Read cisena Mab. 25 Bible Online

Mab. 25 - cisena bible

Mab. 25

¹Pakupita ntsiku zitatu, Fextu mbadamala kufika kale mu Sezareya, abuluka mbaenda ku Djerusalema.

²Kweneko, akulu aanyantsembe na atsogoleri a madjuda, aenda kuna Fextu kasumira Paulu.

³Iwo aphemba kuna Fextu kuti aabvere ntsisi, abuluse Paulu amwendese ku Djerusalema, Paulu mbakhonda kupifuna, thangwi iwo akhadamala bverana kale kuti aphe Paulu n'njira.

⁴Mbwenye Fextu aatawira tenepa: “Paulu ali n'kaidi ku Sezareya. Ine cincino ndinenda kweneku.

⁵Ndipase atsogoleri ako angasi ndiyende na iwo kweneko, aende kalonge pinthu pyakuipa pidaona iwo kuna mamuna uyu, ngakhala iye acitadi pyakuipa.”

⁶Pakupita na iwo pabodzi ntsiku zisere peno khumi, Fextu abuluka mbabwerera kwenda ku Sezareya. Mangwana mwace, akhala mu nyumba ya kutongera miseru, pontho acemeresa Paulu kuti akhalembo penepo.

⁷Pidafika Paulu, madjuda akhadabwera buluka ku Djerusalema, anzungulira mbatoma kumpambazira pinthu pizinji pyakugopsa. Mbwenye nkhabe cibodzi cidakwanisa iwo kupangisa pakweca.

⁸Na tenepo, Paulu atoma kutawira pikhampambazira iwo mbalonga kuti: “Ine nkhabe cibodzi cidacita ine cakuipa cakupwaza mwambo wa madjuda, peno kuxola Nyumba ya Mulungu, peno kuxola mambo Sezari.”

⁹Fextu toera akome kuna madjuda, abvundza Paulu kuti: “Iwe nkhabe funa kwenda ku Djerusalema, ukhatongerwe kweneku nseru wako pamaso panga?”

¹⁰Paulu atawira tenepa: “Ndiri pano pa thando ya kutongera miseru ya mambo Sezari. Pano ndipo panafunika ine kuti nditongwe. Imwe musapidziwa kuti nkhabe cakuipa cibodzi cidacita ine kuna madjuda.

¹¹Ngakhala ndadawisa, peno ciripo cinthu cidacita ine cakutongerwa kuphiwa naco, sinakhonda kufa tayu. Mbwenye ngakhala sipyo tayu, nkhabe m'bodzi anafuna kundipereka kwa iwo, ndisaphemba kuti nditongwe na mambo Sezari.”

¹²Pakumala kulonga na mapungu ace, Fextu alonga tenepa: “Iwe waphemba kwenda kuna Sezari! Unati uyende kuna Sezari.”

¹³Pakupita ntsiku zingasi, mambo Agiripa na Bherenise, afika ku Sezareya toera kamwanyikana na Fextu.

¹⁴Na thangwi ya ntsiku zizinji zikhadakhala iwo mwenemu, Fextu atoma kulonga nseru wa Paulu kuna mambo Agiripa kuti: “Pano pana mamuna m'bodzi adasiyiwa n'kaidi na Feliji.

¹⁵Mudaenda ine ku Djerusalema, akulu aanyantsembe na mathubu a madjuda, adza kansumira mbandiphemba kuti ndintonge na kunkonesa.

¹⁶“Mbwenye ine ndaapanga kuti Aroma nkhabe nsambo wakukonesa munthu, mbadzati pakutoma kubva anyakusuma, pamaso pa nyakusumirwa, toera nyakusumirwa akwanise kutawira pidapambazirwa iye.

¹⁷Pakubwera kwawo kuno iwo na ine, sidadembukabve tayu. Mangwana mwace ndakhala mu nyumba ya kutongera miseru, mbandincemeresa mamuna unowu.

¹⁸Anyakusuma mudatoma iwo kulonga, nkhabe ca upandu cidamulongera iwo, ninga mukhanyerezera ine.

¹⁹Cibodzi cidansumira iwo maka-maka cikhali ca thangwi ya kuphembera kwawo, pontho na thangwi ya mamuna unango m'bodzi adafa anacemerwa Yezu, analonga Paulu kuti ali m'maso.

²⁰Ine, ndzeru za kusaka kudziwa nseru wace, zikhadandimalira. Na thangwi eneyo, ndam'bvundza Paulu ngakhala asafuna kwenda katongwa ku Djerusalema pire pidasumirwa iye.

²¹Mbwenye na kuphemba kudacita Paulu kuti atongwe na mambo Sezari, ndabulusa ntemo kuti aonererwe, mpaka ntsiku inafuna ine kumuyendesa kuna Sezari.”

²²Na tenepo, Agiripa apanga Fextu kuti: “Ine ndikhafunambo ndimubve mamuna unowu.” Fextu atawira tenepa: “Mangwana imwe munamubva.”

²³Mangwana mwace, Agiripa na Bherenise atambirwa na mbiri ya cilemedzo consene ca utongi, mbapita n'nyumba mukhabviwa miseru ya anthu pabodzi na akulu a cikwi ca anyankhondo, na amuna akulu-akulu a mu nzinda, Fextu mbacemeresa Paulu.

²⁴Na tenepo, Fextu alonga kuti: “Mambo Agiripa na monsene muli pano, mwamuona mamuna uyu! Madjuda onsene a muno mu Sezareya na a ku Djerusalema, asandiphemba kuti mamuna uyu aphiwe.

²⁵Mbwenye ine ndaona kuti nkhabe cibodzi cidadawa iye cakutongerwa kuphiwa naco, pontho na thangwi ya kuphemba kudacita iye kuti atongwe na mambo Sezari, ndantawirira kuti aende ku Roma.

²⁶Mphapo mpaka lero, nkhabe kupidziwa mwadidi pinafuna kulemba ine kuna imwe mbuya Sezari, pa thangwi ya nseru wace. Na thangwi eneyo, ndam'bweresa pano patsogolo panu, maka-maka kuna imwe mambo Agiripa, kuti mum'bvundze mwadidi, toera ndikwanise kuona cinthu cakulemba.

²⁷Thangwi ndisaona kuti si pyadidi tayu kupereka nyamiseru, mbatikhonda kualonga mwadidi mathangwi adasumirwa iye.”