Read cisena Mab. 5 Bible Online

Mab. 5 - cisena bible

Mab. 5

¹Mbwenye mamuna m'bodzi anacemerwa Ananiya, na nkazace Safira, agulisambo munda wawo.

²Iye abverana na nkazace mbapambula kobiri inango mbasala nayo, kobiri inango aikwata mbaipereka kuna apoxtolo.

³Na tenepo, Pedhru am'bvundza kuti: “Ananiya, thangwi yanji wasiya Sathani mbapita muntima mwako, mbunyengeza Nzimu Wakucena, mbubisa kobiri inango idagulisa na iwe munda wako?

⁴Mpfuma ikhali yako tayu? Pontho pidamala iwe kuigulisa, kobiri ikhali na iwe tayu? Ndi thangwi yanji mphapo wanyerezera kucita penepi muntima mwako? Iwe udanyengeza anthu tayu, mbwenye wanyengeza Mulungu!”

⁵Na kubva penepi, Ananiya agwa pantsi, mbafa. Anthu onsene adapibva pikhadacitika, agopa pikulu kakamwe.

⁶Na tenepo, abwera aphale mban'gudumira manungo ace, mbaakwata mbaenda na iwo kunja, kaaikhisa.

⁷Pakumala midzidzi mitatu, nkazace Ananiya apitambo, mbakhonda kupidziwa pikhadacitika.

⁸Penepo Pedhru am'bvundza tenepa: “Ndipange. Imwe mwagulisa na ntengo unowu munda wanu?” Nkazi atawira kuti: “Ande, ndi unowu.”

⁹Mphapo Pedhru ampanga tenepa: “Ndi thangwi yanji imwe mwabverana kulesera Nzimu wa Mbuya? Lang'ana pa nsuwo aphale adaikhisa manungo a mamuna wako, iwo anakukwatambo cincino.”

¹⁰Pa n'dzidzi ubodzi ene iye agwa pa myendo ya Pedhru mbafa. Mudapita aphale an'gumana afa, mbankwata mbaenda kamuikhisa dhuzi na mamuna wace.

¹¹Abale a gereja, na anthu onsene mudabva iwo penepi, agopa pikulu kakamwe.

¹²Apoxtolo a Yezu akhacita pirengo pizinji, na pinango pyakudzumisa pakati pa mbumba. Onsene adatawira akhali na nsambo wakugumanyikana pabodzi pene n'khonde mwa Salomau.

¹³Kuna anango adasala, nkhabe m'bodzi akhali na cipapu ca kwenda kagumanyikana pabodzi na iwo. Mbwenye mbumba yonsene ikhaasimba.

¹⁴Mwinji wa anthu anyakutawira Yezu ukhainjiperatu, amuna na akazi akhatawira Mbuya.

¹⁵Anthu azinji akhafikira kukwata atenda awo pa khangala peno pa mpfumba mbaenda kaaikha m'miseu, toera Pedhru angapita na penepo, panango n'thundzi wace ufike kuna atenda.

¹⁶Mwinji wa anthu, ukhabwera buluka m'mizinda ya dhuzi na Djerusalema, mbakhadzesa atenda awo na anango akhathabuswa na mizimu ya kuipa, onsene mbakhawangiswa.

¹⁷Na tenepo, nkulu wa anyantsembe, pabodzi na andzace akhali a nsoka wa asadhusi, akhala na bibvu ikulu.

¹⁸Na thangwi eneyo, apoxtolo aphatiwa mbaikhwa n'kaidi.

¹⁹Mbwenye na masiku, anju wa Mbuya afungula misuwo ya kaidi, akwata apoxtolo mbabuluka na iwo kunja, mbaapanga tenepa:

²⁰“Ndokoni ku Nyumba ya Mulungu, mukhapange mbumba mphangwa zonsene za upulumuki uyu.”

²¹Mangwana mwace na macibese, iwo apita mu Nyumba ya Mulungu mbatoma kupfundzisa mbumba, ninga mukhadapangirwa iwo. Mudafika nkulu wa anyantsembe, pabodzi na andzace akhamperekera, acemeresa nsoka wa anyakutonga miseru, wa akulu a mbumba ya Izarayeli. Penepo, atumiwa anthu kuti aende kakwate apoxtolo n'kaidi.

²²Mbwenye anyakuonera, mudafika iwo ku kaidi, hadaagumana apoxtolo tayu, mbabwerera mbaenda kalonga kuti:

²³“Taenda kweneko, tagumana misuwo ya kaidi yafungwa mwadidi mwene, anyakuonera mbali pa nsuwo. Mbwenye pidafungula ife, n'kati mukhali na munthu tayu.”

²⁴Nkulu wa anyakuonera Nyumba ya Mulungu, na akulu aanyantsembe, mudabva iwo penepyo atutumuka napyo, mbakhanyerezera kuti ndi ninji pidacitika.

²⁵Pa n'dzidzi ubodzi-bodzi, munthu m'bodzi afika mbalonga tenepa: “Bveserani! Amuna adaikha imwe n'kaidi, ali kupfundzisa mbumba mu Nyumba ya Mulungu.”

²⁶Na tenepo, nkulu wa anyakuonera Nyumba ya Mulungu, pabodzi na anthu ace, aenda kakwata apoxtolo awa a Yezu, mbabwera na iwo. Mbwenye iwo hadaakwata na mphambvu tayu, thangwi akhagopa ponyerwa myala na mbumba.

²⁷Buluka penepo, aakwata mbaenda na iwo patsogolo pa nsoka wa akulu aanyakutonga miseru. Penepo, nkulu wa anyantsembe aabvundza kuti:

²⁸“Ife takupasani ntemo kuti muleke kupfundzisa na pang'ono pene na dzina eneyi. Mbwenye imwe muli kumwaza mapfundzisiro anu mu nzinda wa Djerusalema uno onsene, pontho muli kufuna kutipasa thangwi na kufa kwa munthu unowu.”

²⁹Penepo Pedhru na apoxtolo andzace atawira tenepa: “Pisafunika kubvera Mulungu, kupiringana kubvera anthu!

³⁰Yezu adapha imwe mbamun'khomera pa ntanda, Mulungu wa ambuya athu amulamusa pa kufa.

³¹Mbwenye Mulungu ankwiza, mbamuikha ku khundu yace ya madyo ninga N'tsogoleri na Mpulumusi, toera apase mbumba ya Izarayeli n'dzidzi wa kuchunyuka na kulekererwa kwa madawi.

³²Ife, ndife amboni a pinthu penepi. Ife, na Nzimu Wakucena udapasa iye ale anam'bvera.”

³³Akulu aanyakutonga miseru, mudapibva iwo penepi aipirwa pikulu kakamwe, mbakhafuna kuapha.

³⁴Mbwenye nfarisi m'bodzi anacemerwa Gamaliyeli, nyakudziwisa wa Mwambo, munthu wakulemebza na mbumba yonsene, alamuka pakati pa akulu aanyakutonga miseru mbaphemba kuti apoxtolo atome buluswa panja pa n'dzidzi ung'ono basi.

³⁵Buluka penepo iye aapanga tenepa: “Imwe amuna a Izarayeli, nyerezerani mwadidi pinafuna imwe kuacita amuna awa.

³⁶Thangwi n'nduli umu pikhadacitika na mamuna m'bodzi anacemerwa Teudhasi, mbakhalonga kuti sinakozeka, iye agumanya amuna madzana makumanai kuti akhale andzace. Mbwenye iye aphiwa, na onsene andzace akhantowera amala mwazika, pyonsene mbapifudzika.

³⁷Buluka unowu, abwera ndi Djuda wa ku Galileya pa n'dzidzi ukhalemberwa anthu, adatsogolera nsoka ubodzi ukhacita cikuti. Mbwenye iye aphiwambo, andzace onsene akhantowera mbamala kumwazika.

³⁸Cincino ndinakupangani tenepa: Lekani kuacita pinthu amuna awa. Asyeni aende pyawo. Thangwi ngakhala pinanyerezera iwo peno mabasa awo abuluka kuna anthu, pinamala.

³⁹Mbwenye ngakhala pisabuluka kuna Mulungu, imwe munacimwana kupifudza, thangwi mungacita tenepo munakhala ninga muli kumenyana na Mulungu!” Iwo am'bvera.

⁴⁰Acemera apoxtolo, aakwapulisa, mbaapanga kuti aleke longabve na dzina ya Yezu, mbaasiya mbaenda.

⁴¹Apoxtolo abuluka pa akulu anyakutonga miseru na kukomerwa, na thangwi ya kupwaziwa na dzina ya Yezu Kirixtu.

⁴²Ntsiku zonsene mu Nyumba ya Mulungu pontho nyumba na nyumba, akhaenda mbapfundzisa mbakhalonga kuti Yezu ndi Kirixtu.[6]