Read cisena Lk. 13 Bible Online

Lk. 13 - cisena bible

Lk. 13

¹Pa n'dzidzi unoule anthu anango abwera kuna Yezu mbampanga na thangwi ya amuna a ku Galileya, akhadaphiwa na ntongi Piratu pa n'dzidzi ukhaikha iwo ntsembe kuna Mulungu. Na tenepo, ciropa cawo cabvungazikana na ciropa ca ntsembe.

²Penepo Yezu aatawira mbaapanga kuti: “Kodi imwe musanyerezera kuti magalileu awa, ndiwo adadawa pikulu kakamwe kupita magalileu anango na thangwi ya nyatwa zenezi zidaona iwo?

³Simo tayu. Mbwenye Ine ndisakupangani kuti: Monsene imwe mungakhonda kuchunyuka kudawa kwanu, munafambo sawa-sawa ninga iwo.

⁴Peno musanyerezera kuti anthu ale khumi na asere a ku cisa ca Silowee, adafa thangwi ya kugwerwa na nyumba yakulapha, ndiwo ana thangwi ikulu kupita onsene anango akhakhala mu Djerusalema?

⁵Simo tayu. Ine ndisakupangani kuti monsene imwe mungakhonda kuchunyuka, munafa sawa-sawa ninga iwo.”

⁶Na tenepo, Yezu alonga nsanje uyu kuti: “Mamuna m'bodzi akhali na munda wace wa mauva. Mwenemu mukhali muti ubodzi wa nsambvu. Mudaenda iye kasaka misapu ya nsambvu uyu, hadagumanamo pinthu tayu.

⁷Na thangwi eneyo apanga mamuna akhaonera munda kuti: ‘Pyapita pyaka pitatu mbandikhadza pano kasaka misapu pa nsambvu uyu, mbandikhonda kugumana cinthu. Thangwi yanji tisausiya mbaupatisa munda pa pezi? Ugwande pyako.’

⁸“Mbwenye nyabasa antawira kuti: ‘Mbuya, tomani kuusiya pontho caka cibodzi. Ine ndinaukuwirira n'khundu mwace mbandiuyikhira pinthu pyakupasa ndimu.

⁹Ungabala caka cinafuna kudza, mphyadidi. Ungakhonda bala, munautema pyanu.’ ”

¹⁰Ntsiku ibodzi ya Sabudu, Yezu akhapfundzisa mu nyumba ya kuphemberera.

¹¹Akhalipo mwenemu nkazi m'bodzi akhaduwala pa pyaka khumi na pisere, na thangwi ya nzimu wa kuipa. Iye akhafamba na kukotama mbakhacimwana kufuthula nsana wace.

¹²Apo Yezu pidamuona iye nkazi ancemera mbampanga kuti: “Nkaziwe, nthenda yako yawanga.”

¹³Na tenepo, Yezu amuikha manja, penepo pene nsana wace wadzongoka, mbatoma kukuza Mulungu.

¹⁴Mbwenye n'tsogoleri wa nyumba ya kuphemberera aipirwa na kuona kuti Yezu awangisa munthu ntsiku ya Sabudu, mbapanga mbumba kuti: “Ziripo ntsiku zitanthatu zakuphata basa, bwerani ntsiku zenezi toera muwangiswe. Mbwenye lekani kubwera ntsiku za Sabudu.”

¹⁵Penepo Yezu antawira kuti: “Anyauthambi! Mbani pakati panu anakhonda kufungulira ng'ombe peno buru yace n'thanga ntsiku ya Sabudu, toera kwenda kaimwesa madzi?

¹⁶Mphapo nkazi uyu wa dzindza ya Abharaamu adamangwa na Sathani pyaka khumi na pisere, nkhabe kukwanira kuti iye akwanise kusudzulwa nthenda yace ntsiku ya Sabudu?”

¹⁷Pakumala kulonga penepyo, anyamalwa onsene a Yezu akhala na manyadzo na kutawira kudacita Iye. Mbwenye mbumba yonsene yakomerwa na pinthu pyakudzumisa pikhacita Yezu.

¹⁸Na tenepo, Yezu alonga kuti: “Walandana nanji Umambo wa Mulungu? Ndinaulandanisa nanji?

¹⁹Walandana na mbeu ibodzi ing'ono,[9] idakwatiwa na mamuna m'bodzi mbaibzala n'dimba mwace. Mbeu yakula mbikhala muti, mbalame mbizibwera kamanga ntsandza zawo mu nthawi zace.”

²⁰Yezu athimiza mbalonga kuti: “Ndinaulandanisa nanji Umambo wa Mulungu?

²¹Umambo wa Mulungu walandana na ntombwe wa kutupisa mikate, udabvungaza nkazi na ntsengwa zitatu za ufa, mpaka kutupisa ufa onsene.”

²²Buluka penepo, Yezu akhafamba mbapfundzisa nzinda na nzinda, cisa na cisa, pa kwenda kwace ku Djerusalema.

²³Munthu m'bodzi am'bvundzisa kuti: “Mbuya, ndi pang'ono anafuna kudza kapulumuka?” Yezu antawira kuti:

²⁴“Citani mphambvu toera mupite na nsuwo ung'ono. Thangwi ndisakupangani kuti azinji anati asake kupita, mbwenye anati apicimwane.

²⁵Mwanacinthu nyumba angalamuka mbafunga citseko, imwe munati mukhale kunja, mbumumenya citseko mbamulonga kuti: ‘Mbuya, tifungulireni citseko.’ “Mbwenye iye anatawira kuti: ‘Nkhabe kukudziwani. Pontho nkhabe kukudziwani ndimwe a kupi.’

²⁶“Na tenepo, imwe munati mulonge kuti: ‘Tadya, mbatimwa pabodzi na imwe. Pontho imwe mwapfundzisa m'miseu mwathu.’

²⁷“Mbwenye iye anakutawirani kuti: ‘Ine nkhabe kukudziwani. Pontho nkhabe kukudziwani ndimwe a kupi. Bulukani pano, imwe monsene munacita pyakuipa.’

²⁸“Penepo panadza kaoneka kulira na kukukuta mano, mungaona Abharaamu, Izaki na Djakobo na maporofeta onsene mu Umambo wa Mulungu, imwe mbumukhala kunja.

²⁹Anthu azinji a kumabulukira dzuwa, na kumadokero a dzuwa, anati abwere mbaenda kakhala pa phwandu, mu Umambo wa Mulungu.

³⁰Ndimo mwene, alipo anango akumalisira anati akhale akutoma. Alipombo anango akutoma, anati akhale akumalisira.”

³¹Pa n'dzidzi unoule afarisi anango anfendedzera Yezu mbampanga kuti: “Buluka pano uyende pyako, thangwi Herodhi asafuna kukupha.”

³²Yezu aatawira tenepa: “Ndokoni mukhalonge kuna n'nyenga ule kuti Ine, lero na mangwana ndisathamangisa mizimu ya kuipa na kuwangisa atenda. Mphapo nkucauno, ndinamalisa basa yanga.”

³³Apo Yezu athimiza na kulonga kuti: “Mbwenye Ine ndisafunika ndifambe lero, mangwana na nkucauno. Thangwi nkhabe funika kuti mporofeta afe kunja kwa Djerusalema.

³⁴“Djerusalema, Djerusalema, iwe unapha maporofeta, pontho mbumenya na myala ale adatumirwa iwe na Mulungu! Kangasi mbandifuna kugumanya ana ako, ninga nkhuku isagumanya anapiye ace m'mapapido mwace, iwe mbukhonda!

³⁵Lang'anani, nyumba yanu inadza kakhala madembe. Pontho ndisakupangani kuti imwe nkhabe kudza kandionabve tayu, mpaka n'dzidzi unadza imwe kalonga kuti: ‘Mbasimbwe ule anadza na dzina ya Mbuya!’ ”