Read cisena Mt. 28 Bible Online

Mt. 28 - cisena bible

Mt. 28

¹Pa ntsiku ya Dimingu, m'bambakuca, Mariya Madhalena na Mariya unango aenda kaona ku nthumbi.

²Na mwansanga kwabveka citeke-teke cikulu, thangwi anju m'bodzi wa Mbuya achita kudzulu, mbabulumundisa mwala pa khundu ukhadafunga nsuwo wa nthumbi, mbaukhalira.

³Makhaliro ace anju akhali ninga kucetuma kwa njazi, nguwo zace zikhali zakucena ninga thonje.

⁴Anyankhondo akhaonera atoma kudzadzamira na kugopa, mbakhala ninga afa.

⁵Anju alonga na akazi kuti: “Lekani gopa, thangwi ine ndisadziwa kuti imwe muli kusaka Yezu adakhomerwa pa ntanda.

⁶Iye nkhabepo pano. Alamuka pa kufa ninga mukhadalongera Iye. Bwerani mudze kaone pakhadaikhwa Iye.

⁷Cincino ndokoni na mwansanga mukhapange anyakupfundza ace, kuti Iye alamuka pa kufa. Iye ali kutsogola kwenda ku Galileya. Ndi kweneko kunafuna imwe kamuona. Ndi penepi pikhafuna kukupangani ine.”

⁸Na tenepo, iwo abuluka na mwansanga pa nthumbi na kugopa, pontho na kukomerwa pikulu, aenda mbathamanga kalonga mphangwa kuna anyakupfundza ace.

⁹Pa n'dzidzi ubodzi-bodzi Yezu aenda kuna akazi mbaamwanyika. Penepo iwo anfendedzera mbam'phata myendo mbamulambira.

¹⁰Na tenepo, Yezu aapanga tenepa: “Lekani kugopa! Ndokoni kapange abale anga kuti aende ku Galileya. Kweneko anaonana na Ine.”

¹¹Pa n'dzidzi ukhaenda akazi, anyankhondo anango akhaonera nthumbi abwerera ku nzinda, kwenda kalonga kuna akulu aanyantsembe pire pyonsene pikhadacitika.

¹²Na tenepo, akulu aanyantsembe agumanyikana mbakhala pantsi na mathubu. Penepo iwo abverana kudyekera anyankhondo na ntengo ukulu wa kobiri,

¹³mbaapanga tenepa: “Longani kuti: ‘Anyakupfundza ace abwera na masiku mbaaba manungo, ife mbatikhagona.’

¹⁴Mbwenye ntongi Piratu angadza kapibva pinthu penepi, ife tinam'matamiza, mbaticita kuti imwe mukhonde kuoneswa nyatwa na thangwi eneyi.”

¹⁵Anyankhondo atawira kucita pidapangwa iwo, mbatambira kobiri. Na tenepo, uthambi unowu wamwazika pakati pa madjuda, mpaka na lero.

¹⁶Anyakupfundza khumi na m'bodzi aenda ku Galileya, pa phiri ikhadaapanga Yezu.

¹⁷Pidamuona Iwo, amulambira, mbwenye anango akhapenula.

¹⁸Na tenepo, Yezu aafendedzera mbaapanga kuti: “Ndapasiwa mphambvu zonsene za kutonga kudzulu na pantsi.

¹⁹Na tenepo, ndokoni mbamucita kuti madzindza onsene akhale anyakupfundza anga. Mbamuatambirisa batixmu onsene na dzina ya Baba na ya Mwana na ya Nzimu Wakucena,

²⁰mbamuapfundzisa kukoya pyonsene pidakupangani Ine. Dziwani kuti Ine ndinakhala na imwe kwenda na kwenda, mpaka kumala kwa pantsi.”