhali munthu wakudza, imwe mwakhonda kunditambira. Ndikhali na usiwa, imwe mwakhonda kundipasa ca kubvala. Pontho ndikhaduwala, imwe mwakhonda kundiona. Ndikhali n'kaidi, imwe mwakhonda kudza kandiona.’

⁴⁴“Na tenepo, iwo anadza kanditawirambo kuti: ‘Mbuya! Takuonani lini na njala, peno na nyota, peno ninga munthu wakudza, peno na usiwa, peno wa kuduwala, peno mbamuli n'kaidi, ife mbatikhonda kukuphedzani?’

⁴⁵“Mbwenye Ine ndinaatawira tenepa: ‘Ndimo mwene ndisakupangani kuti: Pire pidakhonda kucitira imwe kuna m'bodzi wa ana awa ang'ono kakamwe, mukhakhonda kucitira Ine.’

⁴⁶“Na tenepo, anthu awa anadza kaenda ku nyatwa yakukhonda kumala, mbwenye ale akulungama anadza kaenda ku mbuto ya upulumuki wakukhonda kumala.”