Read cisena Mab. 3 Bible Online

Mab. 3 - cisena bible

Mab. 3

¹Ntsiku ibodzi, pa n'dzidzi utatu wa kumaulo, n'dzidzi wakuphembera, Pedhru na Juwau akhaenda ku Nyumba ya Mulungu.

²Pa nsuwo wa Nyumba ya Mulungu ukhacemerwa Wakubalika, pakhakhala na mamuna m'bodzi akhadabalwa wa kulamala. Ntsiku zonsene, akhakwatiwa mbakhaikhwa penepo toera aphembe pinthu kuna ale akhapita mwenemu.

³Mudaona iye Pedhru na Juwau mbakhapita mu Nyumba ya Mulungu, akhaaphemba kuti ampase cinthu.

⁴Pedhru na Juwau amulang'anisa mwadidi mwene, mbampanga kuti: “Tilang'ane!”

⁵Mamuna uyu aalang'anisa, mbakhadikhira kutambira cinthu kuna iwo.

⁶Penepo, Pedhru ampanga tenepa: “Ine, nkhabe parata, nkhabe oro, mbwenye pina ine ndinakupasa. Na dzina ya Yezu Kirixtu wa ku Nazareti, lamuka ufambe!”

⁷Buluka penepo, Pedhru amphata manja ace a nkono wa madyo, mbam'phedza kumulamusa. Pa n'dzidzi ubodzi ene, myendo yace na mphundupundu zace zawanga.

⁸Na tenepo, iye anumpha, alimira na myendo yace, mbatoma kufamba. Buluka penepo, apita n'thando ya Nyumba ya Mulungu pabodzi na iwo, mbakhafamba uku mbakhanumpha, na kusimba Mulungu.

⁹Anthu onsene pidamuona iwo mamuna mbakhanumpha na kusimba Mulungu,

¹⁰an'dzindikira kuti mamuna uyu ndi unowu m'bodzi ene akhakhala na nsambo wa kuphemba pinthu pa nsuwo wa Nyumba ya Mulungu, unacemerwa Wakubalika. Onsene akhala akudzudzumika pontho mbadzumatirwa pikulu kakamwe na pire pikhadancitikira.

¹¹Mamuna ule akhadawangiswa, akhasyana tayu kufamba pabodzi na Pedhru na Juwau. Anthu onsene akhadzumatirwa napyo, mbakhathamanga kwenda mu Nyumba ya Mulungu, ku mbuto inacemerwa khonde ya Salomau, mukhakhala iwo.

¹²Pedhru, mudapyona iye ipi, aapanga tenepa: “Imwe amuna a ku Izarayeli, musadzumanji mbamutilang'anisa tenepa? Musanyerezera kuti mamuna uyu pinafamba iye ndi mphambvu zathu, peno tisabvera maka Mulungu?

¹³Mulungu wa Abharaamu, wa Izaki na wa Djakobo, Mulungu wa ambuya athu akale, ndiye adapasa mbiri nyabasa wace Yezu, ule adapereka imwe kuti aphiwe, pontho adakhonda imwe pamaso pa Piratu, pikhafuna iye kunsudzula.

¹⁴Mbwenye imwe mwan'khonda pakweca Wakucena na Wakulungama, mbamuphemba kuti phanga ibuluswe n'kaidi.

¹⁵Na tenepo, imwe mwapha Ule anapasa upulumuki. Mbwenye Mulungu amulamusa pa kufa. Ife ndife anyamaso a penepi.

¹⁶Na kukhulupira kwace dzina ya Yezu, dzina eneyi ndiyo idamuwangisa mamuna uyu anaona imwe na anadziwa imwe. Kukhulupira kwace Yezu, kwancita kuti awange, ninga pinaona imwe monsene.

¹⁷“Cincino abale anga, ine ndisapidziwa kuti imwe na atsogoleri anu ene, mwacita penepi thangwi yakukhonda kudziwa.

¹⁸Mbwenye ndi tenepa kusimbisa kudacita Mulungu, pire pidalonga maporofeta onsene kale ene, kuti Kirixtu wace anati aone nyatwa.

¹⁹Na tenepo, chunyukani mubwere kuna Mulungu, kuti Iye akulekerereni madawi anu,

²⁰toera ibwere midzidzi ya kupuma ku khundu ya Mbuya, pontho kuti Iye atume Kirixtu Yezu, unowu akhadasankhulirwa imwe.

²¹Asatongwa kuti Iye akhale kudzulu, mpaka ufike n'dzidzi unadza kasasanya Mbuya papsa pinthu pyonsene, ninga mukhadalonga Iye kale ene na maporofeta ace akucena.

²²Thangwi Mozesi alonga kuti: ‘Pakati pa abale anu, Mulungu anati akusankhulireni mporofeta m'bodzi ninga ine. M'bvereni pyonsene pinafuna kukupangani iye.

²³Munthu onsene anakhonda kum'bvera mporofeta unowu, anati abuluswe pa mbumba ya Mulungu.’

²⁴“Ndimo mwene, maporofeta onsene, kutomera kuna Samweli, na onsene adadza n'nduli mwace, m'bodzi na m'bodzi, alonga mbakudziwisani pinthu pikhafuna kucitika ntsiku zino.

²⁵Imwe ndimwe ana a maporofeta, pontho ndimwe ana a cibverano cidacita Mulungu na ambuya anu, pa kulonga kwace kudacita Iye na Abharaamu kuti: ‘Madzindza onsene a pantsi pano, anapaswa nkhombo na thangwi ya dzindza yako.’

²⁶Na tenepo, Mulungu, mudamala Iye kulamusa Nyabasa Wace pa kufa, pakutoma antuma kuna imwe toera akupaseni nkhombo, kuti m'bodzi na m'bodzi azungunuke, mbasiya makhaliro ace akuipa.”