Read cisena Mt. 27 Bible Online

Mt. 27 - cisena bible

Mt. 27

¹Mudaca kunja, na macibese ene, akulu aanyantsembe na mathubu a mbumba, agumanyikana toera abverane kuti anam'pha tani Yezu.

²Iwo am'manga, ankwata mbaenda kampereka kuna Piratu, ntongi wa mu Roma.

³Djuda, nyakusandukira Yezu, na kuona kuti Yezu atongiwa kuti aphiwe, apaluka ntima na kugopa, mbaenda kuna akulu aanyantsembe na mathubu a mbumba, kwenda kaabwezera kobiri zawo makumatatu za parata.

⁴Mbalonga kuti: “Ine ndadawa, thangwi ndakupasani munthu wa kusoweka mathangwi, kuti aphiwe.” Mbwenye iwo atawira tenepa: “Tinapyonji ife penepyo? Mphyako penepyo!”

⁵Penepo Djuda akwata kobiri makumatatu za parata, azitaya mu Nyumba ya Mulungu, abuluka mbaenda kamangika, mbafa.

⁶Akulu aanyantsembe akwata kobiri izi za parata mbalonga kuti: “Nkhabe kutawirirwa mu mwambo wathu kuti tikwate kobiri iyi ya ciropa, tiibvunganize na kobiri zinango za N'nyumba ya Mulungu.”

⁷Na tenepo, iwo akhala pantsi mbabverana kuti: “Ndi pyadidi tikwate kobiri eneyi, tigule nayo munda wa mamuna m'bodzi akhali na basa ya kuumba pyombo pya dongo, toera munda unowu tiucite masiye a anthu akudza.”

⁸Ndi thangwi eneyo, munda unowu usacemerwa (munda wa ciropa), mpaka lero.

⁹Na tenepo, pyasimbiswa pire pikhadalonga Mulungu na mulomo wa mporofeta Jeremiya kuti: “Iwo akwata kobiri makumatatu za parata, ntengo ukhadaphemba mbumba ya Izarayeli,

¹⁰mbagula na iwo munda wa nyakuumba pyombo pya dongo, ninga mudandipangira Mbuya.”

¹¹Yezu akhakhala dzololo pamaso pa ntongi. Iye ntongi atoma kum'bvundza Yezu kuti: “Iwe ndiwe mambo wa madjuda?” Yezu antawira tenepa: “Ndimwe analonga penepi.”

¹²Mbwenye, akulu aanyantsembe na mathubu pidamulongera iwo uthambi, Yezu akhonda kutawira cinthu.

¹³Na tenepo, Piratu am'bvundza Yezu kuti: “Iwe nkhabe kubva pyonsene ipi pinakupambazira iwo?”

¹⁴Yezu athimiza na kumatama, mbakhonda kutawira cinthu. Na tenepo, ntongi adzumatirwa napyo pikulu.

¹⁵Ungafika n'dzidzi wa phwandu ya Paxkwa, kukhali na nsambo ukhacita ntongi, wakukhuca munthu m'bodzi n'kaidi, ule anasankhulwa na mbumba.

¹⁶Pa n'dzidzi unowu, akhalipo nyan'kaidi m'bodzi wa mbiri akhacemerwa Bharabhasi.

¹⁷Ntongi Piratu abvundza mbumba ikhadagumanyikana penepo, mbalonga tenepa: “Mbani anafuna imwe kuti abuluswe? Bharabhasi, peno Yezu anacemerwa Kirixtu?”

¹⁸Thangwi Piratu akhapidziwa pyace, kuti iwo ampereka Yezu m'manja mwace na thangwi ya bibvu.

¹⁹Piratu mbali n'nyumba ya kutongera miseru, nkazi wace antumira mphangwa izi: “Leka kupipitira pinthu pya munthu uyu wakulungama, thangwi masiku ndaona nyatwa kakamwe mu ndoto, na thangwi yace.”

²⁰Mbwenye akulu aanyantsembe na mathubu, akwanisa kunyengerera mbumba yonsene ya anthu, kuti iphembe Piratu abuluse Bharabhasi n'kaidi, mbaphesa Yezu.

²¹Na tenepo, ntongi Piratu abvundza anthu kuti: “Pa amuna awiri awa, mbani anafuna imwe kuti abuluswe n'kaidi?” Iwo atawira kuti: “Bharabhasi!”

²²Piratu aabvundza pontho kuti: “Kodi ndinancitanji Yezu, anacemerwa Kirixtu?” Onsene atawira na kukhuwa kuti: “Mbakhomerwe pa ntanda!”

²³Piratu aabvundza kuti: “Mphapo, nchanji ca kuipa cidacita Iye?” Mbwenye mbumba ikhakhuwiratu kakamwe kuti: “N'khomereni pa ntanda!”

²⁴Mphapo Piratu na kuona kuti nkhabe cinthu cinakwanisa iye kucita, pontho na kuona kuti mwinji wa anthu unadza kansandukira, abweresa madzi mbasamba manja patsogolo pa anthu onsene, mbalonga tenepa: “Ine nkhabe kudza kakutawirira kufa kwa mamuna uyu! Citani pinafuna imwe.”

²⁵Na tenepo, anthu onsene atawira kuti: “Ciropa cace mbacigwere kuna ife na kuna ana athu!”

²⁶Na tenepo, Piratu aabulusira Bharabhasi. Buluka penepo, akwapulisa Yezu na n'chamu, mbampereka kuti akhomerwe pa ntanda.

²⁷Na tenepo, anyankhondo a mambo Piratu ankwata Yezu mbaenda na iye ku nyumba ya ntongi wa ku Roma. Penepo anyankhondo onsene anzungulira.

²⁸An'dulisa nguwo zace mbam'bvazika nkumi wakufuira.

²⁹Aluka nthimba ya minga mbam'bvazika munsolo mwace. Pontho, akwata mpsimbo mbam'phatisa m'manja mwace a nkono wa madyo. Buluka penepo, iwo an'godamira patsogolo pace mbakhansingirira tenepa: “Bweraniko mambo wa madjuda!”

³⁰Am'phulira mata, mbampokosera mpsimbo, mbakham'menya nayo munsolo.

³¹Pidamala iwo kunsingirira, an'dulisa nkumi mbam'bvazika pontho nguwo zace. Buluka penepo, ankwata mbaenda kan'khomera pa ntanda.

³²Pikhabuluka iwo penepo agumana mamuna m'bodzi wa ku nzinda wa Sirene, anacemerwa Simau, mbankakamiza kuti akwate ntanda.

³³Na tenepo, iwo afika ku mbuto ibodzi inacemerwa Gologota. Ndiko kubveka mbuto ikhataiwa madudu a misolo ya anthu a kufa.

³⁴Kweneko anyankhondo apasa Yezu vinyu ya kubvungazwa na nyongo kuti amwe. Mbwenye Yezu, pidailawira iye, aikhonda kuimwa.

³⁵Pidamala iwo kun'khomera pa ntanda, amenya ntsango, mbagawana nguwo zace.[22]

³⁶Buluka penepo, iwo akhala pantsi mbakhamuonera.

³⁷Padzulu pa ntanda, dhuzi na nsolo wa Yezu, palembwa mathangwi adakhomererwa iye kuti: “UYU NDI YEZU, MAMBO WA MADJUDA.”

³⁸Akhomerwambo pa ntanda pabodzi na Yezu mambava mawiri, m'bodzi ku nkono wa madyo, unango ku nkono wa bzere.

³⁹Anthu akhapita na penepo, akhantikana mbakhasukusa misolo,

⁴⁰mbakhalonga tenepa: “Iwe ukhalonga kuti unakwanisa kufudza Nyumba ya Mulungu mbuimanga pontho pa ntsiku zitatu, pulumusika wekha ene mphapo! Chita pa ntanda, ngakhala iwe ndiwedi Mwana wa Mulungu!”

⁴¹Sawa-sawa na akulu aanyantsembe na anyakudziwisa a Mwambo na mathubu akhansingirirambo Yezu mbakhalonga kuti:

⁴²“Iye apulumusa anango, mbwenye asacimwana kupulumusika ekha ene! Ngakhala iye ndiye Mambo wa Izarayeli, mbachite mphapo cincino pa ntanda, ife tinantawira!

⁴³Iye akhulupira Mulungu, pontho mbalonga kuti: ‘Ndine Mwana wa Mulungu.’ Ngakhala ndi tenepo, mbabwere mphapo Mulungu wace adze kamuombole cincino, ngakhala Mulungu asanfunadi.”

⁴⁴Na mambava ene ale akhadakhomerwa pa ntanda pabodzi na Yezu, akhanxolambo.

⁴⁵Kutomera pa n'dzidzi khumi na uwiri wa masikati, mpaka pa n'dzidzi utatu wa kumaulo, dziko yonsene yagudumirwa na cidima.

⁴⁶Dhuzi na n'dzidzi utatu wa kumaulo, Yezu akhuwa mbalonga tenepa: “Eloyi, Eloyi, lama sabakitani?” Kweneku ndi kubveka “Mulungu wanga, Mulungu wanga, thangwi yanji wandisiya?”

⁴⁷Anango akhali penepo, mudabva iwo penepi, akhalonga tenepa: “Iye asacemera Eliya!”

⁴⁸Na mwansanga, m'bodzi wawo aenda mbathamanga kakwata thonje mbaibvika mu vinyu ya kudjamuka, mbaipfeka pa ntete, mbapasa Yezu kuti amwe.

⁴⁹Mbwenye anango akhalonga tenepa: “Nsiyeni, timuone ngakhala Eliya anabwera kampulumusa.”

⁵⁰Pakumala kukhuwa pontho, Yezu apereka nzimu wace.

⁵¹Pa n'dzidzi unowu, nguwo ikhasitira mbuto ya Mulungu mu Nyumba ya Mulungu, yapanduka nakati-na-kati kutomera kudzulu mpaka pantsi. Mataka atekenyeka, myala mbisweka.

⁵²Nthumbi zafunguka, pontho manungo a anthu azinji a mbumba ya Mulungu akhadafa kale ene, alamuka pa kufa.

⁵³Pakumala kulamuka Yezu pa kufa, iwo abuluka n'zinthumbi mbapita mu Djerusalema, mu nzinda wakucena, mbabulukira kuna anthu azinji.

⁵⁴Nkulu wa anyankhondo a ku Roma na anyankhondo ace akhaonera Yezu, na kubva kutekenyeka kwa mataka na pyonsene pikhacitika, agopa pikulu kakamwe mbalonga tenepa: “Ndimo mwenedi, mamuna uyu akhali Mwana wa Mulungu!”

⁵⁵Kweneko akhalipombo akazi azinji mbakhalang'anisa na kutali. Iwo akhatowerera Yezu kubulukira ku Galileya, toera kum'phatira basa.

⁵⁶Pakati pawo akhalipo Mariya Madhalena, Mariya mai wace Tiyago na Zuze, pontho na nkazi wa Zebhedheu.

⁵⁷Ca kumaulo, afika mamuna m'bodzi anacemerwa Zuze. Dziko yace ya kubaliwa ndi Arimateya. Iye akhali m'pfumi, pontho iye akhakhalambo nyakupfundza wa Yezu.

⁵⁸Iye aenda kuna ntongi Piratu kwenda kaphemba manungo a Yezu. Piratu apanga anthu ace kuti ampase.

⁵⁹Na tenepo, Zuze akwata manungo a Yezu mbaapyangirira na nguwo yakucena,

⁶⁰mbaaikha mu nthumbi yace ipsa ikhadakumbisa iye pa mwala. Pakumala kuikha manungo, abulumundisa mwala ukulu mbafunga na iwo nthumbi. Buluka penepo mbaenda pyace.

⁶¹Mariya Madhalena na Mariya unango, akhakhala nawa pantsi, patsogolo pa nthumbi.

⁶²Mangwana mwace na macibese, ikhali ntsiku ya sabudu, akulu aanyantsembe na nsoka unango wa afarisi aenda kuna Piratu,

⁶³mbalonga kuti: “Tisakumbuka kuti nyauthambi ule mbali m'maso, alonga tenepa: ‘Pakupita ntsiku zitatu, Ine ndinadza kalamuka pa kufa.’

⁶⁴Na thangwi eneyi, mphyadidi mubuluse ntemo wa kuti nthumbi ionerwe na mphambvu, mpaka ntsiku yacitatu. Pezi anyakupfundza ace anaenda kaaba manungo, angamala mbapanga mbumba yonsene ya anthu kuti iye alamuka pa kufa! Na tenepo, uthambi uyu wakumalisa unakhala ukulu kakamwe kupita wa kutoma.”

⁶⁵Piratu aapanga tenepa: “Anyankhondo munawo. Mphapo ndokoni mukhaonere nthumbi ninga munafunira imwe.”

⁶⁶Na tenepo, iwo aenda, mbaikha cidzindikiro pa mwala ukhadafunga nthumbi, pontho mbasiya anyankhondo kuti aionere.