Read cisena Mab. 27 Bible Online

Mab. 27 - cisena bible

Mab. 27

¹Mudakwana iwo n'dzidzi udatongwa ife kubuluka kuti tiyende na xitima ya m'madzi ku dziko ya Italya, Paulu na anango akhali n'kaidi, aperekwa m'manja mwa nkulu wa anyankhondo anacemerwa Djulyo, akhali wa nsoka wa anyankhondo a Sezari.

²Ife tabuluka ku Sezareya mbatipakira xitima ya m'madzi, ya ku nzinda wa Adharamitu, ikhafuna buluka kwenda mbuto zinango za madziko a Azya. Tabuluka mbatiyenda pabodzi na Arixitariku, m'bodzi wa ku Masedhonya, wa mu nzinda wa Tesalonika.

³Mangwana mwace, tafika pa gombe ya Sidhoni. Djulyo, apangisa kukoma ntima kwace kuna Paulu, mbantawirisa kuti abuluke aende kaonana na axamwali ace, toera iwo am'phedze.

⁴Mudabuluka ife mu Sidhoni, taenda na kunkwiriro kwa ntsuwa ya Xipere, thangwi tikhatanda mphepo ikhadza kuna ife.

⁵Tawambuka bara, mbatipita na n'khundu-n'khundu mwa dziko ya Silisya na ya Panfilya, mbatifika ku nzinda wa Mira, ku dziko ya Lisya.

⁶Kweneko, nkulu wa anyankhondo a ku Roma, agumana xitima ya m'madzi ya ku nzinda wa Alixandiriya ikhaenda ku Italya, mbatipakiza mwenemu.

⁷Tamala ntsiku zizinji mbatiyenda na nentseka cimadzi-madzi pang'ono-pang'ono, mpaka kufika dhuzi na nzinda wa Kinidhu. Mbwenye na kuona kuti mphepo ikhadza kuna ife ikhatinentsa pikulu kakamwe, tacimwana kupitiriza na ulendo wathu, mbatichinduka kutanda mphepo, mbatiyenda na khundu ya kubangwe kwa ntsuwa ya Kereta, dhuzi na Salomona.

⁸Na tenepo, taenda mbatinentseka na n'khundu-n'khundu mwa gombe, mbatifika pa mbuto inango inacemerwa Magombe Adidi, dhuzi na nzinda unacemerwa Lazeya.

⁹Penepo takhalapo ntsiku zizinji, pontho pikhali pyakugopsa kupitiriza na ulendo wathu thangwi ntsiku za condzi zikhafika.[16] Na thangwi eneyo, Paulu aacenjeza

¹⁰mbalonga tenepa: “Amunamwe, ndiri kuona kuti kubulukira pano kwenda kutsogolo, ulendo wathu unati unentse. Tinaluza xitima ya m'madzi, mitolo, pontho na ife ene.”

¹¹Mbwenye nkulu wa anyankhondo a ku Roma, akhakhulupira pikulu kakamwe kuna nyakutekenya na mwanaciro xitima ya m'madzi, kupiringana pikhalonga Paulu.

¹²Na thangwi yakusoweka mbuto yadidi pa gombe, pa n'dzidzi wa khoni, azinji anyerezera kuti apitirire pyawo, aone ngakhala anakwanisa fika ku Fenise, toera n'dzidzi wa khoni uwamalire kweneku. Nzinda unowu ndi gombe ya ku Kereta ikhakhala na khundu ibodzi ikhalang'anira ku bangwe, khundu inango ikhalang'anira ku mbalu.

¹³Yatoma kumenya mphepo pang'ono ya bangwe. Na tenepo, iwo anyerezera kuti pikhafuna iwo pyakwana. Na thangwi eneyo, abulusa nangula,[17] mbaenda na n'khundu-n'khundu mwa gombe ya Kereta.

¹⁴Mbwenye na mwansanga, cabwera conzi cikulu kakamwe ca mphepo inacemerwa Mulolo, ikhabuluka ku ntsuwa.

¹⁵Xitima ya m'madzi yakwekwetwa na conzi, mbiicimwana kukunda mphepo. Na tenepo, tasiya kuzungunusa mbatiileka mbiyenda pyayo mbiberuka.

¹⁶Mukhatanda ife mphepo, tapita na kukhundu ya bangwe kwa ntsuwa ing'ono inacemerwa Kaudha. Na kunentseka konsene, takwanisa kuphatirira mwadiya wathu.

¹⁷Anyakutekenya xitima ya m'madzi acita mphambvu zonsene, akwata mwadiya mbauikha mu xitima ya m'madzi, mbamangira xitima ya m'madzi na nkhambala zakuwanga gopa inasweka. Iwo akhagopa kuti xitima ya m'madzi inadza kakwekwetwa mbiyenda kacherera m'macheca a ku Sirite. Na tenepo, afunya mathanga, mbasiya xitima ya m'madzi kuti iyende pyayo mbiberuka na mphepo.

¹⁸Na thangwi ya kumenyiwa na conzi cikulu, mangwana mwace tatoma kutaya mitolo m'madzi.

¹⁹Nkuca uno mwace, anyakutekenya apitaya m'bara na manja awo, pyombo pya xitima ya m'madzi.

²⁰Tamala ntsiku zizinji mbatikhonda kuona dzuwa peno nyenyezi, pontho conzi cikhatimenya basi. Pakumalisa, tikhadikhirabve kuti tinapulumuka pontho tayu.

²¹Na thangwi ya kumala ntsiku zizinji anthu mbakhonda kudya cinthu, Paulu alimira pakati pawo mbalonga tenepa: “Amunamwe, imwe mbamudandibvera pidalonga ine kuti tikhonde kubuluka ku Kereta, nyatwa izi na pidaluza ife, mbapidaoneka tayu.

²²Mbwenye cincino ndisakuphembani kuti mukhale na cipapu, thangwi nkhabe m'bodzi wanu anafuna kufa. Tinaluza xitima ya m'madzi basi.

²³Ndisalonga penepi, thangwi masiku, abwera kuna ine anju wa Mulungu wanga anaphatira ine basa,

²⁴mbandipanga tenepa: ‘Paulu, leka gopa! Iwe usatongwa uyende kabulukira kuna Sezari, pontho Mulungu na kukoma ntima kwace, akupasa upulumuki pa nyama, wa onsene ali na iwe pa ulendo.’

²⁵Na tenepo, amunamwe, khalani na cipapu! Ine ndisakhulupira Mulungu kuti pinacitika sawa-sawa ninga mudandipangira Iye.

²⁶Mbwenye tisatongwa tiyende kabulukira pa ntsuwa ibodzi.”

²⁷Tamala ntsiku khumi na zinai mbatikhabhomiwa na conzi ca mphepo khundu na khundu, mu bara inacemerwa Adhiriyatiku. Mukhacita chiti-chiti ya masiku, anyakutekenya xitima ya m'madzi atoma kubva kuti tiri kufika dhuzi na kuntunda.

²⁸Na tenepo, aponya m'bara nkhambala ya n'dida wa madzi, mbaona kuti kuzika kwa madzi kukhali kwa makono makumawiri. Mudacita iwo thimize patsogolo, aponya pontho, mbakwana makono khumi na maxanu.

²⁹Na kugopa kuti inadza kaenda kamenya pa myala, aponya m'madzi nangula zinai na ku domu ya n'nduli, toera kulimisa nayo xitima ya m'madzi, mbakhaphembera kuti kuce na mwansanga.

³⁰Na tenepo, anyakutekenya xitima ya m'madzi, akhasaka kuti athawe. Atereza mwadiya m'bara, mbapambazira kuti ali kwenda kagwisira nangula ku domu ya kutsogolo.

³¹Mphapo Paulu alonga kuna nkulu wa anyankhondo na kuna anyankhondo ace kuti: “Anyakutekenya xitima ya m'madzi angakhonda kukhala muno, imwe nkhabe kupulumuka.”

³²Penepo, anyankhondo agwanda nkhambala zikhamanga mwadiya, mbausiya mwadiya mbugwa m'madzi.

³³M'bambakuca, Paulu aaphemba onsene kuti adye pang'ono, mbalonga tenepa: “Muna ntsiku khumi na zinai mbamudikhira. Pa ntsiku zonsene izi, nkhabe cibodzi cidadya imwe.

³⁴Ndaphata myendo, cincino ndisakuphembani kuti mudye pang'ono, toera mukwanise kupulumuka. Thangwi nkhabe m'bodzi wanu anafuna luza tsisi ibodzi ya munsolo mwace.”

³⁵Pakumala kulonga penepyo, Paulu akwata nkate mbapereka takhuta kuna Mulungu pamaso pa anthu onsene, mbaumenya mbatoma ndiye kudya.

³⁶Penepo, onsene akhala na cipapu, mbadyambo.

³⁷Mu xitima ya m'madzi, mukhali na anthu madzana mawiri na makumanomwe na atanthatu.

³⁸Pidamala iwo kudya mbakhuta, ataya tirigu m'madzi, toera xitima ya m'madzi ilulupe.

³⁹Mudaca kunja, anyakutekenya xitima ya m'madzi acimwana kudzindikira ntunda, mbwenye aona gombe, mbanyerezera kuti pingakwanisika, aende katsamisa xitima ya m'madzi penepale.

⁴⁰Iwo agwanda nkhambala zikhadamangirira nangula mbazitaya m'madzi, mbasudzula ng'ombo zikhazungunusa xitima ya m'madzi. Buluka penepo, afuthula thanga ku domu ya kutsogolo, toera akwanise kukwatwa na mphepo aende ku gombe.

⁴¹Mbwenye xitima ya m'madzi yaenda kacherera pa checa. Domu ya kutsogolo yapita m'macheca mbiicimwana kubuluka. Domu ya n'nduli yatoma kusweka na mphambvu za mabimbi.

⁴²Anyankhondo akhadabverana kuti aphe anyan'kaidi onsene, gopa angawambuka na kusambirira anamala thawa.

⁴³Mbwenye nkulu wa anyankhondo, na kufuna kupulumusa Paulu, aakhondesa kucita pikhafuna iwo, mbaapanga kuti onsene anadziwa sambirira atome ndiwo kugwa m'madzi, asambirire mpaka kuntunda.

⁴⁴Mbapangambo anango kuti aphatirire matabwa na mapindi anango a xitima ya m'madzi, toera akwanise kupulumuka. Na tenepo, onsene akwanisa kupulumuka mbafika kuntunda.