Read cisena Lk. 18 Bible Online

Lk. 18 - cisena bible

Lk. 18

¹Na tenepo, Yezu alonga kuna anyakupfundza ace nsanje ubodzi toera kuapangisa kuti asafunika aphembere mbakhonda kuneta.

²Iye atoma kulonga tenepa: “Akhalipo mu nzinda ubodzi nyakutonga miseru m'bodzi wakukhonda kugopa Mulungu, pontho akhali munthu akhakhonda kulemedza andzace.

³Mu nzinda unowu, akhalipombo nkazi m'bodzi adaferwa na mamuna wace, akhaenda kazinji kene kuna nyakutonga miseru unowu, mbakhalonga tenepa: ‘Nditongerenimbo nseru wanga una ine na nyamalwa wanga.’ ”

⁴“Nyakutonga miseru amala ntsiku zingasi mbakhakhonda. Mbwenye pakumalisa alonga ekha ene kuti: ‘Ine nkhabe gopa Mulungu, pontho nkhabe munthu m'bodzi analemedza ine pantsi pano.

⁵Mbwenye na thangwi ya kundinyangula kunandicita manferwa uyu, ine ndinati ndin'gwandire nseru wace, toera akhonde kudza kandisanya pontho.’ ”

⁶Penepo Mbuya athimiza pontho na kulonga kuti: “Bvani pinalonga ntongi uyu wa kuipa.

⁷Nkhulongera kuti Mulungu nkhabe kudza kagwanda miseru ya anthu ace adasankhula iye, anan'dembetera masiku na masikati? Musanyerezera kuti Iye anaasiya mbadikhira n'dzidzi ukulu ene?

⁸Ine ndisakupangani kuti Mulungu anaitonga miseru ya mbumba yace na mwansanga. Mphapo Ine, Mwana wa Munthu ndingabwera, nkhulongera kuti ndinati ndigumane kukhulupira pantsi pano?”

⁹Kuna ale akhanyerezera okha ene kuti mbakulungama, mbakhapwaza andzawo, Yezu aapanga nsanje uxu:

¹⁰“Amuna awiri aenda kaphembera mu Nyumba ya Mulungu. M'bodzi akhali nfarisi, m'bodzi akhali nyakukumbusa misonkho.

¹¹Nfarisi alimira mbakhaphembera na muntima mwace tenepa: ‘Ho! Mulungu, ndisapereka takhuta kuli imwe, thangwi ine ndasyana na anthu anango ninga awa: Mambava, a kuipa, na anyaupombo. Pontho ndasyana na uyu nyakukumbusa misonkho.

¹²Ine ndisapimana cakudya kawiri pa sumana, pontho pa pinthu pyanga pyonsene pina wina ine, ndisabulusa cacikhumi.’

¹³“Mbwenye nyakukumbusa misonkho akhala kutali, mbakhacimwana na kulang'ana kwene kudzulu, mbwenye akhamenya cifuwa cace mbakhalonga kuti: ‘Mulungu wanga, ndibverenimbo ntsisi, thangwi ndine nyakudawa.’

¹⁴“Yezu amalisa na kulonga tenepa: Ine ndisakupangani kuti uyu nyakukumbusa misonkho, ndiye basi adalekererwa na Mulungu. Ndzace nkhabe. Thangwi ule anapikuza anadza kacepeswa. Apo ule anapicepesa anadza kakuzwa.”

¹⁵Penepo, anthu anango akhabweresa ana ang'ono kuna Yezu toera Iye aakhuye. Anyakupfundza ace na kuona penepyo, akhaasandika.

¹⁶Mbwenye Yezu acemera ana mbadza dhuzi na Iye, mbalonga kuti: “Asiyeni ana abwere kuna Ine, lekani kuakhondesa. Thangwi Umambo wa Mulungu ndi wa ale adalandana na iwo.

¹⁷Ndimo mwene, ndisakupangani kuti: Ule anakhonda kutambira Umambo wa Mulungu ninga mwana ng'ono, cipo anadza kapitamo.”

¹⁸Mamuna m'bodzi wa mbiri am'bvundza kuti: “Mpfundzisi Wadidi, ndisafuna ndicitenji toera ndikhale na upulumuki wakukhonda kumala?”

¹⁹Yezu antawira tenepa: “Thangwi yanji usandicemera wadidi? Wadidi ndi m'bodzi basi, ndiye Mulungu.

²⁰ Iwe usadziwa matongero analonga tenepa: ‘Leka kucita upombo, leka kupha munthu, leka kuba, leka kukhala nyamaso wa uthambi, lemedza baba wako na mai wako.’ ”

²¹Apo mamuna antawira tenepa: “Penepi pyonsene, ine ndisapicita kutomera mbandiri mwana.”

²²Yezu pidabva Iye penepyo, ampanga tenepa: “Casala cinthu cibodzi kuna iwe. Gulisa pyonsene pina iwe, kobiri yace upase anyakucherenga. Tenepa unakhala na mpfuma kudzulu. Ungamala bwera, unditowere.”

²³Mamuna na kubva penepyo, atsukwala pikulu, thangwi akhadapfuma pikulu kakamwe.

²⁴Yezu na kumuona kutsukwala kwace alonga tenepa: “Pisanentsadi pikulu kakamwe kuna apfumi kuti apite mu Umambo wa Mulungu!

²⁵Ndimo mwene, pisanentsa pikulu kakamwe kupitisa m'pfumi mu Umambo wa Mulungu, kupiringana kupitisa cinyama cikulu cinacemerwa kamelo mu benga ya ntsingano.”

²⁶Anthu adabva penepyo atoma kubvundzisa kuti: “Na tenepo, mbani anakwanisa kupulumuka?”

²⁷Apo Yezu atawira kuti: “Pinacimwanika kuna anthu, kuna Mulungu pisakwanisika.”

²⁸Penepo Pedhru alonga kuti: “Lang'anani, ife tasiya nyumba zathu mbatikutowerani.”

²⁹Yezu atawira tenepa: “Ndimo mwene, ndisakupangani kuti: Nkhabe munthu anasiya nyumba yace, nkazi wace, abale ace, ababa ace, peno ana ace na thangwi ya Umambo wa Mulungu,

³⁰mbakhonda kubwezerwa pa midzidzi ino pinthu pizinji kakamwe, pontho mbakhonda kutambira upulumuki wakukhonda kumala pa midzidzi inafuna kudza.”

³¹Penepo Yezu acemera pa khundu anyakupfundza ace khumi na awiri, mbaapanga tenepa: “Lang'anani, ife tiri kwenda ku Djerusalema. Kweneko pinacitika pyonsene pidalemba maporofeta na thangwi yanga, Ine, Mwana wa Munthu.

³²Ine ndinadza kaperekwa m'manja mwa anthu adakhonda kukhala madjuda. Iwo anadza kandisingirira, mbanditikana, na kundiphulira mata.

³³Pontho anati andimenye na n'chamu, angamala mbadza kandipha. Mbwenye pa ntsiku yacitatu, ndinadza kalamuka pa kufa.”

³⁴Mbwenye anyakupfundza acimwana kupibvesesa pinthu penepyo. Thangwi pikhalongera mafala enewa, pikhali pinthu pyakubisala kuna iwo, pontho iwo hakhapidziwa tayu ndi ninji pikhalongera Yezu.

³⁵Yezu mukhafika iye dhuzi na nzinda wa Djeriko, agumana boli-boli m'bodzi mbali nawa pantsi, n'khundu mwa njira, mbakhaphemba pinthu.

³⁶Mukhabva iye mbumba mbikhapita, iye abvundzisa kuti ndi ninji penepi.

³⁷Apo anthu antawira kuti ndi Yezu wa ku Nazareti ali kupita.

³⁸Na tenepo, boli-boli atoma kukhuwa mbakhalonga kuti: “Yezu, Mwana wa Dhavidhi, ndibverenimbo ntsisi!”

³⁹Anthu akhaenda kutsogolo akhansandika toera amatame. Mbwenye iye akhakhuwiratu kakamwe, mbakhalonga kuti: “Yezu, Mwana wa Dhavidhi, ndibverenimbo ntsisi!”

⁴⁰Yezu alimira mbancemeresa. Mphapo pidafika iye dhuzi Yezu am'bvundza kuti:

⁴¹“Usafuna kuti ndikucitirenji?” Iye atawira kuti: “Mbuya, ine ndisafuna ndione.”

⁴²Yezu ampanga kuti: “Ona, wawanga! Kukhulupira kwako kwakuwangisa.”

⁴³Pa n'dzidzi ubodzi ene, iye atoma kuona pontho, mbapasa mbiri Mulungu, mbatoma kutowera Yezu. Na tenepo, anthu onsene adapyona penepyo atoma kusimba Mulungu.