Read cisena Mk. 16 Bible Online

Mk. 16 - cisena bible

Mk. 16

¹Mudapita ntsiku ya Sabudu, Mariya Madhalena, na Salomee, na Mariya mai wace Tiyago, agula mafuta akununkhira toera kadzodza na iwo manungo a Yezu.

²Pa ntsiku ya Dimingu, na macibese ene, mukhabuluka dzuwa, iwo aenda ku nthumbi.

³Mukhaenda iwo na njira akhabvundzana tenepa: “Mbani anafuna kutibulusira mwala udafunga nthumbi?”

⁴Iwo akazi akhalonga penepyo, thangwi mwala ukhali ukulu kakamwe. Mbwenye mudafika iwo, aona kuti mwala ukhadabuluswa kale ene.

⁵Na tenepo, apita n'nthumbi, mbaona m'phale m'bodzi akhadabvala nguwo zakucena, akhali nawa ku khundu ya madyo. Penepo, iwo atutumuka mbagopa pikulu kakamwe.

⁶Mbwenye m'phale aapanga tenepa: “Lekani gopa! Muli kusaka Yezu wa ku Nazareti adakhomerwa pa ntanda? Iye alamuka pa kufa. Nkhabemo muno. Lang'anani pakhadaikhwa Iye apa.

⁷Cincino ndokoni mukhapange anyakupfundza ace na Pedhru kuti: Iye ali kutsogola kwenda ku Galileya. Kweneko munaenda kamuona ninga mudalongera Iye.”

⁸Na tenepo, akazi athawa mbabuluka pa nthumbi mbakhadzadzamira na kugopa. Na thangwi ya kugopa kukhali na iwo, acimwana kupanga munthu cinthu.

⁹Yezu alamuka pa kufa ntsiku ya Dimingu na macibese ene, mbaonekera pakutoma kuna Mariya Madhalena, ule akhadabulusa Iye mizimu minomwe ya kuipa. [[14]

¹⁰Mariya Madhalena aenda kalonga kuna andzace Yezu. Iwo akhatsukwala mbakhalira.

¹¹Mudapibva iwo mbapilongwa kuti Yezu ali m'maso, pontho kuti akhadaonekera kuna Mariya Madhalena, iwo akhonda kupitawira.

¹²Buluka penepo, Yezu aonekera pontho na makhaliro anango kuli anyakupfundza ace awiri, mbakhaenda kunja kwa nzinda.

¹³Iwo abwerera mbaenda kalonga penepyo kuna anyakupfundza anango. Mbwenye iwo akhonda kupitawira pire pidalongwa na andzawo awiri.

¹⁴Pakumalisira, Yezu aonekera pontho kuli anyakupfundza ace khumi na m'bodzi pikhadya iwo. Yezu aasandika na thangwi yakukhonda kukhulupira kwawo, pontho na upoka wawo wakukhonda kutawira pinalonga andzawo akhadaona Yezu wakulamuka pa kufa.

¹⁵Yezu aapanga tenepa: “Ndokoni pa dziko yonsene ya pantsi pano, mbamumwaza Mphangwa Zadidi kuna anthu onsene.

¹⁶Ule anatawira mbatambira batixmu anapulumuka, mbwenye ule anakhonda kutawira, anatongwa.

¹⁷Kuli ale anatawira anadza kapaswa mphambvu za kucita pirengo ninga ipi: Na dzina yanga, anathamangisa mizimu ya kuipa, analonga malongero mapsa,

¹⁸anaphata nyoka, angamwa ntombwe wa kupha munthu, nkhabe kuacita pyakuipa, pontho angaphemberera atenda mbaasandzika manja, iwo ana wanga.”

¹⁹Pakumala kulonga penepyo na anyakupfundza ace, Mbuya Yezu akwatiwa mbaenda kudzulu, mbakhala ku khundu ya nkono wa madyo wa Mulungu.

²⁰Na tenepo, anyakupfundza a Yezu aenda mbamwaza Mphangwa Zadidi m'makhundu onsene. Mbuya akhaaphedza na pirengo toera kusimbisisa mphangwa zikhalonga iwo kuti ndizodi.]