Read cisena Mab. 14 Bible Online

Mab. 14 - cisena bible

Mab. 14

¹Ku nzinda wa Ikonyo, Paulu na Bharnabhasi, ninga nsambo wawo, apita n'nyumba ya kuphemberera ya madjuda. Mwenemu, iwo alonga mpaka mwinji ukulu wa madjuda na wa ale adakhonda kukhala madjuda afikira kutawira Mbuya.

²Mbwenye madjuda akhakhonda kutawira Yezu, akhakuwizira ale adakhonda kukhala madjuda, kuti aipirwe na abale anyakutawira Yezu.

³Paulu na Bharnabhasi amala ntsiku zizinji ku Ikonyo, mbakhalonga na cipapu consene na thangwi ya Mbuya. Penepo, Mbuya akhasimbisa mphangwa za kukoma ntima kwace, mbakhaapasa mphambvu za kucita pidzindikiro na pirengo na manja awo.

⁴Mbumba ya mu nzinda ikhadagawika. Anango akhali ku khundu ya madjuda, anango akhali ku khundu ya apoxtolo.

⁵Na tenepo, ale adakhonda kukhala madjuda, pabodzi pene na madjuda na atsogoleri awo, abverana toera kuathabusa, na kuamenya na myala.

⁶Paulu na Bharnabhasi mudabva iwo penepi, athawira ku Lixtara na ku Dherbhi, mizinda ya Likaonya, na m'madziko a n'khundu-n'khundu.

⁷Kweneko iwo mbakhamwaza Mphangwa Zadidi.

⁸Mu nzinda wa Lixtara, mukhali na nyampfutete. Iye akhakhala nawa thangwi akhadalamala myendo, pontho cipo mbabalwa akhadasati kufamba.

⁹Mamuna uyu, akhabva mafala a Paulu. Paulu mudamulang'anisa iye mwadidi mwene, amuona kuti akhakhala na cikhulupiro cakuwangiswa,

¹⁰ampanga na mphambvu kuti: “Lamuka, ulimire!” Mamuna anumpha, mbatoma kufamba.

¹¹Anthu mudaona iwo pidacita Paulu, atoma kukhuwa na malongero a cilikaonya kuti: “Awa mbalungu adasanduka kudza anthu, mbachita kudza kuna ife.”

¹²Penepo, Bharnabhasi apaswa dzina ya mulungu anacemerwa Djupiteri,[11] Paulu mbapaswa dzina ya mulungu anacemerwa Merikuryo,[12] thangwi Paulu ndiye akhabulukira pa kulonga.

¹³Nyantsembe wa mulungu Djupiteri, akhakhala na nyumba ya ntsembe ikhalang'anisana na nzinda, abweresa n'gombe na nkhata za maluwa pa nsuwo wa nzinda, thangwi iye na mbumba akhafuna kupha n'gombe zenezi, acitire ntsembe Paulu na Bharnabhasi.

¹⁴Mbwenye ma apoxtolo Paulu na Bharnabhasi mudabva iwo penepi apandula nguwo zawo, mbathamanga mpaka pakati pa mbumba, mbakhuwa tenepa:

¹⁵“Amunamwe, thangwi yanji musacita penepi? Ife ndife anthu ninga na imwembo! Ife tisakudzeserani Mphangwa Zadidi, mbatikupangani kuti musiye pinthu pyapezi, muzungunukire kuna Mulungu wa m'maso, adacita kudzulu na pantsi, na bara, na pyonsene piri mwenemu.

¹⁶Kale ene Mulungu aasiya madzindza onsene kuti acite kufuna kwawo.

¹⁷Mbwenye Mulungu hadasiya kupicitikira umboni tayu. Iye apangisa udidi wace, akubvumbirani na madzi akubuluka kudzulu, akumereserani mbeu zanu, akudyesani misapu, mbamutsandzaya m'mitima mwanu.”

¹⁸Na mafala onsene awa, apoxtolo pikhaanentsa kuakhondesa anthu kuti aacitire ntsembe.

¹⁹Penepo, abwera madjuda angasi a ku Antiyokiya na a ku Ikonyo. Iwo akwanisa kunyengerera mbumba, mbamenya Paulu na myala, mbankwekweta mpaka kunja kwa nzinda, thangwi akhanyerezera kuti afa.

²⁰Mbwenye pidazungulirwa Paulu n'khundu mwace na anyakutowera Yezu, iye alamuka mbapita pontho mu nzinda. Mangwana mwace, iye na Bharnabhasi aenda ku nzinda wa Dherbhi.

²¹Paulu na Bharnabhasi amwaza Mphangwa Zadidi mu nzinda wa Dherbhi, anthu azinji mbadza kakhala anyakupfundza a Yezu. Na tenepo, abwerera kwenda ku mizinda ya Lixtara, Ikonyo na Antiyokiya,

²²mbakhapasa mphambvu anyakutowera Yezu, na kuapasa cipapu kuti akhale ciriri pa kukhulupira, mbakhalonga kuti: “Pisatongwa kuti tione nyatwa zizinji, toera tipite mu Umambo wa Mulungu.”

²³Pa abale a gereja ibodzi na ibodzi, Paulu na Bharnabhasi akhaasiya mbakhasankhula akulu akuatsogolera. Iwo akhaphembera na kupimana cakudya, mbakhaaikha patsogolo pa Mbuya ule akhakhulupira iwo.

²⁴Buluka penepo, Paulu na Bharnabhasi agwanda na n'dziko ya Pizidhya, mbaenda ku dziko ya Panfilya.

²⁵Pidamala iwo kumwaza fala ku nzinda wa Peridji, aenda ku gombe ya Atalya.

²⁶Buluka pa Atalya, apakira xitima ya m'madzi mbaenda ku Antiyokiya wa ku Sirya, kule kukhadaperekwa iwo n'kati mwa kukoma ntima kwa Mulungu kuti kuaphedze pa basa eneyi idamala iwo kucita.

²⁷Mudafika iwo kweneko, acemera abale onsene a gereja, mbaapanga pyonsene pidaacitisa Mulungu na manja awo, pontho na kufungula nsuwo kudacita Iye kuli ale adakhonda kukhala madjuda, kuti akhulupirembo.

²⁸Kweneko, Paulu na Bharnabhasi akhala ntsiku zizinji pabodzi pene na abale anyakutowera Yezu.