Read cisena Mab. 8 Bible Online

Mab. 8 - cisena bible

Mab. 8

¹Saulo akhali penepo mbatawirirambo kuphiwa kwa Xitevau. Pa ntsiku zenezo, abale a gereja ya ku Djerusalema atoma kuchingwa pikulu kakamwe. Onsene amala balalika m'pisa pya Djudeya na pya ku Samariya, mbasala apoxtolo basi.

²Amuna anango anyakulemedza Mulungu aenda kamuikha Xitevau, mbamulira pikulu kakamwe.

³Mbwenye Saulo akhafuna kuti amwaze abale a gereja. Akhaenda nyumba na nyumba, mbakhakwekweta amuna na akazi, mbaenda kaaponya n'kaidi.

⁴Ale akhadamala balalika, akhaenda mbamwaza fala ya Mulungu monsene mukhaenda iwo.

⁵Filipi mudaenda iye ku nzinda wa Samariya, atoma kulonga na thangwi ya Kirixtu kuna anthu a kweneko.

⁶Mwinji wa anthu mudabva iwo na kuona pirengo pikhacita Filipi, onsene atoma kum'bvesera pikhalonga iye.

⁷Mizimu ya kuipa ikhabuluka muna anthu azinji mbikhakhuwa, pontho anyakulamala na anyampfutete akhawangiswa.

⁸Na tenepo, mwaoneka kutsandzaya kukulu mu nzinda unowu.

⁹Mwenemu mukhakhala mamuna m'bodzi akhacemerwa Simau, akhacita masalapita ace. Amala ntsiku zizinji mbakhanyengeza napyo anthu a ku Samariya, mbakhalonga kuti ndi munthu wa mbiri ikulu kakamwe.

¹⁰Mbumba yonsene, mwana na nkulu akham'bvesera mwadidi mwene, mbakhalonga kuti: “Mamuna uyu ndi mphambvu ya Mulungu, inadziwika na dzina ya Mphambvu Ikulu.”

¹¹Iwo akhantowera, thangwi amala ntsiku zizinji mbakhanyengezwa na masalapita ace.

¹²Mbwenye mudatoma Filipi kuapanga Mphangwa Zadidi za Umambo wa Mulungu na za dzina ya Yezu Kirixtu, iwo antawira mbatambira batixmu amuna na akazi.

¹³Na iye ene Simau atawirambo, mbatambira batixmu. Pontho akhaenda mbatowerera Filipi mbuto zonsene, mbakhadzumatirwa na kuona pidzindikiro na pirengo pikulu pikhacita Filipi.

¹⁴Apoxtolo ku Djerusalema na kubva kuti mbumba ya ku Samariya ikhadatawira fala ya Mulungu, atuma Pedhru na Juwau mbaenda kweneko.

¹⁵Pedhru na Juwau mudafika iwo kweneko, aphembera toera anthu a ku Samariya atambire Nzimu Wakucena.

¹⁶Thangwi anthu a ku samariya akhadamala tambira batixmu na dzina ya Mbuya Yezu basi, mbwenye nkhabe m'bodzi wawo akhadatambira Nzimu Wakucena.

¹⁷Na tenepo, Pedhru na Juwau aaikha manja anthu ale, mbatambira Nzimu Wakucena.

¹⁸Simau, na kuona kuti anthu akhatambira Nzimu Wakucena na kuikhwa manja na apoxtolo, aapasa kobiri,

¹⁹mbaampanga tenepa: “Ndipasenimbo mphambvu eneyi, toera munthu anaikha ine manja, atambirembo Nzimu Wakucena.”

²⁰Mbwenye Pedhru antawira tenepa: “Na thangwi ya kunyerezera kuti unakwanisa kugula muwoni wa Mulungu na kobiri, iwe na kobiri zako zene, ndoko kafe.

²¹Iwe nkhabe tawirirwa, pontho nkhabe lengeswa pa nsoka wa basa yathu, thangwi ntima wako si wakulungama tayu patsogolo pa Mulungu.

²²Chunyuka macitiro ako a kuipa uphembere kuna Mbuya. Panango anakulekerera manyerezero a kuipa ali muntima mwako.

²³Thangwi ndaona kuti iwe wadzala na bibvu, pontho uli n'kati mwa kudawa.”

²⁴Penepo Simau atawira tenepa: “Ndiphemberereni ndimwe kuna Mbuya, toera pikhonde kundicitikira pyonsene pidamala imwe kulonga.”

²⁵Pidamala iwo kulonga umboni na kumwaza fala ya Mbuya, Pedhru na Juwau abwerera ku Djerusalema, mbakhaenda na mwaza Mphangwa Zadidi, m'pisa pizinji pya ku Samariya.

²⁶Anju m'bodzi wa Mbuya alonga tenepa kuna Filipi: “Lamuka uyende khundu ya bangwe, na njira ya kale inachitira ku Djerusalema mpaka ku nzinda wa Gaza.”

²⁷Filipi alamuka mbaenda. N'njira, iye agumana mamuna m'bodzi wa dziko ya Ityopya, nyabasa wa mbiri, akhaonerera mpfuma zonsene za Khandasi, mambo wankazi wa ku Ityopya. Mamuna unowu, akhadaenda ku Djerusalema kalambira Mulungu.

²⁸Pa kubwerera kwenda ku nyumba, akhaona pidalembwa m'bukhu ya mporofeta Izaya, mbali nawa mu ngolo mwace.

²⁹Na tenepo, Nzimu Wakucena wapanga Filipi kuti: “Fendedzera dhuzi ngolo iyi, uitowerere.”

³⁰Filipi athamanga mbaenda dhuzi na ngolo, mbabva mamuna mbakhalonga pikhaona iye m'bukhu ya mporofeta Izaya. Penepo iye am'bvundza tenepa: “Musapibvesa mwadidi pinaona imwe m'bukhu?”

³¹Iye antawira tenepa: “Ndinapibvesa tani? Ine nkhabe munthu wa kundilondezera.” Penepo aphemba Filipi kuti apakire mu ngolo mwace toera akhale na iye pabodzi.

³²Mafala akhaona iye m'Bukhu ya Mulungu, akhalonga tenepa: “Iye akwatiwa ninga bira ya kwenda kaphiwa, pontho ninga mwana bira wakukhonda lira pa kupaliwa uweya, mbakhonda kufungula mulomo wace.

³³Iye apwaziwa mbakhonda kutongwa mwakulungama. Mbani anafuna kulonga pya dzindza yace? Thangwi moyo wace wakwatiwa pa dziko ino.”

³⁴Nyabasa wa mambo wankazi abvundza Filipi kuti: “Ndaphata myendo, ndipangeni: Kodi mporofeta asalonga ani? Asalongera iye ene, peno asalongera unango?”

³⁵Na tenepo, na mafala ale akhaona iye m'Bukhu ya Mulungu, Filipi atoma kumpanga Mphangwa Zadidi za Yezu.

³⁶Mukhaenda iwo ulendo wawo, afika pa mbuto inango ikhali na madzi. Penepo nyabasa wa mambo wankazi alonga tenepa: “Lang'anani, pano pana madzi. Ndi ninji cinafuna kundipingiza kutambiriswa batixmu?”

³⁷[Filipi ampanga tenepa: “Ungatawira na ntima wako onsene, nkhabe cibodzi cinafuna kukupingiza.” Iye atawira tenepa: “Ine ndisatawira kuti Yezu Kirixtu ndi Mwana wa Mulungu.[7]”]

³⁸Penepo nyabasa wa mambo wankazi alimisisa ngolo yace. Na tenepo, mu uwiri mwawo agwera m'madzi, Filipi mbantambirisa batixmu.

³⁹Mudabuluka iwo m'madzi, Nzimu Wakucena wakwata Filipi, Filipi mbakhonda kuoneka na nyabasa. Mbwenye nyabasa aenda ulendo wace na kutsandzaya.

⁴⁰Mbwenye Filipi aenda kabulukira ku nzinda wa Azotu, mbakhaenda na mwaza Mphangwa Zadidi m'mizinda yonsene, mpaka fika ku nzinda wa Sezareya.