Read cisena Lk. 19 Bible Online

Lk. 19 - cisena bible

Lk. 19

¹Yezu apita mu Djeriko, mbakhagwanda na mu nzinda.

²Mwenemu mukhali na mamuna m'bodzi wa kupfuma, dzina yace ndi Zakeu, nkulu wa anyakukumbusa misonkho.

³Iye akhafuna kuona Yezu, mbwenye akhacimwana thangwi ya mwinji wa anthu, pontho iye akhadabvira.

⁴Na tenepo, Zakeu athamanga kutsogolo kwa mbumba, mbakwira m'muti wa nsambvu toera amuone, thangwi Yezu akhafuna kupita na penepo.

⁵Mudafika Yezu penepo, alang'ana n'dzulu mbalonga kuna Zakeu kuti: “Zakeu, chita na mwansanga thangwi lero ndisafuna ndikhale n'nyumba mwako.”

⁶Na tenepo, Zakeu achita na mwansanga, mbantambira na kukomerwa.

⁷Onsene adaona penepyo, atoma kudungunya mbalonga kuti: “Mamuna uyu aenda kaphemba dalo ku nyumba kwa nyakudawa!”

⁸Mbwenye Zakeu alamuka, mbalonga kuna Mbuya kuti: “Lang'anani Mbuya, kutomera lero ndinagawa pakati mpfuma yanga, phindi inango mbandiipasa anyakucherenga. Pontho ngakhala ndabera munthu, ndinam'bwezera kanai pa pidankwatira ine.”

⁹Na tenepo, Yezu alonga kuti: “Lero upulumuki wapita n'nyumba ino, thangwi mamuna uyu ndi wa dzindza ibodzi ene ya Abharaamu.

¹⁰Thangwi Ine, Mwana wa Munthu, ndabwera kakwata na kupulumusa ule adataika.”

¹¹Yezu alonga nsanje ubodzi kuli ale akhabva pikhalonga Iye, thangwi akhali dhuzi na ku Djerusalema. Pontho, mbumba ikhanyerezera kuti Umambo wa Mulungu unafika na mwansanga.

¹²Na tenepo, Yezu aapanga kuti: “Mamuna m'bodzi wa dzindza ya kubvekera, abuluka mbaenda ku dziko inango ya kutali, toera kweneko aende kapaswe cidzo ca umambo, angamala abwerere.

¹³Na tenepo, acemera anyabasa ace khumi, aapasa kobiri khumi, mbaapanga tenepa: ‘Ifambiseni kobiri iyi mpaka kubwera kwanga.’

¹⁴“Mbwenye anthu anango a n'dziko mwace, akhanzonda. Na tenepo, atuma anthu n'nduli mwace, kuti aende kalonge kukhaenda iye, na mphangwa izi: ‘Ife nkhabe kunfuna mamuna unowu kuti akhale mambo wathu.’

¹⁵“Mamuna aupaswa umambo, mbabwerera ku nyumba. Penepo, acemeresa anyabasa ace akhadapasa iye kobiri, toera adziwe kuti awina ntengo wanji.

¹⁶“Wakutoma afika mbalonga tenepa: ‘Mbuya, kobiri yanu ire idandipasa imwe, ine ndawina nayo zinango khumi.’

¹⁷“Mbuya wace atawira tenepa: ‘Wacita pyadidi. Ndiwe nyabasa wadidi! Thangwi wakwanisa kunyindirika pa pinthu ping'ono, unati utonge mizinda khumi.’

¹⁸“Nyabasa waciwiri abwera mbalonga tenepa: ‘Mbuya, na kobiri yanu ire idandipasa imwe, ine ndawina nayo zinango zixanu.’

¹⁹“Mbuya wace ampanga tenepa: ‘Iwe unadza katongambo mizinda mixanu.’

²⁰“Nyabasa unango afika mbalonga tenepa: ‘Mbuya, kobiri yanu ndi iyi. Ine ndaimangira pa cinguwo mbandiibisa.

²¹Ndikhakugopani, thangwi ndimwe munthu wakunentsa. Musabulusa pidakhonda ikha imwe, pontho musabvuna pidakhonda bzala imwe.’

²²“Mbuya wace atawira tenepa: ‘Iwe ndiwedi nyabasa wa kuipa! Ndinakukonesa na mafala ako pontho. Iwe ukhapidziwa kuti ndine munthu wa kunentsa. Ndisabulusa pidakhonda ikha ine, pontho ndisabvuna pidakhonda bzala ine.

²³Ndi thangwi yanji mphapo, wakhonda kuiyikha kobiri yanga n'nyumba zinakoyera anthu kobiri? Na tenepo, pa kubwerera kwanga, mbidaipaswa na m'bairo.’

²⁴“Mbapanga ale akhakhala penepo kuti: ‘Mpokosereni kobiri yace muipase ule ana kobiri khumi.’

²⁵“Iwo atawira tenepa: ‘Mbuya, iye anazo kale kobiri khumi!’

²⁶“Mbuya wawo aapanga tenepa: ‘Ndinakupangani kuti ule anapyo, anadza kapaswa pontho pinango. Mbwenye ule adapisowa, anadza kapokoserwa na pire pyene pina Iye.’

²⁷Cincino, ndibwereseni kuno anyamalwa anga, ale akhakhonda kuti ine ndikhale mambo wawo. Apheni pamaso panga.”

²⁸Yezu mudamala Iye kulonga penepyo, atsogola kwenda ku Djerusalema.

²⁹Mukhakhala Iye dhuzi na cisa ca Bhetifaji na ca Bhetanya, pa phiri ya Mulivera, atuma anyakupfundza ace awiri,

³⁰mbaapanga tenepa: “Ndokoni ku cisa ciri patsogolo panu. Pinacita imwe pite mwenemu, munagumana mwana buru wakumangirwa, kuti cipo adzati kupakirwa na munthu. Nsudzuleni, mubwere na iye kuno.

³¹Mungabvundziwa na munthu kuti: ‘Thangwi yanji musansudzula?’ Mpangeni kuti: Mbuya asanfuna.”

³²Iwo aenda, mbagumana pyonsene ninga mukhadapangwa iwo na Yezu.

³³Mukhansudzula iwo mwana buru, anacinthu abvundzisa kuti: “Thangwi yanji musasudzula mwana buru?”

³⁴Iwo atawira tenepa: “Mbuya asanfuna.”

³⁵Na tenepo, iwo ankwata mwana buru mpaka kuna Yezu. Akwata nguwo zawo mbaziyikha pa nsana wa mwana buru, mbaphedza Yezu kupakira.

³⁶Mukhaenda Iye, mbumba ikhaenda mbithasika nguwo zawo n'njira.

³⁷Mukhafika Yezu dhuzi na panterero wa phiri ya Mulivera, mwinji onsene wa anyakupfundza ace, watoma kukuza Mulungu na mphambvu na kukomerwa konsene, na thangwi ya pirengo pyonsene pikhadaona iwo,

³⁸mbakhakhuwa tenepa: “Mbasimbwe Ule Mambo anadza na dzina ya Mbuya!” “Ntendere kudzulu, na mbiri kuna Mulungu!”

³⁹Penepo, afarisi anango akhali pakati pa mbumba, alonga kuna Yezu kuti: “Mpfundzisi, matamisa anyakupfundza ako!”

⁴⁰Yezu atawira tenepa: “Ine ndisakupangani kuti iwo angamatama, myala inakhuwa!”

⁴¹Yezu mudafika iye dhuzi na Djerusalema, aona nzinda, mbatoma kuulirira.

⁴²Mbalonga tenepa: “Ha! Djerusalema! Mbudadziwa pyako lero ene cire cinadzesa ntendere! Mbwenye cincino iwe nkhabe kwanisa kupiona penepi na maso ako.

⁴³Zinafika ntsiku za kuti anyamalwa ako anakucitira mpanda, mbakuzungulira na iwo na kukufungira m'makhundu onsene.

⁴⁴Pontho anakugwisa pantsi iwe na ana ako ene. Nkhabe kudza kasala mwala padzulu pa mwala unango, thangwi iwe wakhonda kudzindikira n'dzidzi udadza kakupulumusa Mulungu.”

⁴⁵Buluka penepo, Yezu apita mu Nyumba ya Mulungu, mbatoma kuthamangisa ale akhagulisa mwenemu,

⁴⁶ mbalonga tenepa: “Pyalembwa M'bukhu ya Mulungu kuti: ‘Nyumba yanga inadza kakhala nyumba ya kuphemberera.’ Mbwenye imwe mwaisanduza kuti ikhale ‘mphako ya kubisalira mambava. ’ ”

⁴⁷Ntsiku zonsene, Yezu akhapfundzisa mu Nyumba ya Mulungu. Mbwenye akulu aanyantsembe, na anyakudziwisa a Mwambo, pabodzi na atsogoleri a mbumba, akhafuna kumupha.

⁴⁸Mbwenye akhasaka kuti anapicita tani penepi. Thangwi mbumba yonsene ikhakomerwa na kubva mafala ace.