Read cisena Mk. 15 Bible Online

Mk. 15 - cisena bible

Mk. 15

¹Mangwana mwace na macibese ene, akulu aanyantsembe pabodzi na mathubu, na anyakudziwisa a Mwambo, na onsene nsoka wa nyumba yakutongera miseru, agumanyikana toera abverane kuti anancita tani Yezu. Pidamala iwo kum'manga, ankwata mbaenda kampereka kuna Piratu.

²Piratu am'bvundza Yezu tenepa: “Iwe ndiwe mambo wa madjuda?” Yezu antawira kuti: “Ndimwe analonga penepi.”

³Akulu aanyantsembe, akhampambazira pinthu pizinji.

⁴Na tenepo, Piratu am'bvundza pontho kuti: “Kodi iwe nkhabe tawira cinthu? Lang'ana pyonsene ipi pinakupambazira iwo!”

⁵Mbwenye Yezu nkhabe cibodzi cidatawira iye. Na tenepo, Piratu adzumatirwa napyo pikulu kakamwe.

⁶Ungafika n'dzidzi wa phwandu ya Paxkwa, kukhali na nsambo wakukhuca munthu m'bodzi n'kaidi, ule akhaphembwa na mbumba kuti abuluswe.

⁷Pa n'dzidzi unowu akhalipo n'kaidi, mamuna m'bodzi akhacemerwa Bharabhasi. Iye akhadafungirwa mwenemu pabodzi na andzace thangwi ya kupha munthu pa cikuti.

⁸Mwinji wa anthu wabwera mbutoma phemba kuti Piratu abuluse munthu m'bodzi n'kaidi, ninga nsambo unakhala iwo mbacita.

⁹Penepo, Piratu aabvundza tenepa: “Musafuna kuti ndikubulusireni mambo wa madjuda?”

¹⁰Thangwi iye akhapidziwa kuti akulu aanyantsembe akhadampereka Yezu m'manja mwace na thangwi ya bibvu.

¹¹Mbwenye akulu aanyantsembe akhanyengerera mbumba kuti iphembe Piratu toera abuluse Bharabhasi n'kaidi, mbasiya Yezu.

¹²Na tenepo, Piratu aabvundza pontho kuti: “Musafuna ndincitenji mphapo mamuna uyu anacemera imwe mambo wa madjuda?”

¹³Penepo, mbumba yakhuwa kuti: “N'khomereni pa ntanda!”

¹⁴Piratu aabvundza kuti: “Mphapo nchanji ca kuipa cidacita iye?” Mbwenye mbumba ikhakhuwiratu kakamwe kuti: “N'khomereni pa ntanda!”

¹⁵Piratu, na kufuna kukoma kuna mbumba, aabulusira Bharabhasi. Buluka penepo akwapulisa Yezu na n'chamu, mbampereka kuti akhomerwe pa ntanda.

¹⁶Buluka penepo, anyankhondo akwata Yezu mbaenda na iye n'kati mwa nyumba ya ntongi, mwenemu agumanyikana anyankhondo onsene.

¹⁷Pakumala, am'bvazika nkumi wakufuira, mbaluka nthimba ya minga mbam'bvazika munsolo mwace.

¹⁸Mbatoma kum'mwanyika tenepa: “Bweraniko mambo wa madjuda!”

¹⁹Penepo akham'menya na mpsimbo munsolo mwace mbakham'phulira mata, mbagodama patsogolo pace ninga nkhumulambira.

²⁰Pidamala iwo kunsingirira, an'dulisa nkumi wakufuira, mbam'bvazika pontho nguwo zace. Penepo ankwata mbaenda na iye kunja, toera akan'khomere pa ntanda.

²¹Mamuna m'bodzi wa ku nzinda wa Sirene, anacemerwa Simau, baba wa Alixande na Rufu, akhapita na penepo buluka ku munda, mbankakamiza kuti akwate ntanda.

²²Na tenepo, iwo akwata Yezu mbaenda na iye ku mbuto ibodzi inacemerwa Gologota. Ndiko kubveka mbuto ikhataiwa madudu a misolo ya anthu a kufa.

²³Kweneko, iwo ampasa vinyu ya kubvungazwa na ntombwe unacemerwa mira,[12] mbwenye Iye akhonda kuimwa.

²⁴Na tenepo, an'khomera pa ntanda, pontho pakumala kumenya ntsango, agawana nguwo zace toera adziwe cinafuna kwata munthu m'bodzi na m'bodzi.

²⁵Ukhali n'dzidzi wacipfemba wa macibese mudan'khomera iwo pa ntanda.

²⁶Padzulu pa ntanda pakhadalembwa, thangwi idakhomererwa Yezu, na mafala awa: MAMBO WA MADJUDA.

²⁷Akhomerwambo pa ntanda pabodzi na Yezu mambava mawiri, m'bodzi ku nkono wa madyo, unango ku nkono wa bzere.

²⁸[Na tenepo, pyasimbisiswa pikhadalembwa kale ene m'Bukhu ya Mulungu kuti: “Iye alengeswa ninga m'bodzi wa anthu a kuipa mitima.[13]]”

²⁹Anthu akhapita na penepo akhantikana mbakhasukusa misolo, mbakhalonga tenepa: “Ha! Iwe ukhalonga kuti unakwanisa kufudza Nyumba ya Mulungu, mbuimanga pontho pa ntsiku zitatu!

³⁰Apo chita mphapo pa ntanda upulumusike wekha ene.”

³¹Sawa-sawa na akulu aanyantsembe na anyakudziwisa a Mwambo, akhansingirirambo mbakhalonga okha-okha kuti: “Iye apulumusa anango, mbwenye asacimwana kupulumusika ekha ene.

³²Kirixtu, mambo wa Izarayeli chita cincino pa ntanda tikuone, toera tikutawire!” Penepo, ale akhadakhomerwa pa ntanda pabodzi na Yezu, akhantikanambo.

³³Kutomera pa n'dzidzi khumi na uwiri wa masikati, mpaka pa n'dzidzi utatu wa kumaulo, dziko yonsene yagudumirwa na cidima.

³⁴ Dhuzi na n'dzidzi utatu wa kumaulo, Yezu akhuwa mbalonga tenepa: “Eloyi, Eloyi, lama sabakitani?” Kweneku ndi kubveka “Mulungu wanga, Mulungu wanga, thangwi yanji wandisiya?”

³⁵Anango akhali penepo mudabva iwo penepi, akhalonga tenepa: “Bveserani! Iye asacemera Eliya!”

³⁶Penepo, mamuna m'bodzi aenda mbathamanga, mbatotesa thonje mu vinyu ya kudjamuka mbaipfeka pa ntete, mbapasa Yezu kuti amwe, mbalonga tenepa: “Nsiyeni, timuone ngakhala Eliya anabwera kam'bulusa penepo!”

³⁷Mbwenye Yezu akhuwa pontho na mphambvu, mbafa.

³⁸Penepo, nguwo ikhasitira mbuto ya Mulungu mu Nyumba ya Mulungu, yapanduka nakati-na-kati, kutomera kudzulu mpaka pantsi.

³⁹Na tenepo, nkulu wa anyankhondo a ku Roma akhali patsogolo pa ntanda udakhomerwa Yezu, na kubva kukhuwa na kufa kudacita iye, alonga tenepa: “Ndimo mwenedi, mamuna uyu akhali Mwana wa Mulungu!”

⁴⁰Penepo akhalipombo akazi anango mbakhalang'anisa na kutali. Pakati pawo akhalipo Mariya Madhalena, Salomee, na Mariya, mai wace Tiyago, ng'ono wace Zuze.

⁴¹Akazi enewa akhadza mbaperekera Yezu na kum'phatira basa mukhali iye ku Galileya. Pontho penepo akhalipombo akazi anango azinji akhadaenda na iye ku Djerusalema.

⁴²Mukhadoka dzuwa, mukhasasanyira iwo ntsiku ya Sabudu, kweneku nkhulongera ntsiku ya cixanu ca kumaulo,

⁴³Zuze wa ku nzinda wa Arimateya, munthu wa mbiri pa nsoka wa anyakutonga miseru, pontho akhadikhirambo Umambo wa Mulungu, aenda na cipapu consene kuna Piratu, mbaphemba manungo a Yezu.

⁴⁴Piratu adzumatirwa napyo mudabva iye kuti Yezu afa. Penepo, acemeresa nkulu wa anyankhondo a ku Roma mbam'bvundzisa ngakhala Yezu afa kale ene.

⁴⁵Pidamala iye kupangiwa na nkulu wa anyankhondo, apereka manungo a Yezu kuna Zuze wa ku nzinda wa Arimateya.

⁴⁶Na tenepo, Zuze, aabulusa manungo a Yezu pa ntanda, mbaapyangirira na nguwo yakucena ikhadagula iye. Buluka penepo, aenda kaikha manungo mu nthumbi ikhadakumbwa pa mwala. Pidamala iye abulumundisa mwala ukulu, mbafunga na iwo pa nsuwo wa nthumbi.

⁴⁷Mariya Madhalena, na Mariya mai wace Zuze, aona padaikhwa manungo a Yezu.