Read cisena Aroma 10 Bible Online

Aroma 10 - cisena bible

Aroma 10

¹Abale anga, pinafuna ine muntima mwanga, na maphembero anacita ine kuna Mulungu, mba kuti ana a Izarayeli apulumuswe.

²Ndinaacitira umboni kuti iwo asakakamira kakamwe pya Mulungu, mbwenye iwo asapicita mbakhonda kudziwa.

³Thangwi na kukhonda dziwa kulungama kunabuluka kuna Mulungu, pontho na kusaka kucita kulungama kwawo, akhonda kubvera kulungama kwa Mulungu.

⁴Thangwi kumalisira kwa mwambo ndi Kirixtu, toera onsene adatawira akhale akulungama.

⁵Lang'anani, Mozesi alemba kuti: “Munthu anacita kulungama kunabulukira pa mwambo, anakhala m'maso.”

⁶Mbwenye kulungama kunabuluka pa kukhulupira kusalonga tenepa: “Leka kulonga muntima mwako kuti: ‘Mbani anafuna kwira kudzulu?’ Penepi nkhubveka kuti: Toera atichitisire Kirixtu,

⁷peno ‘Mbani anafuna chitira n'djenje ya cidima?’ Penepi nkhubveka kuti: Toera atilamusire Kirixtu pa anyakufa.”

⁸Mbwenye fala ya Mulungu isalonganji? “Fala iri dhuzi na iwe. Iri pa mulomo pako na muntima mwako.” Iyi ndiyo fala ya cikhulupiro inamwaza ife.

⁹Iwe ungalonga na mulomo wako kuti Yezu ndi Mbuya, pontho mbutawira na ntima wako kuti Mulungu amulamusa pa kufa, unapulumuswa.

¹⁰Thangwi kulungama kusadza na kutawira kwa muntima, kupulumuka kusadza na kulonga na mulomo wathu.

¹¹Ninga pinalonga Bukhu ya Mulungu kuti: “Onsene anan'khulupira nkhabebve kudza kasandikika.”

¹²Madjuda na ale adakhonda kukhala madjuda hadasyana tayu. Thangwi Mbuya wa anthu onsene ndi m'bodzi ene pontho ndi m'pfumi kuna onsene anancemera.

¹³Thangwi “onsene ale anacemera dzina ya Mbuya, anapulumuswa.”

¹⁴Mphapo anancemera tani munthu anakhonda iwo kukhulupira? Pontho anan'khulupira tani munthu anakhonda iwo kum'bva mbalongwa? Pontho anam'bva tani angasoweka munthu wakumwaza Mphangwa?

¹⁵Pontho anthu anamwaza tani Mphangwa angakhonda kutumwa? Ninga pidalembwa m'Bukhu ya Mulungu kuti: “Ndi pinthu pyadidi kakamwe kuona anthu[17] anaenda mbamwaza Mphangwa Zadidi!”

¹⁶Mbwenye si onsene tayu adatawira Mphangwa Zadidi. Thangwi Izaya alonga kuti: “Mbuya, mbani adatawira Mphangwa zathu?”

¹⁷Na thangwi eneyo, kukhulupira kusabwera na kubva, kubva mafala a Kirixtu.[18]

¹⁸Mbwenye ine ndisabvundza kuti: Iwo hadabva tayu? Ande abva! Thangwi pyalembwa kuti: “Kukhuwa kwawo kwabveka pantsi pano ponsene, pontho mafala awo afika mpaka kudadhoroma dziko.”

¹⁹Ndiri kubvundza pontho kuti: Nkhulongera kuti Izarayeli hadapibvesesa tayu? Pakutoma Mozesi alonga kuti: “Ine ndinati ndicite kuti imwe mukhale na bibvu na mbumba yakupwazika. Pontho ndinakucitani kuti imwe muipirwe na mbumba yakusowa ndzeru.”

²⁰Izaya akhala na cipapu mbalonga tenepa: “Ine ndagumaniwa na ale akhakhonda kundisaka. Pontho ndabulukira kuna ale akhakhonda kundibvundzisa.”

²¹Mbwenye pa thangwi ya Izarayeli, Iye alonga tenepa: “Ntsiku zonsene ndafuthula manja kuna mbumba yakukhonda kubvera na ya upoka.”