Read cisena Mab. 17 Bible Online

Mab. 17 - cisena bible

Mab. 17

¹Mudapita iwo na ku nzinda wa Anfipolisi na wa Apolonya, afika ku Tesalonika, kule kukhali na nyumba ibodzi ya kuphemberera ya madjuda.

²Paulu, ninga nsambo wace, aenda ku nyumba ya kuphemberera ya madjuda, mbamala maSabudu matatu mbakhaketesana na iwo na thangwi ya pya m'Bukhu ya Mulungu.

³Iye akhaachululira mbakhaapangisa kuti Misiya akhatongwa aone nyatwa, mbalamuka pa akufa. Mbathimiza na kuapanga kuti: “Yezu unowu anakupangani ine, ndiye Kirixtu.”

⁴Madjuda anango atawira pikhalonga Paulu na Silasi, mbaenda kagumanyikana na iwo, pabodzi na azinji agerego akhagopa Mulungu, na akazi azinji a mbiri.

⁵Mbwenye madjuda akhala na bibvu. Na tenepo, iwo akwata amuna angasi pakati pa anyakuipa mitima a m'miseu, agumanya mwinji wa anthu, mbatoma kucita cikuti mu nzinda. Apita na mphambvu n'nyumba mwa Djasoni kasaka Paulu na Silasi, toera aakwate adze na iwo pakati pa mbumba.

⁶Pidaasowa iwo mwenemu, akwata Djasoni na abale anango, mpaka pamaso pa akulu a mu nzinda, mbakhakhuwa tenepa: “Amuna awa anakhala mbacita cikuti n'dziko yonsene, lero afikambo mu nzinda mwathu muno.

⁷Djasoni ndiye aatambira amuna enewa pa nyumba pace. Iwo onsene asacita pinthu pyakusyana na matongero a Sezari, mbakhalonga kuti alipo mambo unango anacemerwa Yezu.”

⁸Penepo, mbumba pabodzi pene na akulu a mu nzinda, na kubva penepi, azunguzika napyo.

⁹Na tenepo, Djasoni na andzace abulusa kobiri ikhatongwa iwo kubulusa pa thangwi ya nseru wawo, pidamala iwo aasiya mbaenda.

¹⁰Pa n'dzidzi ubodzi-bodzi udadoka dzuwa, abale atuma Paulu na Silasi mbaenda ku nzinda wa Bhereya. Mudafika iwo kweneko, aenda ku nyumba ya kuphemberera ya madjuda.

¹¹Anthu a ku Bhereya, akhali anthu akhasaka kudziwa kupiringana anthu a ku Tesalonika, thangwi atambira fala na ntima wawo onsene, mbakhadinkhisa ntsiku zonsene Bukhu ya Mulungu, toera aone ngakhala pyonsene ndimo mwenedi.

¹²Na tenepo, azinji awo atawira. Penepo, pakati pa agerego, azinji atawirambo, akazi a mbiri na amuna azinji.

¹³Mbwenye madjuda a ku Tesalonika, mudabva iwo kuti Paulu akhamwaza fala ya Mulungu ku Bhereya, iwo aendambo mpaka kweneko, mbatoma kunyengerera anthu kuti acite cikuti.

¹⁴Na mwansanga abale atuma Paulu mbaenda ku bara, mbwenye Silasi na Timoti asala ku Bhereya.

¹⁵Amuna akhaperekera Paulu, ankwata mbaenda na iye mpaka ku Atena. Buluka penepo, iwo abwerera na mphangwa zidatumizwa iwo, kuti pingakwanisika, Silasi na Timoti aende na mwansanga kagumanikana na Paulu.

¹⁶Paulu, pikhadikhira iye kufika kwa Silasi na Timoti ku nzinda wa Atena, akhaipirwa muntima mwace pikulu kakamwe, na kuona kuti nzinda ukhadadzala na madzimunthu akhalambira iwo.

¹⁷Na thangwi eneyo, akhaketesana na madjuda mu nyumba ya kuphemberera, na agerego akhagopa Mulungu, pontho ntsiku zonsene akhaketesana na ale anthu akhagumanyikana na iye m'misika.

¹⁸Anyakudziwisa anango a nsoka wa apikureu na a nsoka wa exitoiku, atoma kuketesana na iye. Anango akham'bvundza kuti: “Kodi asathanda longanji munthu wakukhonda kudziwa pinthu ninga unowu?” Anango akhalongambo tenepa: “Tisamuona kuti asafuna longa alungu a madzindza anango,” thangwi Paulu akhaapanga Mphangwa Zadidi za Yezu na za kulamuka kwace pa akufa.

¹⁹Na tenepo, ankwata mbaenda na iye ku mbuto ya kutongerwa miseru inacemerwa Ariyopagu. Kweneko iwo am'bvundza tenepa: “Kodi unakwanisa kutipanga mapfundzisiro enewa mapsa anatipanga iwe mbanji?

²⁰Thangwi iwe usatipanga pinthu pyakukhonda dziwika. Ife tisafuna tidziwe pisalongeranji penepi.”

²¹Thangwi anthu onsene a ku Atena na anthu akudza akhakhala mwenemu, akhanyerezera kulonga peno kubva pinthu pipsa basi.

²²Na tenepo, Paulu alimira pa Ariyopagu, mbalonga tenepa: “Imwe anthu a ku Atena! Pa pyonsene pidaona ine, pyandipangisa kuti pa makhaliro anu onsene, imwe ndimwe anthu akuphembera pikulu kakamwe.

²³Thangwi pikhafamba ine mu nzinda, mbandilang'anisa mbuto zanu za kuphembera, ndagumana guwa ya ntsembe idalembwa tenepa: ‘KUNA MULUNGU WAKUKHONDA KUDZIWIKA.’ Mphapo Mulungu unowu analambira imwe mbamukhonda kun'dziwa, ndiye unowu anakupangani ine.

²⁴“Mulungu adacita dziko na pyonsene piri mwenemu, ndiye Mbuya wa kudzulu na pantsi. Iye nkhabe kukhala mu nyumba za ntsembe zakucitwa na anthu tayu.

²⁵Iye nkhabe phatirwa basa na manja a anthu, ninga munthu wakusowa cinthu, thangwi ndiye anapasa moyo anthu onsene, apume, na pinango pyonsene.

²⁶Pa munthu m'bodzi basi, Mulungu acita madzindza onsene kuti akhale pantsi pano ponsene. Ndiye adapaka midzidzi kale na kale, mbaikha madire kuti iwo adze kakhale.

²⁷Mulungu acita penepi toera anthu akwanise kunsaka peno kum'phambasira panango anakwanisa kun'gumana, Iye mbali dhuzi ene na ife.

²⁸Thangwi tisakhala muna Iye, mbatifamba muna Iye, mbationeka m'maso tenepano. Ninga mudalonga andzanu anyakulemba kuti: ‘Ife ndifembo a dzindza yace.’

²⁹“Na tenepo, ife, na thangwi yakukhala dzindza ya Mulungu, mbatilekeni kunyerezera kuti Umulungu walandana na dzimunthu ya oro, peno ya parata peno ya myala idacitwa na udziwisi peno na manyerezero a anthu.

³⁰Kale ene Mulungu hakhatsalakana tayu na kukhonda kudziwa kwa anthu. Mbwenye cincino, Iye asapanga anthu onsene, mu mbuto zonsene kuti iwo achunyuke.

³¹Thangwi Iye asankhula ntsiku ibodzi inafuna kudza katongwa dziko mwakulungama na Mamuna adasankhula Iye. Penepi apisimbisa kuna anthu onsene, pakulamusa kwace Mamuna unowu pa akufa.”

³²Mudabva iwo Paulu mbakhalonga thangwi ya kulamuka pa akufa, anango awo akhansingirira, mbwenye anango akhalonga tenepa: “Na thangwi ya penepi unatipanga pontho ntsiku inango.”

³³Na tenepo, Paulu abuluka pakati pawo mbaenda pyace.

³⁴Amuna anango atawira mbagumanyikana na Paulu. Pa amuna enewa akhalipombo Diniju, m'bodzi wa anyakutonga miseru pa mbuto inacemerwa Ariyopagu, pontho na nkazi m'bodzi anacemerwa Dhamarisi, na anango akhali na iwo.