Read cisena Jw. 21 Bible Online

Jw. 21 - cisena bible

Jw. 21

¹Pakumala penepyo, Yezu abulukira pontho kuna anyakupfundza ace pa gombe ya bara ya Tibheriyadhi.[44] Pyacitika tenepa:

²Onsene akhali pabodzi pene. Simau Pedhru, na Tomasi akhacemerwa Dhidhimu, Natanyeli wa ku nzinda wa Kanaa ya ku Galileya, na ana a Zebhedheu, na anyakupfundza ace anango awiri.

³Penepo, Simau Pedhru aapanga tenepa: “Ndiri kwenda kamedza.” Iwo alonga kuti: “Ife tinendambo na iwe.” Na tenepo, iwo aenda mbapakira m'bote, mbwenye masiku enewa hadaphata cinthu tayu.

⁴Mukhaca kunja, Yezu afika pa gombe, mbwenye anyakupfundza ace acimwana kun'dzindikira.

⁵Yezu aabvundza kuti: “Ananga, mwaphata nyama?” Iwo antawira kuti: “Nkhabe.”

⁶Na tenepo, Yezu aapanga kuti: “Gwisirani kokota ku khundu ya madyo ya bote, munaphata nyama.” Penepo iwo agwesera kokota, mbacimwana kuikwewa na thangwi ya kudzala kwa nyama.

⁷Nyakupfundza ule akhafuniwa na Yezu, apanga Pedhru kuti: “Ndi Mbuya!” Simau Pedhru, pidabva iye penepi, abvala nguwo yace ya kunja, thangwi akhadaidula, mbagwera m'madzi.

⁸Anyakupfundza anango abwera na bote mbakwewa kokota ikhadadzala na nyama, thangwi ukhadasala nsindzo wa meturu makumapfemba, na kufuna kufika n'gombe.

⁹Mudabuluka iwo m'bote, penepo aona moto wa makala na nyama ibodzi ya m'madzi padzulu pace, na nkate.

¹⁰Yezu aapanga kuti: “Bweresani nyama zinango za m'madzi zidapha imwe.”

¹¹Simau Pedhru akwira m'bote, mbakwewa kokota kuntunda. Kokota ikhadadzala na nyama zikulu za m'madzi zakukwana dzana na makumaxanu na zitatu, mbwenye na nyama zonsene izi, kokota hidapanduka tayu.

¹²Penepo, Yezu aapanga kuti: “Bwerani mudye.” Nkhabe m'bodzi wa anyakupfundza ace akhali na cipapu ca kum'bvundza kuti: “Ndiwe ani?” Thangwi iwo akhan'dziwa kuti ndi Mbuya.

¹³Yezu aafendedzera, akwata nkate mbaapasa, mbacitambo pibodzi-bodzi na nyama ya m'madzi.

¹⁴Kutomera pakulamuka kwa Yezu pa kufa, kupangizika uku kudacita Iye kuna anyakupfundza ace, kukhali kwacitatu.

¹⁵Mudamala iwo kudya, Yezu abvundza Simau Pedhru kuti: “Simau, mwana wa Juwau,[45] iwe usandifuna kupita awa?” Iye alonga kuti: “Ande Mbuya, Imwe musadziwa kuti ndisakufunani.” Yezu ampanga tenepa: “Dyesa ana mabira anga.”

¹⁶Yezu alonga pontho kaciwiri kuti: “Simau, mwana wa Juwau, iwe usandifuna?” Iye antawira kuti: “Ande Mbuya, Imwe musapidziwa kuti ine ndisakufunani.” Yezu ampanga kuti: “Kumbiza mabira anga.”

¹⁷Yezu am'bvundzisa pontho kacitatu mbalonga kuti: “Simau, mwana wa Juwau, iwe usandifuna?” Penepo, Pedhru atsukwala thangwi Yezu am'bvundza kacitatu kuti: “Iwe usandifuna?” Iye ampanga tenepa: “Mbuya, Imwe musadziwa pinthu pyonsene, pontho musadziwa kuti ndisakufunani.” Yezu ampanga kuti: “Dyesa mabira anga.

¹⁸Ndimo mwene, ndimo mwene ndinakupanga kuti: Pikhakhala iwe m'phale, ukhabvala wekha mbuyenda kukhafuna iwe. Mbwenye ungadza kakalamba, unathukula mikono yako mbubvazikwa na munthu unango, pontho mbakukwata mbaenda nawe kule kuna khonda iwe funa.”

¹⁹Penepi Yezu apilonga toera kupangisa mafero akhafuna cita Pedhru, akhafuna pasa na iye mbiri Mulungu. Buluka penepo, Yezu ampanga kuti: “Nditowere!”

²⁰Pedhru azungunuka mbaona kuti akhatowererwa na ule nyakupfundza akhafuniwa maka na Yezu. Nyakupfundza unowu ndi ule akhali n'khundu mwa Yezu pa n'dzidzi ukhadya iwo, mbakhabvundzisa kuti: “Mbuya, mbani anafuna kukusandukirani?”

²¹Pedhru pidaona iye nyakupfundza ule, abvundza Yezu kuti: “Mbuya, ndi ninji pinafuna citika kuna uyu?”

²²Yezu antawira tenepa: “Ine ndinganfuna kuti iye akhale m'maso kufikira Ine ndabwera, iwe unapyonji? Iwe nditowere!”

²³Na tenepo, zikhadabveka mphangwa pakati pa abale, zakulonga kuti nyakupfundza unoule hanafabve tayu. Mbwenye Yezu hadampanga kuti hanafabve tayu. Pidalonga Iye ndi ipi basi: “Ine ndingafuna kuti iye akhale m'maso kufikira Ine ndabwera, unapyonji?”

²⁴Nyakupfundza uyu ndiye anacita umboni wa pinthu ipi, mbapilemba, pontho ife tisadziwa kuti umboni wace ngwamaso.

²⁵Yezu acitambo pontho pinthu pinango pizinji. Pyonsene mbapidalembwa cibodzi na cibodzi, ndisanyerezera kuti mabukhu akhafuna kulembwa, mbadakwanapo pa dziko yonsene tayu.