Read cisena Mab. 9 Bible Online

Mab. 9 - cisena bible

Mab. 9

¹Saulo akhatekereratu kakamwe na kuipirwa kuti aphe ale akhatowerera Yezu. Iye aenda kalonga na nkulu wa anyantsembe,

²mbam'phemba matsamba toera aenda m'manyumba a kuphemberera a madjuda a ku Dhamaxku, kuti aphate amuna na akazi akhatowera Njira ya Mbuya, akhafuna iye kugumana mwenemu, aakwate aende na iwo ku Djerusalema.

³Pa ulendo wace, mudafika iye dhuzi na nzinda wa Dhamaxku, na mwansanga cieza ca kudzulu cagaka n'khundu mwace.

⁴Iye agwa pantsi, mbabva fala ikhalonga tenepa: “Saulo, Saulo, thangwi yanji usandifambira n'nduli?”

⁵Saulo abvundza tenepa: “Ndimwe ani, Mbuya?” Iye antawira tenepa: “Ine ndine Yezu, ule anafambira iwe n'nduli.

⁶Lamuka, upite mu nzinda, mwenemu unapangwa pinatongwa iwe kucita.”

⁷Amuna akhaenda na Saulo, alimira mbacimwana kulonga. Iwo fala aibva, mbwenye munthu wace adamuona tayu.

⁸Saulo alamuka pantsi, afungula maso, mbwenye acimwana kuona cinthu. Penepo iwo amphata nsenzi mbaenda na iye ku Dhamaxku.

⁹Iye amala ntsiku zitatu mbali boli-boli. Pa ntsiku zenezo, hadadya cinthu pontho hadamwa cinthu tayu.

¹⁰Ku Dhamaxku, kukakhala nyakupfundza wa Yezu m'bodzi, dzina yace ndi Ananiya. Mbuya ancemera mu Nzimu mbampanga kuti: “Ananiya!” Iye atawira tenepa: “Ndiri pano Mbuya.”

¹¹Mbuya ampanga tenepa: “Lamuka uyende mpaka ku nyumba kwa Djuda, ku nseu unacemerwa Wakulungama, ubvundzise mamuna m'bodzi wa ku Tarisu, anacemerwa Saulo. Iye ali kuphembera.

¹²Saulo, aoneswa na Nzimu Wakucena mamuna m'bodzi anacemerwa Ananiya, mbakhapita mwenemu, mbamuikha manja toera akwanise kuona pontho.”

¹³Ananiya atawira tenepa: “Mbuya, ndisabva na anthu azinji pa thangwi ya mamuna unowu, pontho na uipi onsene unacita iye ku Djerusalema, kuna mbumba yanu.

¹⁴Iye afika kuno na kutawiriswa kudacita iye na akulu aanyantsembe, toera amange ale onsene anacemera dzina yanu.”

¹⁵Mbwenye Mbuya alonga kuna Ananiya kuti: “Ndoko. Thangwi mamuna uyu ndi combo canga cidasankhula Ine kuti akwate dzina yanga aende nayo kuna ale adakhonda kukhala madjuda, kuna amambo, na kuna mbumba ya Izarayeli.

¹⁶Ine ndinadza kampangisa nyatwa zikulu zinatongwa kuona iye na dzina yanga.”

¹⁷Na tenepo, Ananiya aenda, apita n'nyumba, ansandzika manja ace, mbampanga tenepa: “Saulo m'bale wanga, Mbuya Yezu adakubulukira n'njira mukhabwera iwe, andituma toera maso ako aone pontho, mbudzazwa na Nzimu Wakucena.”

¹⁸Pa n'dzidzi ubodzi ene, m'maso mwa Saulo, mwagwa pinthu pyakulandana ninga makoko a nyama za m'madzi, iye alamuka, mbatambiriswa batixmu.

¹⁹Pidamala iye kudya, awanga mphambvu. Saulo amala ntsiku pang'ono na anyakupfundza a Yezu ku Dhamaxku.

²⁰Penepo pene, atoma kumwaza Mphangwa za Yezu m'manyumba a kuphemberera a madjuda, kuti Iye ndi Mwana wa Mulungu.

²¹Onsene akhamubva akhadzumatirwa mbabvundza kuti: “Siye mamuna unowu tayu akhasaka kufudza ale akhacemera dzina eneyi mu Djerusalema? Si penepi tayu pidadzera iye kuno, kuti aamange toera aakwate aende na iwo kuna akulu aanyantsembe?”

²²Mbwenye Saulo akhalongeratu na mphambvu, mbakhakunda madjuda akhakhala ku Dhamaxku, na kuapangisa kuti Yezu ndi Kirixtu.

²³Pakupita ntsiku zizinji, madjuda abverana kuti amuphe.

²⁴Mbwenye Saulo apipangwa penepi. Masiku na masikati, iwo akhaonerera misuwo ya nzinda, toera amuphe.

²⁵Mbwenye anyakupfundza ace ankwata na masiku mbamuikha n'citundu, mbanchitisa na pa benga ya mpanda wa nzinda.

²⁶Pidafika Saulo ku Djerusalema, akhasaka kuti agumanyikane na anyakupfundza a Yezu, mbwenye onsene akhan'gopa, mbakhakhonda kutawira kuti iye ndi nyakupfundzambo wa Yezu.

²⁷Na tenepo, Bharnabhasi ankwata mbaenda na iye kuna apoxtolo, mbaapanga kuona kudacita Saulo Mbuya n'njira mbalonga na iye, pontho na cipapu cidacita iye ku Dhamaxku cakumwaza mphangwa na dzina ya Yezu.

²⁸Tenepa, Saulo akhala na iwo pabodzi, pontho akhapita mbakhabuluka mu nzinda wa Djerusalema, mbakhamwaza mphangwa na cipapu consene, na dzina ya Mbuya.

²⁹Pontho iye akhalonga mbaketesana na madjuda akhalonga cigerego, mbwenye iwo akhasaka njira ya kumupha nayo.

³⁰Abale anyakutawira Yezu, mudapibva iwo penepyo, ankwata Saulo mbaenda na iye ku nzinda wa Sezareya. Buluka kweneko mbamuendesa ku nzinda wa Tarisu.

³¹Abale a gereja yonsene ya ku Djudeya, ya ku Galileya, na ya ku Samariya, akhakhala mu ntendere. Iwo akhakula mbakhafamba na kugopa Mbuya, pontho mbakhaphebza na Nzimu Wakucena, nsoka wawo mbukhainjipa.

³²Pedhru akhafamba konsene kwene. Ntsiku inango aenda kaonambo mbumba ya Mulungu ya ku cisa ca Lidha.

³³Kweneko agumana mamuna m'bodzi anacemerwa Eneya. Mamuna unowu amala pyaka pisere mbali pa bonde, thangwi akhali nyampfutete.

³⁴Penepo Pedhru ampanga kuti: “Eneya, Yezu Kirixtu anakuwangisa. Lamuka ufunye bonde yako.” Penepo pene, Eneya alamuka.

³⁵Na tenepo, anthu onsene akhakhala ku Lidha na ku Saroni amuona, mbazungunukira kuna Mbuya.

³⁶Ku nzinda wa Djopi kukhali na nkazi m'bodzi nyakutowera Yezu, akhacemerwa Tabhita. (Dzina eneyi ncigerego ndi Dhorika.) Nkazi uyu akhacita udidi mbakhaphedza anyakucherenga na pinthu pyace.

³⁷Pa ntsiku zenezo, Dhorika aphatwa na utenda mbafa. Pakumala sambiswa, manungo ace akwatiwa mbaikhiwa n'nyumba ya n'dzulu.

³⁸Lidha ndi nzinda ukhakhala dhuzi na Djopi. Anyakupfundza a Yezu, pidabva iwo kuti Pedhru ali ku nzinda wa Lidha, atuma amuna awiri kuti aende kampange abwere na mwansanga adze kaonane na iwo.

³⁹Na tenepo, Pedhru alamuka mbaenda na iwo pabodzi. Mudafika iye kweneko, akwira na iwo pabodzi n'nyumba ya n'dzulu. Akazi onsene adaferwa na amuna awo anzungulira mbakhalira, uku mbakhampangisa pyakubvala na nguwo zinango zikhaasonera Dhorika mbali m'maso.

⁴⁰Penepo, Pedhru abulusa anthu onsene akhali n'nyumba. Pidamala iye agodama mbaphembera. Buluka penepo azungunuka kuna manungo a nkazi wa kufa mbalonga tenepa: “Tabhita, lamuka!” Penepo iye afungula maso. Na kuona Pedhru, Tabhita akhala pantsi.

⁴¹Pedhru amphata pa nkono, mbamulimisa. Buluka penepo, acemera mbumba ya Mulungu yonsene, pabodzi na akazi adaferwa na amuna awo, mbaapangisa Tabhita wa m'maso.

⁴²Mphangwa izi zamwazika mu nzinda onsene wa Djopi, anthu azinji mbatawira Mbuya.

⁴³Pedhru akhala kweneko ntsiku zizinji ku nyumba kwa mamuna m'bodzi anacemerwa Simau, nyakufukuta nthembe.