Read cisena Aroma 1 Bible Online

Aroma 1 - cisena bible

Aroma 1

¹Ine Paulu, n'dzakazi wa Kirixtu Yezu,[1] adacemerwa toera ndikhale mpoxtolo, mbandipambulwa toera ndimwaze Mphangwa Zadidi za Mulungu.

²Mphangwa zenezi ndizo zikhadapikirirwa na Mulungu kale ene, mbazilongwa na maporofeta mu Bukhu ya Mulungu,

³pa thangwi ya Mwana wace. Iye ninga munthu, ndi wa dzindza ya Dhavidhi,

⁴mbacemerwa Mwana wa Mulungu mu mphambvu, kubulukira mu Nzimu Wakucena, pa kulamuka kwace pa kufa, Yezu Kirixtu Mbuya wathu.

⁵Kubulukira mwa Iye, pontho na thangwi ya dzina yace, tatambira kukoma ntima kwa Mulungu kuti tikhale apoxtolo, toera ticemere anthu a madziko onsene kuti akhale akubvera kunabulukira pa kukhulupira.

⁶Pa nsoka unowu, imwembo muli na anthu pa anyakucemerwa, toera mukhale a Yezu Kirixtu.

⁷Ndisalembera imwe monsene muli mu nzinda wa Roma, musafuniwa na Mulungu, pontho musacemerwa toera mukhale mbumba yace. Kukoma ntima, na ntendere unabulukira kuna Mulungu Baba wathu, na kuna Mbuya Yezu Kirixtu, mbapikhale na imwe.

⁸Pakutoma, ndisapereka takhuta kuna Mulungu wanga muna Yezu Kirixtu, pa thangwi ya imwe monsene, thangwi kukhulupira kwanu kusabvekera pantsi pano ponsene.

⁹Mulungu analambira ine na ntima wanga onsene, mbandimwaza Mphangwa Zadidi za Mwana wace, ndiye anandicitira umboni pa thangwi ya kukunyerezerani kunakucitani ine ntsiku zonsene,

¹⁰pa maphembero anga onsene. Pontho ndisaphemba kuti cincino, pakumalisa, na kufuna kwa Mulungu, ndifungulirwe njira ya kudza kakuonani.

¹¹Thangwi ndisafuna pikulu kakamwe ndikuoneni, toera ndidze kakupasani muwoni wa mu Nzimu, kuti ukupaseni mphambvu.

¹²Penepi nkhubveka kuti ine na imwe, tipasane mphambvu m'bodzi na m'bodzi na thangwi ya kukhulupira.

¹³Abale anga, ndisafuna mudziwe kuti kazinji kene ndikhanyerezera kudza kakuonani, mbwenye ndapingizika mpaka n'dzidzi uno. Pikhanyerezera ine nkhufuna kudza kachodambo misapu pakati panu, ninga pikhadza ine mbindicita pakati pa ale anango adakhonda kukhala madjuda.

¹⁴Ndina mangawa kuna agerego[2] na kuna ale akhapwaziwa na agerego, kuna akupfundza na kuna ale adakhonda kupfundza.

¹⁵Na thangwi eneyo, ndamala sasanyira, kuti ndimwazembo Mphangwa Zadidi kuna imwe muli mu Roma.

¹⁶Mphapo ine nkhabe manyadzo na Mphangwa Zadidi, thangwi ndi mphambvu za Mulungu toera kupulumusa ale onsene anatawira, pakutoma kuna n'djuda, pakumalisa kuna agerego.

¹⁷Thangwi kulungama kwa Mulungu kusapangizika n'kati mwa Mphangwa Zadidi. Kulungama kweneku kusabulukira pa kukhulupira, kutomera pakutoma mpaka pakumalisa[3] ninga mudalembwa ipyo kuti: “Nyakulungama anapulumuka na thangwi ya kukhulupira.”

¹⁸Na tenepo, kuipirwa kwa Mulungu kusapangizika kubulukira kudzulu, mbukugwera anthu onsene anacita kuipa kunapingiza andzawo kudziwa pya ndimo mwene.

¹⁹Thangwi pire pyonsene pya Mulungu pinakwanisa dziwika, pisapangizika pakati pawo, thangwi Mulungu aapangisa.

²⁰Thangwi kutomera pakucitwa kwa dziko, makhaliro akukhonda kuoneka a Mulungu, mphambvu zace zakukhonda kumala, na umulungu wace, pisaonekera pakweca mbapidziwika na thangwi ya pinthu pidacita Iye. Na tenepo, anthu enewa nkhabe pakutunira.

²¹Thangwi iwo akhapidziwa kuti Mulungu alipo, mbwenye akhonda kumpasa mbiri ninga Mulungu, peno kuncita takhuta. Ndzeru zawo zatoma kunyerezera pyapezi, na ntima wawo wa udzemwa waswipa.

²²Mbalonga kuti ndife anyakudziwisa, mbwenye adza kakhala madzemwa.

²³Pontho asanduza mbiri ya Mulungu wakukhonda kufa, mbailandanisa na dzimunthu inacitwa na munthu anafa, ninga mbalame, pinyama pyonsene pina myendo minai, pontho na pire pinafamba na mimba.

²⁴Na thangwi eneyo, Mulungu aasiya kuti acite pyalukwali ninga mafuniro akuipa a mitima yawo, toera anyadzise manungo awo okha ene.

²⁵Asanduza pya ndimo mwene pya Mulungu, kudza pya uthambi, pontho mbalambira na kuphatira basa pinthu pidacita Mulungu, mbakhonda kulambira iye ene Mulungu wakusimbwa kwenda na kwenda. Ameni!

²⁶Na thangwi eneyo, Mulungu aasiya mbacita kufuna kwawo kwakupasa manyadzo. Na akazi awo ene asanduza mapitiro awo m'bonde adabalwa na iwo, mbacita pinango pyakusyana na mudabalirwa iwo.

²⁷Sawa-sawambo na amuna. Asiya kupita kwawo m'mabonde na akazi, mbatoma kusirirana okha ene. Atoma kucita pinthu pyamanyadzo mamuna na mamuna, na thangwi eneyo atambira okha ene nyatwa ya kukwanirana na kudawa kwawo.

²⁸Pontho, na thangwi ya kupwaza kudziwa Mulungu, Iye aasiya mbakupwa, toera acite pinthu pyakukhonda kucitika.

²⁹Adzala na kukhonda kulungama kwakusiyana-siyana. Uipi, kusaka kupfuma, na kudzowerera kucita kuipa. Adzala na bibvu, kuphana, kuidana, kudhobha na kuzondana. Ndi anthu anyapseda,

³⁰akupambazira andzawo, anyamalwa a Mulungu, akukhonda kulangika, anyakupikuza na akudungudza. Asasaka kuti anacita tani kuipa, mbakhonda kubvera ababawo.

³¹Ndi madzemwa, anthu akukhonda kunyindirika, akukhonda kufuna abale awo, akusowa ntsisi.

³²Iwo asadziwa matongero akulungama a Mulungu, kuti anthu anacita penepi asatongwa aphiwe. Mbwenye asakakamira na kupicita, pontho asakomerwambo basi na ale anapicita.